Հայաստանը և Իրանը կընդլայնեն համագործակցությունը ապահովագրության ոլորտում

Արմինֆո. ՀՀ տնտեսական զարգացման և ներդրումների նախարար Սուրեն Կարայանը փետրվարի 9-ին ընդունել է Իրանի կենտրոնական ապահովագրության գլխավոր տնօրեն Աբդոլնասեր Հեմաթիի գլխավորած պատվիրակությունը՝ ՀՀ-ի և ԻԻՀ-ի միջև ապահովագրության ոլորտում համագործակցության հարցեր քննարկելու նպատակով:

Ինչպես ԱրմԻնֆո գործակալությանը տեղեկացվել է նախարարության մամուլի ծառայությունից, պատվիրակության կազմում էին նաև իրանական երեք խոշոր ապահովագրական ընկերությունների գործադիր տնօրեններ։

Նախարար Սուրեն Կարայանը ողջունել է հյուրերին և նշել, որ երկու երկրների տնտեսական կապերի զարգացման, առևտրաշրջանառության մեծացման գործում կարող է լուրջ ներգործություն ունենալ ապահովագրական ինստիտուտի զարգացումը և հայ-իրանական ապահովագրական ընկերությունների համագործակցությունը։

Իրանի կենտրոնական ապահովագրության գլխավոր տնօրեն Աբդոլնասեր Հեմաթին նշել է, որ երկու երկրների բարձր մակարդակում գտնվող քաղաքական և տնտեսական կապերը լավ հիմք են զարգացնելու համագործակցությունը ապահովագրության ոլորտում։

Հայաստանի արտահանման ապահովագրական գործակալության գործադիր տնօրեն Վազգեն Աբգարյանը հյուրերին տեղեկացրել է, որ 2015 թվականին գործակալության և Իրանի արտահանման երաշխավորման հիմնադրամի միջև կնքվել է համագործակցության հուշագիր։ Վազգեն Աբգարյանն առաջարկել է խորացնել համագործակցությունը վերաապահովագրության ոլորտում՝ ուղենշելով դեպի Իրան արտահանման վարկի վերաապահովագրության գործարքներների հնարավորությունը։

Իրանական կողմն իր հերթին առաջարկել է կնքել եռակողմ հուշագիր Հայաստանի արտահանման ապահովագրական գործակալության, Իրանի արտահանման երաշխավորման հիմնադրամի և Իրանի կենտրոնական ապահովագրության ծառայության միջև՝ սահմանելու համագործակցության խորացման ուղղությունները։

Իրանի Իսլամական  Հանրապետությունում գործող «Իրան» ապահովագրական ընկերության տնօրենը շնորհակալություն է հայտնել նախարարին հանդիպման և համագործակցության համար և նշել, որ իրանական ընկերություններն իրենց մեծ պատրաստակամությունն են հայտնում բազմաոլորտ համագործակցության համար։ Իրանական կողմի խոսքով՝ կա, օրինակ, զբոսաշրջության ոլորտի ապահովագրության մեծ ներուժ ՝ պայմանավորված երկու երկրներ մուտքի դյուրացմամբ։

Հանդիպման ավարտին պայմանավորվածություն է ձեռք բերվել համագործակցության հստակ նախագիծ մշակել և կազմակերպել Հայաստանի արտահանման ապահովագրական գործակալության ներկայացուցիչների այցը Իրան։

Նշենք, որ ապահովագրության ոլորտում ՀՀ կենտրոնական բանկի և ԻԻՀ կենտրոնական ապահովագրության միջև համագործակցության նմանատիպ հուշագիր կնքվել է նաև 2009 թ.-ին:

 Հիշեցնենք, որ Հայաստանի արտահանման ապահովագրական գործակալությունը տրամադրում է ապահովագրություն ՀՀ ռեզիդենտ արտահանող ընկերությունների կողմից մատակարարված ապրանքի դիմաց օտարերկրյա գնորդի կողմից չվճարման հետևանքով կրած ֆինանսական վնասներից: Ընկերության միակ բաժնետերը հանդիսանում է Հայաստանի Հանրապետությունը:

Ըստ ՀՀ Ազգային վիճակագրական ծառայության տվյալների, ապրանքաշրջանառությունը Հայաստանի և Իրանի միջև 2016 թվականի հունվար-դեկտեմբերին կազմել է $ 238,9 մլն, տարեկան անկումը`14,7%, այդ թվում, արտահանման ծավալը կազմել է $ 74.8 մլն, տարեկան անկումը`8,4%, իսկ ներմուծումը`$ 164.1 մլն. տարեկան անկումը`17.3%: Իսկ 2015 թվականին այս ցուցանիշների անկման տեմպերն ավելի տպավորիչ էին, քանի որ  առևտրի շրջանառությունը Հայաստանի և Իրանի միջև նվազեց 5,2%,մասնավորապես, արտահանման անկումը կազմեց 8.2%, իսկ ներմուծման անկումը`3.9%: -կ-