«Հյուսիս-Հարավ ճանապարհային միջանցքի ներդրումային ծրագիր» ՊՈԱԿ ղեկավար. Ոչ մի չարաշահում և յուրացում չի եղել

Արմինֆո. «Հյուսիս-Հարավ ճանապարհային միջանցքի ներդրումային ծրագիր» ՊՈԱԿ գլխավոր գործադիր տնօրեն Արթուր Սարգսյանը հավաստել է, որ «Հյուսիս-Հարավ» տրանսպորտային միջանցքի շինարարարական աշխատանքների ընթացքում չեն եղել չարաշահումներ և յուրացումներ:

Ա.Սարգսյանն իր ուրախությունով կիսվել է լրագրողների հետ: Պարզվել է, որ սեպտեմբերի 14-ին պաշտոնական նամակ է ստացվել ԵՄ հանձնաժողովից, որտեղ «Հյուսիս-Հարավ» ավտոմայրուղին ամբողջությամբ ճանաչվել է Եվրամիության TNT ցանցի առանցքային ճանապարհ: Ինչպես պարզաբանել է Սարգսյանը, դա նշանակում է, որ ԵՄ հետաքրքրված է, որպեսզի մարուղին կառուցվի մինչև 2030 թվականը, ինչն էլ իր հերթին նշանակում է Հյուսիս-Հարավ նախագծի ներդրումային վարկանիշի բարձրացում: Ինչից ելնելով, ըստ Սարգսյանի, մինչ օրս կատարված աշխատանքներն արդարացված են և հեռանկարային: Ինչ վերաբերվում է տրանսպորտի նոր նախարարի հայտարարությանը, կապված Հյուսիս-Հարավ ավտոմայրուղու շինարարության արդյունավետության հետ, ապա, ըստ Սարգսյանի, ժամանակը չէ նման հարցով դիմել նախարարին`նրա նշանակումից մեկ ամիս անց: «Նրան ժամանակ է պետք, որպեսզի հասկանա իրավիճակը, կատարի ընդունում-հանձնում, և միայն դրանից հետո սպասի ճիշտ պատասխաններին»,-նշել է նա:

Ըստ Սարգսյանի, բոլոր աշխատանքներն ընթանում են սովորական ռեժիմով, ըստ ժամանակացույցի: Մայրուղու հյուսիսային հատվածում, Տրանշ-2-ի շրջանակներում, մեկնարկել են բետոնավորման աշխատանքները, իսկ եղանակային պայմանների բարենպաստ լինելու դեպքում նախատեսվում է 10 կմ ճանապարհի շինարարություն: Թալին-Գյումրի հատվածում, ըստ Սարգսյանի, կատարվել են հողային և ենթակառուցվածքային մեծ աշխատանքներ, հարավային հատվածի շինարարության համար հայտարարվել է մրցույթ: Ինչ վերաբերվում է կառուցապատող ընկերության նկատմամբ քրեական գործ հարուցելու մասին ԶԼՄ-ներում շրջանառվող տեղեկություններին, Սարգսյանը նշել է, որ ինքը տեղյակ չէ այդ քրեական գործից: «Եթե խոսքը գնում է հարկային մարմինների հայտարարության մասին, ապա այն գտնվում է քննարկման փուլում, քանի որ ԿՈՐՍԱՆ-ԿՈՐՎԻԱՍ ԿՈՆԱՏՐՈՒԿՑԻՈՆ ընկերությունն այդ մեղադրանքները չի ընդունում և հանդես է եկել հակընդեմ հայցով»,-հայտարարել է նա, նշելով, որ պրոբլեմը կապված է միայն հարկերի վճարման ժամկետների խախտման հետ, ինչը հատուկ է Հայաստանի ցանկացած ՍՊԸ-ներին: Միևնույն ժամանակ, ինչպես ընդգծել է Սարգսյանը, այդ գործընթացը ոչ մի կերպ չի ազդել շինարարական աշխատանքների ընթացքի վրա: Փոխնախարարի խոսքով, տրանսպորտի, կապի և տեղեկատվական տեխնոլոգիաների նոր նախարարը պետք է ծանոթանա «Հյուսիս-Հարավ» մայրուղու շինարարության ընթացքին և շատ շուտով հանդես կգա իր գնահատականներով:

Նշենք, որ հոկտեմբերի 20-ին տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը լրագրողներին հայտնել էր, որ ՀՀ կառավարությունը՝ ի դեմս Տրանսպորտի, կապի և տեղեկատվական տեխնոլոգիաների նախարարության, իրականացնում է Հյուսիս-Հարավ մայրուղու շինարարության արդյունավոտության գնահատում: Ինչպես հայտարարել է նախարարը, տվյալ փուլում գնահատվում է նախագծի արդյունավետությունը. ացկացվում են ինչպես ավտոմայրուղու շինարարության, այնպես էլ ընդհանուր առմամբ «Հյուսիս-Հարավ» ծրագրի ստուգումներ: Միաժամանակ նախարարը հավաստիացրել է, որ իր պաշտոնավարման ընթացքում որևէ չարաշահում չի լինի:

Հիշեցնենք, որ ընթացիկ տարվա հուլիսին կառավարության նիստի ժամանակ ՀՀ նախկին վարչապետ Հովիկ Աբրահամյանը հայտարարել էր, որ իսպանական շինարարական ընկերությունն իսկական չարիք է դարձել «Հյուսիս-Հարավ» ավտոմայրուղու համար: Նրա խոսքով, իրեն հասել են լուրեր, որ ավտոմայրուղու շինարարությունը ձգձգվում է իսպանական ընկերության ֆինանսական պրոբլեմների պատճառով: Նա ընդգծել էր նաև, որ Արարատի ճանապարհը նույնպես մինչ օրս պրոբլեմների մեջ է և սարքվել է անորակ: «Կա՞ն արդյոք պրոբլեմներ այդ ընկերության, և չգիտեմ էլ ում հետ, ասում են փող չկա, զբաղվեք այդ հարցով»,-հանձնարարել էր Աբրահամյանը: Իսկ ԶԼՄ-ներում տեղեկություններ հայտնվեցին այն մասին, որ «հայկական ավանդական կոռուպցիայի» պատճառով իսպանացիներին չի հաջողվի իրականացնել Հյուսիս-Հարավ ճանապարհի շինարարությունը, և նրանք որոշել են լքել Հայաստանը:

Շրջանառվող լուրերի համաձայն՝ իսպանական ընկերության դեմ քրեական գործ է հարուցվել, ինչը հաստատել են ֆինանսների նախարարությունում՝ հայտնելով, որ «2014թ. հոկտեմբերի 10-ին ՀՀ քրեական օրենսգրքի 205-րդ հոդվածի 2-րդ մասով հարուցվել է քրեական գործ՝ «ԿՈՐՍԱՆ-ԿՈՐՎԻԱՍ ԿՈՆԱՏՐՈՒԿՑԻՈՆե բաժնետիրական ընկերության հայաստանյան մասնաճյուղի կողմից առանձնապես խոշոր չափերով հարկեր վճարելուց խուսափելու դեպքի առթիվ։ Սույն քրգործով որպես մեղադրյալ ներգրավված անձ չկա։ Նախաքննությունը շարունակվում է»։

Հիշեցնենք, 556 կիլոմետր ընդհանուր երկարություն ունեցող «Հյուսիս–Հարավե միջանցքը ելք կապահովի դեպի Սև ծով և եվրոպական երկրներ Հայաստանի (Մեղրի–Կապան–Գորիս–Երևան–Աշտարակ–Գյումրի–Բավրա) և Վրաստանի տարածքներով։ 1 մլրդ դոլար արժողությամբ ներդրումային ծրագիրն նպատակաուղղված է Հայաստանի հյուսիսի (Վրաստանի հետ սահմանում) և հարավի (Իրանի հետ սահմանում) կապի ապահովմանը տրանսպորտային այնպիսի հաղորդակցությունների միջոցով, որոնք բավարարում են միջազգային բարձր չափանիշներն ու ելք են ապահովում դեպի համաշխարհային շուկաներ։ Ավտոճանապարհը կունենա բետոնե ծածկույթ: Նախագծի իրագործման համար Հայաստանը 500 մլն դոլարի վարկ է ներգրավել Ասիական զարգացման բանկից: Եվս 150 մլն դոլար կտրամադրի Եվրասիական զարգացման բանկը: Հայկական կողմը նախագծի իրացման համար նաև 60 մլն դոլար է ներգրավել Եվրոպական ներրդումային բանկից: Միջանցքի շինարարությունը նախատեսվում է լիովին ավարտել 2019 թվականին: «Հյուսիս-Հարավ» ծագրի առնչությամբ Հայաստանի կառավարությունը հաշվարկել է 2,5 դոլարի խնայողություն յուրաքանչյուր ուղևորի մեկ ժամվա երթևեկության և 1-ական դոլարի խնայողություն 1 տոննա բեռի փոխադրման 1 ժամվա համար: Ինչպես ակնկալում են Հայաստանի իշխանությունները, ծրագիրը թույլ կտա  ապագայում մեղմել Ադրբեջանի և Թուրքիայի կողմից շրջափակման հետևանքները, ստանձնել տարանցիկ  պետության դեր տարածաշրջանի երկրների բեռանփոխադրումներում, ինչպես նաև միանալ Սևծովյան օղակաձև ավտոմայրուղուն: