Հինգշաբթի, 25 Օգոստոսի 2016 17:20

Արմինֆո. ՀՀ կառավարությունը յոթ մղոնանոց քայլերով ընթանում է հայ-իրանական սահմանի վրա ազատ տնտեսական գոտի ստեղծելու ուղղությամբ: Այս մասին օգոստոսի 25-ին, կառավարության նիստից հետո, լրագրողներին հայտնել է ՀՀ էկոնոմիկայի նախարար Արծվիկ Մինասյանը: Միևնույն ժամանակ, նախարարը դժվարացել է նշել գոտու ստեղծման ժամկետները, նշելով միայն ԱՏԳ ռեզիդենտների համար առավելագույն արտոնություններ ստեղծելու հայկական կողմի ձգտումների մասին:

 

Նախարարը հիշեցրել է, որ ԱՏԳ ստեղծման գաղափարը վաղուց էր մշակվում, և միայն ԵԱՏՄ երկրների վարչապետների Սոչիում կայացած վերջին հանդիպման ընթացքում ձեռք բերվեց հայ-իրանական սահմանի վրա, Մեղրիի շրջանում, ԱՏԳ ստեղծելու մասին համաձայնություն: Նրա խոսքով, ՀՀ տնտեսության գերակա ուղղություններին համապատասխան ԱՏԳ-ի ստեղծումը նոր և լայն հնարավորություններ կստեղծի Հայաստանի, հատկապես, Մեղրիի տարածաշրջանի համար, քանի որ այնտեղ կբացվեն նոր աշխատատեղեր, լավագույնս կիրացվի առկա տնտեսական ռեսուրսը: Ակնկալվում է, որ նոր ԱՏԳ-ն առավել առարկայական կդարձնի Իրանի հետ առևտրատնտեսական և արդյունաբերական քաղաքականությունը, կնպաստի երկկողմ տնտեսական կապերի խորացմանն ու ընդլայնմանը, կձևավորվեն և կկազմակերպվեն այնպիսի ծառայություններ, որոնք հնարավորություն կտան առանց խոչընդոտի մուտք գործել Եվրասիական տնտեսական միության և իրանական շուկաներ:

 

Ավելի վաղ ՀՀ վարչապետ Հովիկ Աբրահամյանը հայտարարել էր, որ Մեղրիում ԱՏԳ ստեղծումը շատ կարևոր ծրագիր է, որը նոր հնարավորություններ է բացում մեր տնտեսության զարգացմանը: Միևնույն ժամանակ, ըստ վարչապետի, այս նախագիծը կարևոր է նաև տարածաշրջանային զարգացման առումով: «Տարածաշրջանի զարգացումը մեր առաջնահերթություններից մեկն է, և առևտրի տնտեսական նոր գոտին շատ կխթանի Մեղրիի զարգացմանը: Կբացվեն նոր աշխատատեղեր, նոր հեռանկարներ»,-նշել է վարչապետը: Նրա խոսքով, ծրագիրը Իրանին նույնպես հնարավորություն կտա ԵԱՏՄ անդամ-երկրների հետ հիմնել համատեղ ձեռնարկություններ:

 

Ըստ պաշտոնական տվյալների, ԵԱՏՄ արտաքին առևտուրը 2016 թվականի առաջին կիսամյակում կազմել է 228.6 մլրդ ԱՄՆ դոլար (արտահանումը`140.5, իսկ ներմուծումը` 88.1 մլրդ. դոլար): Նախորդ տարվա նույն ժամանակահատվածի համեմատ արտաքին առևտրի շրջանառությունը նվազել է 23%: Արտահանման ծավալները նվազել են 29.3%, իսկ ներմուծման ծավալները`10,3%: ԵԱՏՄ ներքին առևտրաշրջանառությունը 2016-ի առաջին կիսամյակում անցյալ տարվա նույն ժամանակահատվածի համեմատ նվազել է 17% և կազմել $ 19 մլրդ. դոլար:

 

Ըստ ՀՀ Ազգային վիճակագրական ծառայության տվյալների, 2016 թվականի առաջին կիսամյակում առևտրի շրջանառությունը Հայաստանի և Իրանի միջև նվազել է 16,4%, մինչև $ 113,5 մլն., ինչը պայմանավորված էր ներմուծման 19.2% կրճատումով, մինչև $ 75,7 մլն, ինչպես նաև արտահանման`10,3% կրճատումով, մինչև $ 37.8 մլն:

 

ՀՀ կառավարությունը 2014 թվականի փետրվարի 27-ի նիստում հավանություն էր տվել Ազատ տնտեսական գոտու կազմակերպմանը, «Մերիդիան» ՓԲԸ-ին ճանաչելով որպես ԱՏԳ կազմակերպիչ: ԱՏԳ ստեղծմանն ուղղված ներդրումների ծավալը կազմել է մոտ $ 10 մլն. 2016 թվականի օգոստոսի 4-ի դրությամբ, ըստ էկոնոմիկայի նախարարի Արծվիկ Մինասյանի, «Մերիդիան» և «Ալյանս» ազատ տնտեսական գոտիների տարածքում գործում են 8 ընկերություններ: Ընկերությունների ներդրումների ընդհանուր ծավալը կազմել է $57.6 մլն, որի շրջանակներում կստեղծվի 240 նոր աշխատատեղ: