Չորեքշաբթի, 2 Նոյեմբերի 2016 16:44

Արմինֆո. «Ռոստելեկոմ» ընկերությունը հանդես է եկել  պարզաբանումներով, կապված «Պանարմենիան Մեդիա Գրուպ» ՓԲԸ կողմից իր երեք հեռուստաալիքների հեռարձակումը Ռոստելեկոմի հայկական ցանցում դադարեցնելու կապակցությամբ: Մասնավորապես, դադարեցվել են`«Արմենիա Թի-Վի», «Ա-ԹիՎի» և «Արմնյուզ» հեռուստաալիքները:

«Ռոստելեկոմ» ընկերության հայտարարության մեջ, մասնավորապես, ասված է, որ «Ռոստելեկոմ» հայաստանյան ցանցի միջոցով հեռուստաալիքների հեռարձակումն իրականացվում է գործընկեր հեռարձակող «Հիբրիդ Սոլյուշնզ» ՍՊ ընկերության միջոցով։ Հայկական հեռուստաալիքները մշտապես ներառված են եղել և շարունակելու են ներառված մնալ «Ռոստելեկոմի» բոլոր փաթեթներում անվճար դրամ արժեքով։ Ընդ որում թվով հինգ հեռուստաալիքներ ներառված են «Սոցիալական» կոչվող փաթեթում, որի շրջանակներում հինգ հեռուստաալիքներ՝ Արմենիա ԹԻՎԻ, Հայաստանի հանրային (Հ1), Հայկական երկրորդ (h2), Կենտրոն և Միր հեռուստաալիքները հասանելի են բոլոր բաժանորդներին անգամ այն ժամանակ, երբ ծառայությունները պարտքի պատճառով կասեցված են»,-ասված է հաղորդագրության մեջ։ Սակայն, նշվում է, որ նոյեմբերի 1-ից «Պանարմենիան Մեդիա Գրուպ» ՓԲԸ կողմից առանց որևէ պատճառի դադարեցվեց հեռարձակումը նաև մեր՝ «Ռոստելեկոմի» հայաստանյան ցանցում։

«Հավաստիացնում ենք, որ «ՋԻԷՆՍԻ-ԱԼՖԱ» ՓԲ («Ռոստելեկոմ» ապրանքանիշ) ընկերությունը կարևորում է ցանկացած բիզնես գործընթաց և մշտապես բանակցում է գործընկերների հետ՝ գործելով ՀՀ օրենսդրության շրջանականերում։ Ընկերությունը միշտ պատրաստ է մասնակցել բանակցային գործընթացներին, հատկապես, եթե դա առնչվում է ընկերության բաժանորդների շահերին և ցանկություններին։ Ի հավելում նշենք, որ «Ռոստելեկոմն» ի շահ իր բաժանորդների ակնկալում է հարցին տալ շուտափույթ լուծում և պատրաստ է գործադրել բոլոր ջանքերը խնդրի հանգուցալուծման համար»,-ասված է ընկերության հաղորդագրության մեջ:

Նշենք, որ նոյեմբերի 1-ին «Պանարմենիան Մեդիա Գրուպ» ՓԲԸ-ն անսպասելի հայտարարեց իր երեք հեռուստաալիքների հեռարձակումը Ռոստելեկոմի հայկական ցանցում դադարեցնելու մասին: Այնուհետև «Պանարմենիան Մեդիա Գրուպ» ՓԲԸ-ն հանդես եկավ հայտարարությամբ, փորձելով պարզաբանել իր այդ որոշումը: «Պանարմենիան Մեդիա Գրուպ» ՓԲԸ հայտարարության մեջ, մասնավորապես, ասված է, որ ընկերության «պրոդուկտից» անվճար օգտվում էին զանազան փրովայդերներ, այդ նույն պրոդուկտը վաճառելով իրենց աբոնենտներին: «Մենք այդ երևույթին միշտ ըմբռնումով ենք մոտեցել, որովհետև կարևորել ենք մեր սոցիալական պատասխանատվությունը հեռուստատեսային արտադրանքը հնարավորինս լայն հանրությանը մատչելի դարձնելու հարցում։ Այսօր արդեն փաստ է, որ հեռուստատեսային հեռարձակման թվայնացման արդյունքում ՀՀ յուրաքանչյուր քաղաքացի հնարավորություն ունի ամենաբարձր որակով անվճար դիտելու մեր ծրագրերը, և դա մեզ ոգևորում է։ Հետևաբար` այսօր մենք արդեն հորդորում ենք կաբելային ծառայություն մատուցող մեր գործընկերներին կա՛մ դադարեցնել վճարովի հեռարձակումը, կա՛մ դրա պայմանները համաձայնեցնել մեզ հետ։ Մենք շնորհակալ ենք մեր գործընկերներին խնդրի կարևորությունն ընդունելու համար և հույս ենք հայտնում, որ դրա լուծմանն ուղղված բանակցային գործընթացները երկար չեն տևի»,-ասված է «Պանարմենիան Մեդիա Գրուպ» ՓԲԸ հայտարարության մեջ։

Միևնույն ժամանակ, ըստ ԱրմԻնֆո գործակալության տեղեկությունների, ստեղծված իրավիճակը կարող էր ունենալ մի փոքր այլ մոտիվներ, որոնք ուղղակիորեն կապ չունեն հանրապետությունում հեռուստատեսային հեռարձակման թվայնացման հետ: Պատճառը, հավանաբար, թաքնված է հայկական փրովայդերական շուկայում տեղի ունեցած փոփոխություններում: Բանը նրանում է, որ, ըստ գործակալության տեղեկությունների,   առայժմ ոչ պաշտոնական, բայց դե-ֆակտո, Հայաստանի խոշորագույն փրովայդերներից մեկում`Ucom-ում ֆինանսների նախարար Գագիկ Խաչատրյանի պաշտոնանկությունից հետո, ում պատկանում էր Ucom ընկերությունը, տեղի է ունեցել վերջնական շահառուների փոփոխություն: Ինչպես հաղորդում են ԱրմԻնֆո-ի աղբյուրները, Ucom-ի նոր սեփակատերերը փոխկապակցված են «Պանարմենիան Մեդիա Գրուպ» ՓԲԸ հետ, և ստեղծված իրավիճակն անհրաժեշտ է դիտարկել հենց այս փոփոխությունների լույսի ներքո: Մանավանդ, որ մեդիա գրուպն իր այդ երեք հեռուստաալիքների հեռարձակումը չի դադարեցրել Ucom-ի ցանցում: