Ամերիաբանկը մանրածախ բիզնեսի գծով գտնվում է առաջատարների եռյակում

Արմինֆո. Ամերիաբանկը մանրածախ բիզնեսի գծով 2016 թվականի արդյունքներով զբաղեցրել է երրորդ հորիզոնականը: Ինչպես մարտի 21-ին կայացած մամուլի ասուլիսում նշել է Բանկի Մանրածախ գործառնությունների գծով տնօրեն Արման Բարսեղյանը, մի քանի տարի առաջ, 2012 թվականին Ամերիաբանկը 8-րդ տեղում էր:

Նա տեղեկացրել է, որ հաշվետու տարում մանրածախ վարկավորման պորտֆելը հաջողվել է ավելացնել 28.5%, մինչև 57.2 մլրդ.դրամ: «Այդ առումով կարող եմ հայտարարել, որ Ամերիաբանկը լուծել է ի ռազմավարական զարգացման ծրագրով նախատեսված խնդիրները, որտեղ մանրածախ վարկավորումը նշված է որպես առաջնահերթ ուղղություն»,-ընդգծել է նա:

Մասնավորապես, Ա.Բարսեղյանը նշել է, որ Ամերիաբանկն առաջատարների եռյակում է նաև իր 13 մասնաճյուղերով, իսկ մասնաճյուղերի թվով առաջատարն ունի 60 մասնաճյուղ: Նրա կարծիքով, ձեռքբերումները մանրածախ բիզնեսում կապված են Բանկի արդյունավետ գործունեության հետ: «Այսինքն, արդյունավետության առումով մենք առաջատարն ենք, իսկ մասնաճյուղերի տարածաշրջանային ցանցով Ամերիաբանկը զիջում է, բայց դա կապված է մեր ռազմավարության հետ»,-նկատել է նա, հաղորդելով, որ այս տարի նախատեսվում է 2 նոր մասնաճյուղերի բացում:

Միևնույն ժամանակ, ըստ Բարսեղյանի, Հայաստանի բանկային համակարգոմ առաջին անգամ Ամերիաբանկին հաջողվել է արձանագրել վարկավորման աննախադեպ ծավալ, որը 2017 թվականի հունվարի 1-ին կազմել է ավելի քան 1 մլրդ.դոլար: «2016 թվականի արդյունքներով Ամերիաբանկը Հայաստանի բանկային համակարգի առաջատարն է բոլոր հիմնական ցուցանիշներով` ակտիվներով, պարտավորություններով, վարկային պորտֆելով, ավանդների ծավալներով, շահույթով և կապիտալի չափերով, ինչը շատ լավ հիմք է IPO-ի միջազգային շուկա դուրս գալու համար»,-բացատրել է նա:

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, 2016 թվականին Ամերիաբանկի ակտիվներն աճել են 39.2%  մինչև 718.3 մլրդ դրամ կամ $ 1.5 մլրդ, վարկային պորտֆելի 61.4% աճի և պետական պարտատոմսերում կատարված 44.2% ներդրումների հաշվին: Արդյունքում, բանկի վարկավորման ծավալը հասավ 511.6 մլրդ դրամի կամ $ 1.1 մլրդ-ի, իսկ ներդրումները պետական ​​պարտատոմսերում հասան 47.5 մլրդ դրամի կամ $ 98.1 մլն-ի, ընդհանուր կապիտալն աճեց 8.6%, մինչև 64.4 մլրդ դրամ, կամ $ 133,1 մլն, հիմնականում կուտակված շահույթի 23.4% աճի, մինչև 24.3 մլրդ դրամ կամ $ 50.1 մլն: 2016 թվականն Ամերիաբանկը եզրափակել է 6,2 մլրդ դրամ կամ $ 12.8 մլն. զուտ շահույթով, աճը`29.2%: Ամերիաբանկի նորմատիվային ընդհանուր կապիտալը հասել է 81.9 մլրդ դրամի, ինչը գրեթե 3 անգամ գերազանցում է պահանջվող նվազագույն նորմատիվը (30 մլրդ դրամ): Կապիտալի համարժեքության նորմատիվը 2016 թվականի արդյունքներով կազմել է 15.87% (պահանջվող նորմատիվը`12%), իսկ ընդհանուր իրացվելիությունը`31,23% (պահանջվողը`15%), ընթացիկ իրացվելիությունը`133,17% (պահանջվողը`60 %), նախորդ տարվա, համապատասխանաբար, 15.07%, 29.91% և 151.26% փոխարեն:

Նշենք, որ «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: Բանկը հայաստանյան շուկայում գործում է 1996 թվականի հոկտեմբերի 31-ից: Ամերիաբանկն ունի 12 մասնաճյուղ, որից 8 գտնվում է մայրաքաղաքում, իսկ 4-ը`Հայաստանի մարզերում: 2017 թվականից Բանկի բաժնետերերն են` Ameria Group CY ՍՊԸ – 65.8%, ՎԶԵԲ - 20,7%, ESPS Holding Limited - 13,5%: