Արդյունաբերական հատվածի և ծառայությունների ոլորտի բարձր տեմպերը Հայաստանի տնտեսական ակտիվությունը պահում են դրական`3% դինամիկայում

Արմինֆո. Տնտեսական ակտիվությունը Հայաստանում 2016 թվականի հունվար-հուլիսին աճել է 3%, իսկ արտահանումն ավելացել է 16.5%: Այս տարվա հուլիսին, 2015-ի հուլիսի համեմատ, տնտեսական ակտիվությունն իջել է 4.3%, իսկ միայն 2016 - ի հուլիսին`2,5%: Մեկ տարի առաջ, 2015 թվականի հունվար-հուլիսին, 2014-ի նույն ժամանակահատվածի համեմատ, տնտեսական ակտիվությունն աճել էր 4,2%, հուլիսին, 2014-ի հուլիսի համեմատ`4%, իսկ միայն հուլիսին`9.2%: Համեմատության համար նշենք, որ 2014 թվականի հունվար-հուլիսին տնտեսական ակտիվությունն աճել էր 4.1%, իսկ միայն հուլիսին`19.2% (տարեկան աճը` 7.2%):

Ըստ ՀՀ Ազգային վիճակագրական ծառայության նախնական տվյալների, Հայաստանում 2016 թվականի հուվար-հուլիսին տեղի ունեցած տնտեսական ակտիվության աճը հիմնականում պայմանավորեցին` արդյունաբերական ոլորտը`7,9%, ծառայությունների ոլորտը`7.6%, գյուղատնտեսության ոլորտը`1.3 %: Միևնույն ժամանակ առևտրի ոլորտը դեռ գտնվում է 0.4% բացասական դինամիկայում, իսկ անկում են արձանագրել շինարարական ոլորտը` 7.6% և էներգետիկ համալիրը`5.5%:

Արդյունաբերական արտադրանքի գների ինդեքսը 2016 թվականի հունվար-հուլիսին 2015 թվականի նույն ժամանակահատվածի համեմատ նվազել է 1.5%, 2016-ի հուլիսին, 2015-ի հուլիսի համեմատ աճել է 3.9%, իսկ միայն 2016-ի հուլիսին աճել է 0,7%:

Իսկ ամսական կտրվածքով (հուլիս), տնտեսական աճին վճռորոշ խթանեցին` գյուղատնտեսական ոլորտը, համախառն արտադրության ծավալները բարձրացնելով 50.6% (2015-ի հուլիսի աճը` 87.8%), էներգետիկ համալիրը`10% (2015-ի անկումը`3.3%), որոնց զգալի զիջում է առևտրի հատվածը` 3.5% (2015-ի աճը` 3.4%): Ընդ որում, հուլիսին անկում են արձանագրել` արդյունաբերական հատվածը`6.2% (նախորդ տարվա անկումը`2.6%), շինարարության ոլորտը`3.5% (2015-ի անկումը` 4.5%), ծառայությունների ոլորտը` 4% (նախորդ տարվա աճը`1.2%):

Տարեկան կտրվածքով աճ է արձանագրվել միայն արդյունաբերական հատվածքում`2.8% և ծառայությունների ոլորտում `4.1%, իսկ մյուս ոլորտներում արձանագրվել է անկում, մասնավորապես, գյուղատնտեսական ոլորտում`3.8%, առևտրի ոլորտում`1%, շինարարության ոլորտում `6.8% և էներգետիկ համալիրում`8.9%:

Ըստ վիճակագրական տվյալների 2016 թվականի հունվար-հուլիսին բացարձակ արժեքով առջևում է առևտրի ոլորտը, 1.2 տրլն դրամ ծավալով ($ 2.4 մլրդ): Երկրորդ տեղում է արդյունաբերական հատվածը`777.4 մլրդ դրամ ($ 1.6 մլրդ), երրորդն է ծառայությունների ոլորտը`690.1 մլրդ դրամ ($ 1.4 մլրդ), չորրորդ տեղում է գյուղատնտեսության ոլորտը` 344.02 մլրդ դրամ ($ 712,5 մլն), հինգերորդն է շինարարության ոլորտը` 158.7 մլրդ դրամ ($328,7 մլն): Էլեկտրաէներգիայի արտադրության ծավալը 2016 թվականի հունվար-հուլիսին կազմել է 4166.1 մլն կՎտժ, որից միայն հուլիսին`559.9 մլն կՎտժ:

Միևնույն ժամանակ, Հայաստանի արտաքին առևտրի շրջանառությունը 2016 թվականի հունվար-հուլիսին կազմել է 1283.3 մլրդ. դրամ ($ 2658,8 մլն), տարեկան աճը`2,3%: Դրա կառուցվածքում արտահանման ծավալների տարեկան աճը կազմել է 16,5%, մինչև 467.5 մլրդ դրամ ($ 969 մլն), իսկ ներմուծման տարեկան անկումը` 4.4%, մինչև 815.8 մլրդ. դրամ ($ 1689.8 մլն): Միայն 2016-ի հուլիսին արտաքին առևտրի շրջանառությունը կրճատվել է 7.1%, արտահանման` 3.3% և ներմուծման` 9.5% աճի հաշվին, իսկ 2015-ի հուլիսի համեմատ արտաքին առևտրի շրջանառությունը նվազել է 1,3%, ներմուծման ծավալների 9% անկման և արտահանման ծավալների`13,2% աճի հաշվին: Մեկ տարի առաջ, 2015 թվականի հունվար-հուլիսին արտաքին առևտրի շրջանառությունը նվազել էր 24% (միայն հուլիսին նվազելով 20.8%), ինչը պայմանավորված էր, հիմնականում ներմուծման 4.4% և  արտահանման 30.7% անկումով (միայն հուլիսին ներմուծումը կրճատվել է 18.4%, իսկ արտահանումը`25%): Համեմատության համար նշենք, որ 2014 թվականի հունվար-հուլիսին Հայաստանի արտաքին առևտրի շրջանառությունն աճել էր 3.5%, քանի որ արտահանումն ավելացել էր 2.8%, իսկ ներմուծումը` 3.7%: Միայն 2014-ի հուլիսին արտաքին առևրի շրջանառությունն աճել 17.2%, քանի որ ներմուծման աճը կազմել էր 18.3%, իսկ արտահանմանը` 14%:

ՀՀ դրամի միջին հաշվարկային փոխարժեքը 2016 թվականի հուլիսին կազմել է 476.52 դրամ / $ 1, իսկ հունվար-հուլիսին `482.81 դրամ / $ 1, 2015-ի հուլիսի` 477.33 դրամ / $ 1 – ի և 2015-ի հունվար-հուլիսի 476,93 դրամ / $ 1 – ի համեմատ: