Գյումրու «Շիրակ» օդանավակայանում աերոնավիգացիոն սպասարկումը կիրականացվի 50 տոկոս իջեցված սակագնով

Արմինֆո. Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչությունը հայտնում է, որ ավիաընկերությունների համար Գյումրու «Շիրակ» օդանավակայանի գրավչության բարձրացման և զարգացման նպատակով որոշում է կայացվել օդանավակայանի աերոնավիգացիոն սպասարկումն այսուհետ իրականացնել 50 տոկոս իջեցված սակագնով:

Ինչպես ԱրմԻնֆո գործակալությանը տեղեկացվել է ՔԱԳՎ մամուլի ծառայությունից, որոշումն օդանավակայանի զարգացման ծրագրի շրջանակներում արդեն իսկ իրականացված միջոցառումների տրամաբանական շարունակությունն է, որի նպատակն է զեղչային ամբողջական համակարգի կիրառման արդյունքում խթանել ավիաընկերությունների հետաքրքրությունն այս օդանավակայանի նկատմամբ և օգտագործել վերջինիս ողջ պոտենցիալը՝ նպաստելով նաև Հայաստանի Հանրապետության հյուսիսային հատվածում տնտեսական ակտիվության բարձրացմանը:  

Իջեցված գները գործելու են բոլոր ավիաընկերությունների համար, որոնք թռիչքներ կիրականացնեն Շիրակ օդանավակայանից:

Նշենք, որ «Պոբեդա» լոուքոստերը վերջերս հայտարարեց, որ սկսել է Մոսկվայի «Վնուկովո» օդանավակայանից դեպի Գյումրի նոր միջազգային չվերթի տոմսերի վաճառքը: Մինչև ձմեռային չվացուցակի վերջը նոր չվերթի համար առաջարկվել է առնվազն 10 000 տոմս, 999 ռուբլի նվազագույն սակագնով: Ինչպես հաղորդել են ավիաընկերությունում, ռուսական լոուքոստերի Մոսկվա-Երևան չվերթի տոմսը միջին հաշվով մեկ երրորդով էժան կլինի այդ երթուղով ուղիղ թռիչքներից: «Պոբեդայի ինքնաթիռները դեպի Գյումրի կսկսեն թռչել դեկտեմբերի 15-ից, շաբաթը երեք անգամ` երեքշաբթի, հինգշաբթի և կիրակի օրերին: