ԵՄ դեսպան. Հայաստանի արժեքը կայանում է նաև կամուրջներ կապելու պատմական ունակության մեջ

Արմինֆո. Վարչապետ Հովիկ Աբրահամյանը ներկա է գտնվել «Եվրոպական բիզնես հեռանկարները, խոչընդոտները և հնարավորությունները Հայաստանում» խորագրով համաժողովին, որը կազմակերպել է Եվրոպական բիզնես ասոցիացիան:

Ինչպես ԱրմԻնֆո գործակալությանը տեղեկացվել է ՀՀ կառավարության մամուլի ծառայությունից, ողջունելով ներկաներին՝ վարչապետը կարևորել է նման միջոցառումների անցկացումը և նշել.  «Գործարար համայնքի, ինչպես նաև տնտեսական քաղաքականություն մշակող պատասխանատուների լայն ներկայացվածությունն այս միջոցառմանը, թույլ է տալիս կանխատեսել ակտիվ ու կառուցողական քննարկում բոլորիս հուզող հարցերի շուրջ:                 ՀՀ կառավարությունը շարունակական քաղաքականություն է իրականացնում գործարար միջավայրի տեսանկյունից Հայաստանն առավել գրավիչ երկիր դարձնելու ուղղությամբ: Մենք հռչակել և հետևողականորեն իրականացնում ենք «բաց դռների» քաղաքականություն` չկիրառելով գրեթե ոչ մի սահմանափակում ներդրումային գործունեության նկատմամբ: Գործարար միջավայրի բարելավմանն ուղղված մեր քայլերը բարձր են գնահատվում միջազգային հեղինակավոր կազմակերպությունների կողմից: Մենք իրականացնում ենք քաղաքականություն, որի նպատակն է ապահովել հավասար պայմաններ բոլորի համար: Օտարերկրյա ընկերությունները պետք է իրենց հարմարավետ և ապահով զգան Հայաստանում:

Հայաստանը կարող է յուրահատուկ կամուրջ հանդիսանալ Եվրասիական տնտեսական միության և Եվրամիության անդամ երկրների միջև` մի կողմից հաշվի առնելով Հայաստանի` Եվրասիական տնտեսական միության անդամակցությունից բխող, մյուս կողմից` Եվրամիության հետ առևտրում GSP+ արտոնյալ առևտրային ռեժիմից օգտվելու հնարավորությունները: Արտոնյալ GSP առևտրային ռեժիմ ունենք նաև Կանադայի, Շվեյցարիայի, Ճապոնիայի և Նորվեգիայի հետ: Մեկ այլ հնարավորություն է Հայաստանի Հանրապետության և Ամերի­կայի Միացյալ Նահանգների կառավարությունների միջև վերջերս ստորագրված առևտրի և ներդրումների մասին  շրջանակային համաձայնագիրը, որով ստեղծվում են բարենպաստ պայմաններ ներդրումների և երկու երկրների միջև ապրանքաշրջանառության, առևտրի խրախուսման համար։ Մենք առանձնահատուկ ուշադրություն ենք դարձնում ներդրումային ծրագրերին` նպատակ ունենալով աջակցել նոր աշխատատեղերի ստեղծմանը, ներդրումների ներգրավմանը` առաջարկելով գործարարներին արտոնությունների լայն շրջանակ: Այս համատեքստում, վստահ եմ, որ Եվրոպական բիզնես ասոցիացիայի գործունեությունը Հայաստանում ևս իր նպաստը կբերի ներդրումների ներգրավման, գործարար համայնքի շահերի ներկայացման և պետություն-մասնավոր երկխոսության զարգացման տեսանկյունից: Ամփոփելով խոսքս` մաղթում եմ Ձեզ հաջողություն և արդյունավետ գործունեություն»:

Իսկ Հայաստանում ԵՄ պատվիրակության ղեկավար Պյոտր Սվիտալսկին նշել է, որ եվրոպական պետությունները հետաքրքրված են Հայաստանի հետ գործընկերային հարաբերությունների ստեղծման մեջ: Հայերն իրենց գենոտիպով ձեռներեցներ են, իսկ դրա համար անհրաժեշտ է միայն ստեղծել համապատասխան պայմաններ, ասել է նա: Հայաստանի արժեքը կայանում է նաև կամուրջներ կապելու պատմական ունակության մեջ, նշել է դիվանագետը:

Սվիտալսկին հույս է հայտնել, որ առաջիկա ամիսներին Հայաստան-ԵՄ հարաբերությունները կցուցադրեն զգալի դինամիկա` ԵՄ հետ նոր շրջանակային համաձայնագրի կնքման համատեքստում: «Մեր միակ նպատակը Հայաստանում ավելի շատ եվրոպական գործընկերների և ներդրողների տեսնելն է»,-հայտարարել է Սվիտալսկին: Նա նշել է, որ ներկայումս ներդրումային մթնոլորտը Հայաստանում բարենպաստ է, և անհրաժեշտ է դրանից օգտվել: Ամենագլխավորը պլաններն իրականության վերածելն է, նշել է եվրոպական դեսպանը:

«Հայաստան-ԵՄ շրջանակային համաձայնագրի ակնկալվող կնքումը կպատասխանի մեզ հետաքրքրող բազմաթիվ հարցերին»,-հայտարարել է ՀՀ էկոնոմիկայի նմախարար Արծվիկ Մինասյանը: Նա համոզված է, որ Հայաստանն ի վիճակի է միջազգային կազմակերպությունների հետ համագործակցության միջոցով իրականացնել բոլոր ծրագրերը, որոնք կարող են նպաստել երկրի տնտեսական բարեկեցության բարձրացմանը:

ՀՀ ՊԵԿ ղեկավար Հովհաննես Հովսեփյանի խոսքով, Հայաստանը հետևողական է տեղական և օտարերկրյա ընկերությունների համար կանխատեսելի ու թափանցիկ գործարար մթնոլորտի ապահովման հարցում: «Բիզնեսի բոլոր ներկայացուցիչների համար արդարության, օրինականության և հավասար պայմանների ստեղծման սկզբունքները մեր առաջնահերթություններն են»,-հայտարարել է Հովսեփյանը: Նրա խոսքով, անդամությունը ԵԱՏՄ-ին նոր հնարավորություններ է ստեղծում ոչ միայն Հայաստանի, այլ նաև այն երկրների համար, որոնք համագործակցում են հայկական բիզնեսի հետ: Նա իր պատրաստակամությունն է հայտնել տվյալ փուլում մաքսային և հարկային ոլորտներում գոյություն ունեցող խնդիրների լուծման գործում:

Հուլիսի 7-ին է Եվրոպական բիզնես ասոցիացիան, Հայաստանի բիզնես-հանրության և եվրոպական բիզնես-հանրության հետ համատեղ, օտարերկրյա և տեղական ընկերությունների/ներդրողների համար, կազմակերպել է «Եվրոպական բիզնես հեռանկարները, խոչընդոտները և հնարավորությունները Հայաստանում» խորագրով համաժողովը:-