Աբաշիձե. Աբխազիայի երկաթուղու վերականգնման շուրջ ոչ մի բանակցություն չի վարվում

Արմինֆո. Աբխազիայի երկաթուղու վերականգնման շուրջ ոչ մի բանակցություն չի վարվում: Ըստ iPress-ի, այդ մասին հայտարարել է ռուս-վրացականն հարաբերությունների գծով Վրաստանի վարչապետի հատուկ ներկայացուցիչ Զուրաբ Աբաշիձեն:

Նրա ասելով, Աբխազիայի Ե/ՈՒ վերականգնման հարցն անմիջականորեն առնչվում է Վրաստանի տարածքային ամբողջականության խնդրին: «Ըստ երևույթին, միայն այդ համատեքստում կարելի է դիտարկել այդ հարցը: Սակայն այդ թեմայի շուրջ ոչ մի տեղ ոչ մի բանակցություն չի վարվում», - ասել է նա: Պատասխանելով այն հարցին, թե արդյոք Հայաստանն առաջ չի քաշել Աբխազիայի երկաթուղու վերականգնման թեման, Աբաշիձեն ասել է, թե Վրաստանի կառավարությունն այդ հարցը ոչ մի տեղ չի քննարկում:

Հայաստանի վարչապետ Կարեն Կարապետյանը փետրվարի 24-ին Թբիլիսիում կայացած հանդիպումների արդյունքում հայտարարել է, որ Հայաստանն ու Վրաստանը պայմանավորվել են Վրաստանը Ռուսաստանին կապող Ստեփանծմինդա-Լարս ճանապահի նկատմամբ այլընտրանքային փոխադրամիջանցքի ստեղծման հարիցի շուրջ` հրաժարվելով բացահայտել այդ պայմանավորվածությունների մանրամասները:  

Վրաստանի խորհրդարանական քաղաքական ուժերն այնքան էլ մեծ ուրախությամբ չեն ընդունել Վերին Լարսի նկատմամբ այլընտրանքային հաղորդակցության ուղիներ բացելու հնարավորության մասին տեղեկատվությունը, ինչի մասին հայտարարվել է Հայաստանի վարչապետ Կարեն Կարապետյանի Վրաստան կատարած վերջին այցի ժամանակ: Մասնավորապես, վրացի քաղաքական գործիչները մտավախություն ունեն, որ «այլընտրանքային ուղիներ» ասելով ենթադրվում է աբխազական երկաթուղին: Վրաստանի խորհրդարանական քաղաքական գործիչների կարծիքով, աբխազական ե/ու գործարկումը հակասում է երկրի քաղաքական շահերին:

Հիշեցնենք, որ «Վերին Լարս» անցակետը, որով նախորդ դարի 90-ական թվականներից անցնում է Հայաստանի և Ռուսաստանի միջև միակ ցամաքային Ռազմավիրական ճանապարհը, ձմռան շրջանում պարբերաբար փակվում էձյան առատ տեղումների, իսկ գարնանը` սելավների պատճառով: Հաշվի առնելով բանակցությունները Ռուսաստանի Դաշնության գործընկերների հետ և Ստեփանծմինդա-Լարս ավտոմոբիլային ճանապարհահատվածում եղանակային պայմաններով պայմանավորված թողունակության սահմանափակումները՝ վարչապետ Կարեն Կարապետյանը հունվարի 26-ին  կառավարության նիստում ՀՀ տրանսպորտի, կապի և տեղեկատվական տեխնոլոգիաների նախարարին հանձնարարել էր ռուսական և վրացական կողմերի հետ քննարկել և մինչև մարտի 1-ը  կառավարության աշխատակազմ ներկայացնել առաջարկություններ այլընտրանքային երթուղիներով տրանսպորտային փոխադրումների կազմակերպման  վերաբերյալ:   Որպես այլընտրանք, որը պահանջում է տարածաշրջանի երկրների քաղաքական որոշում, կարող են ծառայել Հարավային  Օսիայով և Աբխազիայով Վրաստանը Ռուսաստանին կապող ճանապարհները:

Հիշեցնենք, որ 2013-ի հունվարին Վրաստանի վարչապետ Բիձինա Իվանիշվիլին հնարավոր էր համարել ռուս-հայկական երկաթուղու վերաբացումը, որն անցնում է Աբխազիայի տարածքով: Այն ժամանակ Բիձինա Իվանիշվիլին հայտարարել էր, որ բոլոր կողմերի համաձայնության դեպքում հնարավոր կլինի վերաբացել երկաթուղին: Բրիտանական International Alert ոչ կառավարական կազմակերպության հետազոտությունների համաձայն,  1991 թվականից ի  վեր չգործող Երևան-Թբիլիսի-Սուխում-Սոչի երկաթուղու վերակառուցումը կարժենա  277,5 մլն դոլար, որը կհաջողվի վերադարձնել 100 տարուց ոչ շուտ: 251 մլն դոլար պահանջվում է Փսոու-Ինգուր 190 կմ աբխազական հատվածի  վերականգնման համար: Իսկ Զուգդիդից Թբիլիսի և այնուհետև մինչև Երևան երկաթուղին աշխատում է: Ուշագրավ է, որ  աբխազ փորձագետների պաշտոնական եզրակացությունների համաձայն, այդ գումարը կազմում է 350-400 մլն դոլար, մինչդեռ նրանց վրացի գործընկերները կարծում են, որ դրա համար կպահանջվի 73 մլն դոլարից ոչ ավելի: