Տնտեսագետ. Հայաստանի տնտեսական անվտանգությունը գտնվում է ընդունված պայմանական շեմից ցածր

Արմինֆո. Հայաստանի տնտեսությունը հայտնվել է փակ ցիկլում, քանի որ տասնյակների ընթացքում իրականացված բարեփոխումները ցանկալի արդյունքներ չտվեցին: Այս մասին մարտի 13-ին Երևանում լրագրողներին հայտարարել է ՀՊՏՀ տնտեսագիտության տեսության ամբիոնի դոցենտ, տնտեսագիտության թեկնածու Ատոմ Մարգարյանը:

Նրա խոսքով, չնայած երկրի բոլոր ոլորտներում իրականացված գովազդային քարոզչությանը, ինչը պետք է Հայաստանին տաներ այնպիսի նախկին սոցիալիստական երկրների զարգացման ճանապարհով, ինչպիսիք են` Բուլղարիան, Ռումինիան, Հունգարիան, Չեխիան, Բալթյան պետությունները, սակայն, երկիրը հայտնվեց փակուղում: «Հայաստանի բազմաթիվ քաղաքական գործիչների հավաստումները, որ այսօր երկիրը պատրաստ է միանալ ԵՄ-ին, դառնալով այդ Միության լիիրավ անդամը, ըստ էության, կարելի է անվանել ֆանտաստիկ հերյուրանք».-հայտարարել է Մարգարյանը: Ողջ պրոբլեմը, նրա խոսքով, գտնվում է Հայաստանում տիրող սոցիալ-տնտեսական իրավիճակում, իսկ ավելի ճիշտ`դրա ցուցանիշներում: «Իր հիմնական մակրոտնտեսական ցուցանիշներով Հայաստանը բավականին հեռու է տնտեսական անվտանգության նույնիսկ նվազագույն շեմից»,-հայտարարել է նա:

Մարգարյանի գնահատմամբ, երկրի տնտեսական պատկերը ոչ միայն թույլ չի տալիս խոսել նրա տնտեսական անվտանգության, այլ նույնիսկ տեսանելի ապագայում երկնիշ աճի հեռանկարի մասին: «Երկրի տնտեսական անվտանգության ընդունված ցուցանիշներից է ներդրումների գծով ներգրավվող արտաքին ֆինանսական ռեսուրսների 25% մակարդակը ՀՆԱ-ի նկատմամբ: Իսկ մեր պարագայում այդ ցուցանիշը ցածր է 10%-ի շեմից, նախորդ տարվա`92 մլն.դոլարի ՕՈւՆ-ի ցուցանիշի համեմատ»,-նշել է փորձագետը: Աղքատության մակարդակով երկիրն իրավունք չունի ցուցադրել 7%-ից բարձր ծավալներ, բայց Հայաստանում, միայն պաշտոնական վիճակագրությամբ, այդ թիվը գերազանցում է 30%-ի շեմը: Գործազրկության մակարդակը, կրկին պաշտոնական տվյալներով, հասել է 17%-ի, բայց իրականում այն երկու անգամ գերազանցում է այդ ցուցանիշը: Սակայն, տնտեսագիտության տեսությամբ Հայաստանի նման երկրի համար նորմալ կամ բնական է համարվում այն ցուցանիշը, որը չի գերազանցում 7%-ի շեմը, նշել է փորձագետը: Անմխիթար վիճակ է տիրում նաև ՀՀ արտաքիյն պարտքի առումով: «Արտաքին պարտքի և ՀՆԱ հարաբերակցությունը հասնում է կրիտիկական թվին`60%-ին: Իսկ 25%-ի շեմը գերազանցելիս տնտեսական բարձր աճի մասին խոսելը ոչ միայն անիրատեսական է, այլ նաև մանագիտական անգրագիտություն»,-նշել է տնտեսագետը: Այդ ֆոնին, այսօր կտրվել է ներդրումների թելը – աշխատատեղերը - բարեկեցության մակարդակը: Երկրի բնակչության մեկ շնչին ընկնող ՀՆԱ-ն կազմում է 3600 դոլար, իսկ եվրոպական ընտանիքին Հայաստանի խոստումնալից ինտեգրման համար պահանջվում է երկրի քաղաքացիներին ապահովել առնվազն 12 հազար դոլարի տարեկան եկամուտ: Այսպիսով, տվյալ փուլում, ըստ փորձագետի, Հայաստանի տնտեսական անվտանգությունն ավելի քան տասնյակ ցուցանիշներով գտնվում է ընդունված պայմանական նվազագույն շեմից ցածր: