Հայկական տեստիլ ձեռնարկությունը նախատեսում է հագուստ արտադրել «Լամբորջինիի» համար

Արմինֆո. Հայկական «Ալեքս Տեքստիլ» ընկերությունը ձեռնարկությունը նախատեսում է հագուստ արտադրել իտալական «Լամբորջինի» ընկերության համար: Այս մասին հուլիսի 7-ին Երևանում ընթացող`«Եվրոպական բիզնես հեռանկարները, խոչընդոտները և հնարավորությունները Հայաստանում» խորագրով համաժողովում հայտարարել է ընկերության ղեկավար Մարատ Մովսիսյանը:

Նրա խոսքով, հիմնական սարքավորումները ներմուծվել են Իտալիայից: Ձեռնարկությունը նախատեսում է ընդլայնել համագործակցությունը եվրոպական բիզնես-ասոցիացիաների հետ և ընդլայնել իր արտադրանքի արտահանման աշխարհագրոթյունը: Նա հայտարարել է, որ տեղական բիզնեսի զարգացման և արտահանման հարցումյ պրոբլեմներ և խոչընդոտներ չի տեսնում: «Ներկայումս աշխատում ենք արտադրական հզորությունների ավելացման ուղղությամբ`արտահանման ծավալներն ավելացնելու նպատակով: Արտադրանքի 80%-ը նախատեսում ենք արտահանել ԵԱՏՄ երկրներ, 20%-ը` ԵՄ»,-տեղեկացրել է Մովսիսյանը:

Նշենք, որ Ալեքս Տեքստիլ ձեռնարկությունը կիսագուլպաների արտադրություն է սկսել 2015 թվականից, իսկ 2016-ին սկսել է մանկական հագուստի արտադրություն: Արտադրանքի առաջին խմբաքանակն արդեն արտահանվել է Ռուսաստան «Մանկական աշխարհ» առևտրի կենտրոնի պատվերով: Արտադրվող մանկական հագուստը ներկայումս միայն արտահանվում է, իսկ առաջիկայում, արտադրական հզորությունների ավելացումից հետո, այն կսկսվի իրացվել նաև ներքին շուկայում: