Հայկական ընկերությունը հավակնում է զբաղեցնել ռուսաստանյան Ռոկֆոր պանրի շուկայի 10 տոկոսը

Արմինֆո. «Սպայկա» գյուղատնտեսական հոլդինգը 2017 թվականին մտադիր է կազմակերպել «Ռոկֆոր» պանրի իր սեփական արտադրությունը: Ինչպես ապրիլի 19-ին լրագրողներին հայտնել է ընկերության նախագծերի կառավարման բաժնի ղեկավար Կարեն Բաղդասարյանը, ներդրումները պանրի բիզնեսում 2017-ին կկազմեն ավելի քան 15 մլն.դոլար:

Ռուսաստանի պանրի շուկան ուսումնասիրելուց հետո ընկերությունն այնտեղ տեսել է մեծ ներուժ: «Այս փուլում արդեն արտահանման պայմանագրեր են տարեկան ավելի քան 1000 տոննա պանրի մատակարարման ուղղությամբ», - ասել է Բաղդասարյանը:

Ընկերությունը կգործի Կոտայքի մարզում, գերմանական տեխնոլոգիաների հիման վրա տարեկան արտադրելով 1200 տոննա կաթնամթերք, ունենալով նաև 1500 գլխաքանակից բաղկացած անասնաբուծական ֆերմա: Շինարարական աշխատանքները կմեկնարկեն մեկ ամսից և կավարտվեն նոյեմբերի վերջին: 2018-ի հունվարին կարտադրվի պանրի առաջին խմբաքանակը, ապահովելով 1 հազար տոննա ծավալ: Ըստ Կարեն Բաղդասարյանի,  ընկերությունը հավակնում է զբաղեցնել ռուսաստանյան Ռոկֆոր պանրի շուկայի 10%:

Ընկերության ներկայացուցիչն ԱրմԻնֆո գործակալության հետ զրույցում հայտարարել է, որ «Սպայկան» օգտվում է նաև Ռուսատսնաի նկատմամբ սահմանված պատժամիջոցների իրավիճակից, միաժամանակ հավելելով, որ իրենց ապրանքն ունի բարձր որակ: «Ամեն դեպքում, նույնիսկ պատժամիջոցների վերացումից հետո էլ մենք մեր որակով և համեմատաբար ցածր գներով կլինենք շահեկան դիրքում», - ասել է Կարեն Բաղդասարյանը:

Նշենք, որ «Սպայկա» ընկերությունն իր գործունեությունն սկսել է 2001 թվականին, որպես միջազգային բեռնափոխադրող: Մինչև 2010 թվականն ընկերությունը տարածաշրջանային մակարդակով առաջատար դիրքեր էր զբաղեցնում բեռնափոխադրումների ծառայությունների ոլորտում: Ընկերության տրանսպորտային պարկը 200 տրանսպորտային միջոցներից:

Հիշեցնենք, որ 2016 թվականի հայ պանրագործների համար դարձավ կայացման տարի: Դեկտեմբերի 16-ին Երևանում կայացած մամուլի ասուլիսում այս մասին հայտարարել է Հայաստանի Պանրագործների միության նախագահ Արմեն Գիգոյանը: Նրա խոսքով, ընկերությունների կայացմանը նպաստեց հայ պանրագործների արտադրանքի արտահանման աճը դեպի Ռուսաստան, որն ընթացիկ տարում ակնկալվում է, որ կկազմի մոտ 4 հազար տոննա, նախորդ տարվա 1500 տոննայի համեմատ: Բայց նա ընդգծել է, որ այդ աճն արձանագրվել է ոչ թե ԵԱՏՄ-ին Հայաստանի միանալու, այլ Ռուսատանի նկատմամբ կիրառված պատժամիջոցների հետևանքով: Ընդ որում, ինչպես նշել է փորձագետը, ներքին շուկայում աճ չի արձանագրվել, ինչն առաջին հերթին կապված է ռուսական ռուբլու արժեզրկման և բնակչության գնողունակության նվազման հետ: Ներքին շուկայում արտադրվել է ընդամենը 19 հազար տոննա պանիր, որից 15 հազարը վաճառվել է հանրապետությունում: Ավելին, նկատվում է ներքին սպառման 3% անկում: Բայց արտահանման ծավալների աճը փոխհատուցեց ներքին շուկայի կորուստները: Ի դեպ, արտահանումներով զբազվել են միայն 5-6 ընկերություններ, իսկ պանիր արտադրողները եղել են մոտ 100 սուբյեկտներ: Գիգոյանը նշել է նաև, որ հանրապետությունում արտադրվում է 18 անուն պանրային արտադրանք, բայց միայն «Լոռի» և «Չանախ» պանիրներն են հայտնի սպառողներին: Ընթացիկ տարում հանարապետության որոշ ընկերություններում կիրառվեցին պանրի արտադրության եվրոպական տեխնոլոգիաներ, այդ թվում նաև`«Ռոկֆոր»: 

2017 թվականին ակնկալվում է շվեցարական և հոլանդական պանիրների արտադրություն: Իսկ պանրագործների պրոբլեմների շարքում փորձագետը նշել է կաթի փոշու արժեքը: Մի քանի տարի առաջ համաշխարհային շուկայում այն կազմում էր 630 դոլար մեկ տոննայի դիմաց, իսկ այսօր այն հասել է 2300 դոլարի: Կարևոր պրոբլեմ է նաև հասանելիությունւ ֆինանսական միջոցներին: Նա հույս է հայտնել, որ ՀԲ և ՎԶԵԲ միջոցներով որոշ ծրագրերի կֆինանսավորվեն: Փորձագետն ափսոսանքով է նշել նաև, որ Տիգրան Սարգսյանի վարչապետության օրոք մշակված «Հայկական պանիր» ծրագիրը չիրականացավ, քանի որ երբ գործը հասավ ֆինանսավորմանը, պետության կողմից փոխվեցին խաղի կանոնները, որից հետո ամեն ինչ կանգնեց, նշել է նա:

Հիշեցնենք, որ 2010 թվականի սեպտեմբերին ՀՀ կառավարությունը 7,2 մլն դրամ հատկացրեց Հայկական զարգացման գործակալությանը «Հայկական պանիր» ՓԲԸ-ին ֆինանսական աջակցություն ցուցաբերելու նպատակով: «Հայկական պանիր» ընկերությունը գրանցվել է 2009 թ. և հանդիսանում է 50/ 50% պետական մասնակցությամբ մասնավոր ընկերություն, ի դեմս Զարգացման հայկական գործակալության և Պանրագործների ասոցիացիայի: Նորաստեղծ ընկերության նպատակն էր ձևավորել մեխանիզմներ ու մարկետինգային ծրագրեր, որոնք կխթանեն հայկական պանրի արտահանումը` պետության աջակցությամբ: