Կարեն Կարապետյան. Հայաստանը հավակնում է կամուրջ դառնալ ԵԱՏՄ ակումբի և մյուս տնտեսական բլոկների միջև

Արմինֆո. Հայաստանը ձգտում է կամրջի դեր կատարել ԵԱՏՄ ակումբի և այլ տնտեսական բլոկների, օրինակ, Եվրամիության անդամների, ԵՄ հետ ասոցացման համաձայնագիր ստորագրած երկրների, ինչպես նաև Իրանի և Մերձավոր Արևելքի երկրների միջև: Այդ մասին հայտարարել է վարչապետ Կարեն Կարապետյանը «Իզվեստիա» թերթում հրապարակված հարցազրույցում` գնահատելով Հայաստանի անդամակցումը ԵԱՏՄ-ին, ռուս-հայկական համագործակցության հեռանկարներն  ու ԵՄ հետ ասոցացման չգնալու պատճառները:

Վարչապետի ասելով, անդամակցելով ԵԱՏՄ-ին,  երեք միլիոն ազգաբնակչությամբ երկիրը դաձավ մոտ 183 միլիոն բնակչությամբ շուկա ունեցող «ակումբի» անդամ: «ԵԱՏՄ տրամաբանությունը մեզ համար միանգամայն պրագմատիկ է, մենք դառնում ենք հնգյակ, որին միավորում է հսկայական շուկան: Հայաստանն ունի բոլոր հնարավորությունները հաջողակ լինելու դրանում,  և ես չեմ տեսնում այդպիսին չլինելու որևէ պատճառ», - հայտարարել է վարչապետը:

Ինչպես կարծում է Հայաստանի կառավարության ղեկավարը, ԵԱՏՄ անդամությունը Հայաստանի համար հնարավորություններ է ստեղծում: «Մեր պատրաստի արտադրանքի մեծ մասը արտահանում ենք ԵԱՏՄ շուկաներ, ինչի առնչությամբ հարկ է նշել, որ վիճակագրական տվյալների համաձայն, նախորդ տարիների ցուցանիշների համեմատ Հայաստանի ՀՆԱ  աճել է` այդ միությանը միանալուց հետո», - նշել է նա: «Վստահ եմ, որ մենք ԵԱՏՄ-ի առաջարկած ներուժն ամբողջությամբ չենք օգտագործում, և Հայաստանը մտադիր է արդյունավետ աշխատել այդ ուղղությամբ: Մենք կարծում ենք, որ ինչքան շատ ընդլայնենք ԵԱՏՄ հնարավորությունները և առավելությունները, այնքան լավ կլինի թե Հայաստանի և թե մյուս անդամ երկրների համար», - նշել է նա:

Վարչապետի ասելով, վերջին ժամանակներում Հայաստանի գյուղմթերքի արտահանման ցուցանիշն աճել է վեց անգամ: Որակյալ ապրանքներ տրամադրելու համար Հայաստանն սկսել է  ակտիվորեն կիրառել սննդի անվտանգության  հետազոտության և վերահսկողության եղանակներ, որոնք ընդունված են ԵԱՏՄ տարածքում, և այժմ աշխատանք է տարվում մեր վերլուծական բազայի և լաբորատոր սարքավորումների ուժեղացման վրա: Այդ ֆոնին, ինչպես ընդգծել է վարչապետը, 2016 թվականի արդյունքների համաձայն, Հայաստանի և Ռուսաստանի միջև ապրանքաշրջանառությունը աճել է 6%-ով: Ռուս-հայկական համագործակցությունն ընդգրկում է առևտրատնտեսական, էներգետիկ, տրանսպորտային, հումանիտար ոլորտները, ինչպես նաև համատեղ ներդրումային նախագծերի իրականացումը: Հայաստանը նաև ունի առաջարկ տեղեկատվական տեխնոլոգիաների և ոսկերչության ոլորտներում:

Պատասխանելով այն հարցին, թե ինչու Հայաստանը, որ ուներ ԵՄ հետ ասոցացման առաջարկ,  ընտրություն կատարեց հօգուտ ԵԱՏՄ-ի, և արդյոք դա ճիշտ ընտրություն էր, Կարապետյանը հայտարարել է, թե բիզնեսի զարգացման տեսանկյունից Հայաստանի համար գրավիչ հանգամանքն, առաջին հերթին, խոշոր և հասկանալի շուկան է: «Ինչ վերաբերում է ԵՄ-ին, ապա կարելի է նշել, որ ԵՄ-ն Հայաստանի խոշոր դոնորներից և ներդրողներից մեկն է, և ԵԱՏՄ անդամների հետ գործընկերության խորացմամբ մենք չենք դադարեցնում ԵՄ հետ համագործակցությունը: Մենք ԵՄ հետ համագործակցելու, ներդրումների և երկխոսության սահմանափակումներ չունենք: Այս պահին մենք բաց և թափանցիկ երկխոսություն ենք վարում մեր եվրոպական գործընկերների հետ: Մենք մեզ ընկալում ենք որպես այս երկու շուկաները մոտեցնող, այլ ոչ` հեռացնող», - նշել է վարչապետը:

Անդրադառնալով  հայ-ռուսական հարաբերությունների ապագային առնչվող հարցին` ՀՀ վարչապետը նշել է, որ Ռուսաստանը համարվում է Հայաստանի կարևորագույն գործընկեր և խոշորագույն ներդրող երկիր: «Չնայած մեր հարաբերությունների մակարդակը բավականաչափ բարձր է, այնուամենայնիվ, համատեղ ներուժը շատ ավելի մեծ է, և մենք նախատեսում ենք մի շարք ուղղություններ, որոնք կարող են դիվերսիֆիկացնել և ընդլայնել մեր համագործակցության ոլորտները», - ասել է Կարեն Կարապետյանը: «Մենք շահագրգռված ենք, որպեսզի մեր ռուս գործընկերները գտնեն նոր առիթներ և ծրագրեր` ներդրումներ իրականացնելու համար: Հայաստանը բաց է ներդրումների համար: Ներդրողներին մենք առաջարկելու շատ բան ունենք, և կստեղծենք բոլոր պայմանները, որ նրանք կարողանան զբաղվել արդյունավետ բիզնեսով, գումար վաստակել, ստեղծել նոր աշխատատեղեր և մուծել հարկեր», - հայտարարել է նա: Վարչապետի կարծիքով, Հայաստանի և Ռուսաստանի  քաղաքացիների առանց վիզայի փոխադարձ այցելությունների մասին համաձայնագիրը, ներառյալ  փետրվարին ուժի մեջ մտած կանոնակարգը, որով ՌԴ քաղաքացիները կարող են Հայաստան այցելել ներքին անձնագրերով, մեծապես կխթանեն մշակութային, հումանիտար  հարաբերությունների և զբոսաշրջության զարգացումը: «Կարծում եմ, Հայաստանը գնահատված չէ որպես զբոսաշրջային երկիր Ռուսաստանի քաղաքացիների համար, և այս տարի մենք մտադիր ենք իրականացնել դրական առաջընթացին նպատաակուղղված սկզբունքային փոփոխություններ», - ասել է նա:

Բացի այդ, ինչպես հաղորդել է կառավարության ղեկավարը,  քննարկվում են գյուղտեխնիկայի մատակարարման սխեմաներ,  ռուսական կապիտալի մասնակցությամբ  ազատ տնտեսական գոտիների ստեղծումը, համագործակցությունն էներգետիկ ոլորտում, ինչպես նաև «Ռուսգեոլոգիայի» մասնակցությունը Հայաստանի երկրաբանական հետախուզական ծրագրերին: