Արմինֆո. Հայաստանում գործող ատոմային էլեկտրակայանը համապատասխանում է անվտանգության բոլոր ժամանակակից պահանջներին և ոչ մի վտանգ չի ներկայացնում: Այդ մասին ԱրմԻնֆո-ի թղթակցի հետ զրույցում հայտարարել է Հայաստանում Ռուսաստանի դեսպան Իվան Վոլինկինը, պատասխանելով այն հարցին, թե արդյոք Հայկական ԱԷԿ-ը սպառնալիք է ներկայացնում տարածաշրջանի համար, ինչպես պնդում են Ադրբեջանը, Թուրքիան և Արևմուտքը:
«Կարևոր է իրականացնել ճիշտ շահագործում և տեխնիկական սպասարկում: Դա արվում է բարձրագույն մակարդակով, Հայաստանում կան լավ մասնագետներ, որոնք սպասարկում են այդ կայանը: Ես կարծում եմ, որ այստեղ ոչ մի սպառնալիք չկա: Մենք բոլորս շատ լավ հասկանում ենք, որ առանց ատոմային էներգետիկայի հնարավոր չէ, իսկ այնպիսի բնական պաշարները, ինչպես գազն ու նավթը, սպառվում են, և ատոմային էներգետիկան զբաղեցնում է էլեկտրաէներգիայի արտադրության զգալի բաժինը,
Հայաստանում, ինչպես նաև աշխարհի երկրների մեծ մասում, և եվրոպական երկրներում, ԱՄՆ-ում, Ռուսաստանում դրա բաժինն ավելանում է: Հարկավոր է, պարզապես, ուշադիր հետևել շահագործմանը», - ընդգծել է դեսպանը:
Հիշեցնենք, որ Մեծամորի մոտ գտնվող ՀԱԷԿ-ը, որը միակն է տարածաշրջանում, շահագործման էր հանձնվել 1980 թվականին և կանգնեցվել էր 1989 թվականի մարտին` Սպիտակի երկրաշարժից հետո: ՀԱԷԿ-ը վերագործարկվել է 1995 թվականի նոյեմբերին` հանրապետությունում սուր էներգետիկ ճգնաժամի առնչությամբ: Կայանի երկու էներգաբլոկները զինված են ռուսական առաջին սերնդի ВВЭР-440 ռեակտորներով: Առաջին բլոկն այժմ կանգնեցված է: Կայանին բաժին է ընկնում էլեկտրաէներգիայի արտադրության մինչև 40%-ը: Սեպտեմբերի 19-ին Հայկական ԱԷԿ կանգնեցվել է երկամսյա պլանային կանխողական վերանորոգման: Ժամանակացույցի համաձայն, պլանային վերանորոգումը կտևի մինչև նոյեմբերի 18: էներգետիկայի և բնական պաշարների փոխնախարար Արեգ Գալստյանը ԱրմԻնֆո-ի թղթակցի հետ զրույցում հաղորդել էր, նման միջոցառումներ անցկացվում են ամեն տարի, դրանք ստանդարտ միջոցառումներ են և լիովին համապատասխանում են աշխատանքների ժամանակացույցին: Ներկա փուլի առանձնահատկությունը կլինի ռեակտորի կմախքի և միջուկային կղզու առաջին ուրվագծի սարքավորման մետաղի վիճակի հետազոտման աշխատանքների վիթխարի համալիրը: Այդ աշխատանքները կանցկացվեն ՀԱԷԿ 2-րդ էներգաբլոկի շահագործման ժամկետի երկարաձգման ծրագրի շրջանակում: Այդ աշխատանքների իրականցումից հետո սրբագրումներ կկատարվեն արդիականացման ծրագրում: Հիշեցնենք, Փորձագետների գնահատականների համաձայն, կայանի շահագործման ռեսուրսն ասպառվում է 2016 թվականին: Այժմ աշխատանքներ են իրականացվում կայանի շահագործման ժամկետը մինչև 2026 թիվը երկարաձգելու համար: Նախագծի իրագործման համար ռուսական կողմը Հայաստանին 270 մլն դոլարի վարկ է տրամադրել` 15 տարվա ընացքում մարման պայմանով` 3% տարեկան տոկոսադրույքով: Բացի այդ, նույն նպատակների համար Ռուսաստանի Դաշնությունը 30 մլն դոլարի դրամաշնորհ է տրամադրել Հայաստանին: «Ռոսատոմսերվիսի» կողմից իրականացվող աշխատանքները կավարտվեն 2019 թվականի վերջին:
Թուրքիան և Ադրբեջանը բազմիցս փորձել են ազդել Մեծամորի ԱԷԿ աշխատանքի վրա, պարբերաբար բարձրացնելով դրա գործունեության հարցը տարբեր միջազգային հարթակներում: ԵՄ նույնպես բազմիցս հայտարարել է Մեծամորի ԱԷԿ աշխատանքը դադարեցնելու անհրաժեշտության մասին: Սակայն, Հայաստանի կառավարությանն առընթեր միջուկային անվտանգության կարգավորման պետական կոմիտեի ղեկավար Աշոտ Մարտիրոսյանը բազմիցս հաղորդել է, որ ԱԷՄԳ, ԵՄ, ԱՄՆ և ՌԴ բազմաթիվ փորձագիտական առաքելությունները չեն հայտնաբերել որևէ շեղում կամ խախտում, որը վկայի Մեծամորի ԱԷԿ անվտանգության անթույլատրելի մակարդակի մասին: Նա ընդգծել է, որ ՀԱԷԿ անվտանգության մակարդակը համապաատսխանում է այլ երկրների համանման ԱԷԿ-ների անվտանգության մակարդակին: