Սաֆարյան. Կոնգոյի շուկան կարող է հետաքրքիր լինել հայկական ապրանք արտադրողների համար

Արմինֆո. Կոնգոյի շուկան կարող է հետաքրքիր լինել հայկական ապրանք արտադրողների համար: Այս մասին մայիսի 17-ին հայ-բելգիական բիզնես-համաժողովի շրջանակներում լրագրողներին հայտնել է հայ-բելգիական առևտրի պալատի նախագահ Վալերի Սաֆարյանը:

ՆՐա խոսքով, Կոնգոն իր տարածքով Աֆրիկայի ամենամեծ երկիրն է, իսկ բնակչությամբ`չորրորդը (մոտ 85 մլն.): «Հանրապետությունը կարիք ունի բարձր հավելյալ արժեքով ապրանքների, այդ թվում նաև դեղագործական ապրանքների: Հետևաբար, հայկական դեղամիջոցները կարող են մեծ պահանջարկ ունենալ Կոնգոյի շուկայում: Հանրապետությունը հանդիսանում է ալմաստի խոշոր արտահանողներից մեկը, հետևաբար, կարող են այդ ոլորտի հայկական ընկերությունների հետ հաստատվել հեռանկարային կապեր»,-ասել է Սաֆարյանը: Նա հավելել է, որ հայկական ապրանքները կարող են լիակատար հաջողությամբ իրացվել Կոնգայի շուկաներում:

Նա նաև ընդգծել է, որ իր ղեկավարած կառույցի նպատակը հայ-բելգիական համագործակցության ակտիվացումն է ձեռներեցության ոլորտում, ինչպես նաև ձեռնարկատերերի ներդրումային մտադրությունների իրականացման խթանումը:

Նշենք, որ հայ-բելգիական առևտրա-արդյունաբերական պալատը գործում է արդեն 12 տարի: Հանդիպումներն անցկացվում են առնվազն տարին մեկ անգամ: Երևանյան հանդիպումը տարբերվեց նրանով, որ առաջին անգամ հանդիպմանը մասնակցցին նաև Կոնգոյի գործարարները: