Վարչապետը հանձնարարել է առաջարկություններ ներկայացնել ներմուծումը տեղական արտադրությամբ փոխարինելու վերաբերյալ

Արմինֆո. ՀՀ վարչապետ Կարեն Կարապետյանն այսօր կառավարության նիստում հանձնարարել է առաջարկություններ ներկայացնել ներմուծումը տեղական արտադրությամբ փոխարինելու վերաբերյալ:

«Հանձնարարում եմ Տնտեսական զարգացման և ներդրումների, Ֆինանսների, Պաշտպանության, Գյուղատնտեսության, Առողջապահության նախարարներին՝ համատեղ ուսումնասիրել և 20 օրյա ժամկետում առաջարկություն ներկայացնել ներմուծումը տեղական արտադրությամբ փոխարինելու վերաբերյալ՝ ըստ առանձին ապրանքների»,-նշել է գործադիրի ղեկավարը: Վարչապետը հանձնարարել է, մասնավորապես, դիտարկել փոխարինման մեխանիզմների տարբեր հնարավորություններ, այդ թվում ՝ 1. համարժեք փոխարինող ապրանքներ, որոնց արտադրության կազմակերպումը տեղում կարող է լինել շահավետ և մրցունակ ներմուծվողների նկատմամբ: Շուկայական մեխանիզմներով հնարավոր դարձնել և ապահովել այդ ապրանքների նկատմամբ պահանջարկը՝ տեղում արտադրության տեսանկյունից ոչ շահավետ և ներմուծվող ապրանքների պահանջարկի կրճատման հաշվին: 2. ապրանքներ, որոնց արտադրությունը տեղում կազմակերպելը շահավետ է և դրանք մրցունակ են շուկայում, սակայն գոյություն ունեցող նման արտադրությունների կարողությունները սահմանափակ են կամ տեղում նման արտադրություն չի կազմակերպվում: Ընդ որում, այդ ապրանքների արտադրության կազմակերպման կամ արտադրական հզորությունների ավելացման համար կատարվելիք ներդրումները կարելի է հետ գնել միջին ժամկետում:

Ըստ ՀՀ Ազգային վիճակագրական ծառայության նախնական տվյալների, Հայաստանի արտաքին առևտրի շրջանառությունը 2016 թվականի հունվար- հոկտեմբերին կազմել է 1952.3 մլրդ. դրամ ($ 4067 մլն), տարեկան աճը`6.1%: Դրա կառուցվածքում արտահանման ծավալների տարեկան աճը կազմել է 19.8%, մինչև 697.8 մլրդ դրամ ($ 1453.7 մլն), իսկ ներմուծման տարեկան անկումը` 0.3%, մինչև 1254.5 մլրդ. դրամ ($ 2613.3 մլն): Մեկ տարի առաջ, 2015 թվականի հունվար- հոկտեմբերին արտաքին առևտրի շրջանառությունը նվազել էր 20.4%, արտահանման` 2.2% և ներմուծման`26.6% անկման հետևանքով: Համեմատության համար նշենք, որ 2014 թվականի հունվար-հոկտեմբերին Հայաստանի արտաքին առևտրի շրջանառությունն աճել էր 3.6%, քանի որ արտահանումն ավելացել էր 2.9%, իսկ ներմուծումը`3.8%: Հայաստանի առևտրի ոլորտի շրջանառությունը 2016 թվականի հունվար-նոյեմբերին, 2015 թվականի նույն ժամանակահատվածի համեմատ, առաջին անգամ արձանագրել է դրական դինամիկա, հաշվետու ժամանակահատվածում ավելանալով 0.3%, նախորդ տարվա 7.1% անկման փոխարեն, կազմելով 1.9 տրլն. դրամ ($ 4 մլրդ): Միայն նոյեմբերին առևտրի շրջանառությունը կրճատվել է 1.6%, մինչև 190.3 մլրդ. դրամ ($ 397 մլն): Ըստ ՀՀ Ազգային վիճակագրական ծառայության տվյալների, մանրածախ առևտրի շրջանառությունը 2016-ի հունվար-նոյեմբերին կազմել է 1 տրլն.դրամ ($ 2.2 մլրդ), անկումը` 2.9%, նախորդ տարվա անկումը`8.8%: Մանրածախ առևտրի շրջանառության կառուցվածքում հիմնական ծավալներն ապահովել են խանութները (այդ թվում նաև սուպերմարկետները) - 77,1% կամ 825.6 մլրդ դրամ, (տարեկան աճը`2%), և առևտրի մյուս օբյեկտները`12.9% կամ 138 մլրդ դրամ (տարեկան անկումը`24.3%), որոնց հաջորդում են սպառողական շուկաները`6.2% կամ 66 մլրդ.դրամ (տարեկան անկումը`2.5%), կրպակները` 2.3% կամ 22.6 մլրդ.դրամ (տարեկան անկումը`4.4%) և գյուղատնտեսական շուկաները`1.5% կամ 16 մլրդ դրամ (տարեկան անկումը`7.1%):Հայաստանի ընդհանուր առևտրաշրջանառության կառուցվածքում գերակշռում է մանրածախ առևտուրը`55.1%, որին հաջորդում է մեծածախ առեվտուրը` 40.7%, իսկ ավտոմեքենաների առևտուրը կազմել է 4.2%: