Թաթուլ Մանասերյանը պատրաստակամություն է հայտնել «հեշտությամբ» ապահովել բյուջեում ամրագրված ՀՆԱ աճի ցուցանիշը կամ, նույնիսկ, հասցնել երկնիշ ցուցանիշների

Արմինֆո. 2016 թվականի արդյունքում Հայաստանի տնտեսական ակտիվությունը կկազմի 1%-ից պակաս: Լրագրողների հետ իր կանխատեսումները կիսել է տնտեսագիտության դոկտոր, «Այլընտրանք» հետազոտական կենտրոնի ղեկավար Թաթուլ Մանասերյանը: Միևնույն ժամանակ, փորձագետը կարծում է, որ Հայաստանի տնտեսական աճը տարեկան կտրվածքով կարելի է հասցնել մինչև երկնիշ ցուցանիշների:

Տնտեսագետի կարծիքով, չնայած այն հանգամանքին, որ 2016 թվականի պետբյուջեում ՀՆԱ իրական աճի ցուցանիշն ամրագրված է 2,2%, տարվա արդյունքների համաձայն, տնտեսության աճն սպասվում է 1%-ից ցածր, ինչը պայմանավորված է ինչպես ներքին բացասական զարգացումներով, այնպես էլ արտաքին միտումներով` համաշխարհային տնտեսության աճի տեմպերի և հումքի շուկայում գների նվազմամբ:

Միևնույն ժամանակ, փորձագետը հնարավոր է համարում 2017 թվականի բյուջեում ամրագրված տնտեսական աճի 3,2% մակարդակի ապահովումը: «Եթե հաջողվի խթանել արտահանումը, զարգացնել զբոսաշրջությունը և բարձրացնել Հայաստանի ներդրումային գրավչությունը, այսինքն, եթե նախանշված նախագծերը թղթի վրա չմնան, իրատեսական եմ համարում ՀՆԱ համապատասխան աճի ապահովումը բյուջեում եղած ռեսուրսներով», - հայտարարել է Մանասերյանը:

Թաթուլ Մանասերյանին չեն վախեցնում վրաց-ռուսական սահմանի «Վերին Լարս» անցակետի պարբերաբար փակումը, հապճեպ ընդունված Հարկային օրենսգիրքը, որից դժգոհող ձեռներեցների հանրությունն այն համարում է հետընթաց և տնտեսության զարգացմանը չնպաստող փաստաթուղթ: Ավելին, նրա ասելով, միանգամայն իրատեսկան է մեծ արդյունքի հասնելը` ընդհուպ երկնիշ ցուցանիշների արձանագրում: Փորձագետի առաջարկած հիմնական համադարմանն Իրանի հետ համագործակցությունն է: «Ինչու՟ ոչ ոք չի ցանկանում տեսնել Հայաստանի առջև բացվող հեռանկարները: Իրանի նկատմամբ պատժամիջոցների վերացումը Հայաստանի առջև կբացի 70 միլիոնանոց շուկա: Եվ հարցը միայն աշխատանքների ճիշտ կազմակերպումն է, ոչ թե` միջոցների առկայությունը», - հայտարարել է Մանասերյանը: Ինքը` փորձագետը, պատրաստակամություն է հայտնել «հեշտությամբ» ապահովել բյուջեում ամրագրվիած ՀՆԱ աճի ցուցանիշը կամ, նույնիսկ, հասցնել երկնիշ ցուցանիշների:

Հայաստանի ֆինանսների նախարարության տվյալներով, 2016 թվականի արդյունքներով ՀՆԱ իրական աճը սպասվում է 0,5% մակարդակում: Էկոնոմիկայի նախարարությունը կանխատեսում է 0,5-0,6% աճ: Ինչպես դեկտեմբերի 23-ի ամփոփիչ մամուլի ասուլիսում հայտարարել է ֆինանսների նախարար Վարդան Արամյանը, չնայած 2016 թվականի պետբյուջեում ՀՆԱ իրական աճի ցուցանիշը 2,21% է, 4% դեֆլյատոր-ինդեքսի դեպքում տնտեսության աճը կկազմի 0,5%` զրոյական դեֆլյատորով: Ինչպես նշել է Արամյանը, բացասական դեֆլյատորը պայմանավորված է, առաջին հերթին, գյուղատնտեսության ոլորտի զարգացումներով: