Փորձագետ. Այսօր Հայաստանում չկան ծրագրեր, որոնք կարող են երաշխավորել տնտեսական 5% աճի ապահովում

Արմինֆո. Այսօր Հայաստանում չկան ծրագրեր, որոնք կարող են երաշխավորել տնտեսական 5% աճի ապահովում: Մայիսի 24-ին կայացած մամուլի ասուլիսում նման կարծիք է հայտնել տնտեսագետ, ՀՀ ԿԲ նախկին նախագահ Բագրատ Ասատրյանը, անդրադառնալով տարեկան 5% տնտեսական միջին  աճի ապահովման մասին նախագահի հայտարարությանը:

«Առաջինը, 5% աճը բավարար չէ երկրի ներսում գոյություն ունեցող պրոբլեմները լուծելու համար: Դա մեր ձգտումների գագաթնակետը չէ: Արդյո՞ք իրատեսական է այդ սանդղակին հասնելը: Կարծում եմ, որ դա պետք է երաշխավորված լինի իրականացվող ծրագրերով, որոնք այսօր Հայաստանում չկան: Հնարավոր է, որ երբ Ռուսաստանում իրավիճակը բարելավվի, ապա տրանսֆերտների աճի հաշվին այդ ցուցանիշին հասնելը կարող է  դառնալ իրատեսական»,-պարզաբանել է նա:

Պատասխանելով ԱրմԻնֆո գործակալության հարցին, թե որքանով են իրատեսական այսօր հրապարակված` առաջին 4 ամիսների տնտեսական ակտիվության ցուցանիշները, Բ.Ասատրյանը նշել է. «Հավատացեք, 5.7% աճ ապահովելու համար շատ բան անել պետք չէ»: Նա նաև ընդգծել է, որ անցյալ տարվա նույն ժամանակահատվածում աճի տեմպերն ավելի բարձր էին, պայմանավորելով դա «վիճակագիրների գեղարվեստական վարպետությամբ», քան`իրական տնտեսական գործոններով: Որպես այս տարվա հունվար-ապրիլ ամիսների աճի հիմնական դրայվերներ փորձագետը նշել է արդյունաբերական հատվածը, էներգահամալիրը, ծառայությունների ոլորտը և առևտուրը: Սակայն, առևտրի առումով Բ.Ասատրյանն ընդգծել է, որ այդ ոլորտում դրական դինամիկա հաջողվել է ապահովել միայն ներմուծման աճի շնորհիվ, ինչն, իր հերթին, հնարավոր դարձավ տրանսֆերտների աճի հաշվին, որոնք, նրա նախնական գնահատականներով, աճել են մոտ 10%: «Այսինքն, Հայաստանի տնտեսությունում որևէ որակակական զարգացումների մասին խոսելն անիմաստ է»,-նշել է Բ.Ասատրյանը:

Ըստ ՀՀ Ազգային վիճակագրական ծառայության նախնական տվյալների,  տնտեսական ակտիվությունը Հայաստանում 2017 թվականի հունվար-ապրիլին աճել է 5,7%, այդ թվում, արտահանումն աճել է 16,1%, իսկ ներմուծումը` 14.6%: Տնտեսական ակտիվության աճը հաշվետու ժամանակահատվածում հիմնականում ապահովել են` արդյունաբերական ոլորտը`12,9%, առևտրի ոլորտը`12.1%, ծառայությունների ոլորտը`10,1%, էներգետիկ համալիրը`4 4%: Իսկ ծավալների տարեկան անկում են արձանագրել` գյուղատնտեսության ոլորտը`2,9%, շինարարության ոլորտը` 13.4%: Մեկ տարի առաջ, 2016-ի հունվար-ապրիլին այդ աճ էին ապահովել արդյունաբերական ոլորտը`10%, ծառայությունների ոլորտը`9.3%, գյուղատնտեսությունը`4.1% և էներգետիկ համալիրը`3.5%, իսկ առևտրի և շինարարական ոլորտներում համապատասխանաբար արձանագրվել էր 0.8% և 7.4% տարեկան անկում:

Նշենք, որ Հայաստանի 2017 թվականի պետբյուջեով ՀՆԱ աճը նախատեսված է 3.2%: ՀՀ ԿԲ նորացված կանխատեսմամբ Հայաստանի ՀՆԱ-ի աճը 2017-ին կկազմի 3,2-4,4%: Համաշխարհային բանկը կանխատեսում է ՀՆԱ-ի 2.7% աճ, ԱՄՀ` 2,9%, Fitch-ը`2.1%, ԵԱԶԲ-ն` 2.9%, իսկ Ասիական զարգացման բանկը`2,2%:

Ըստ ՀՀ ԿԲ տվյալների, դեպի Հայաստան մասնավոր տրանսֆերտների ներհոսքը 2016 թվականին կրճատվել է 6,1%, մինչև $ 1.5 մլրդ, իսկ արտահոսքն աճել է 7,4%, մինչև $ 817 մլն, ինչի արդյունքում տրանսֆերտների զուտ ներհոսքը նվազել է 17.8%: Մասնավորապես, տրանսֆերտների ներհոսքը Ռուսատանից Հայաստան կրճատվել է 11.1%, մինչև $ 896,9 մլն, իսկ արտահոսքն աճել է 16.5%, մինչև $ 333,4 մլն, ձևավորելով Ռուսաստանից կատարվող դրամական փոխանցումների զուտ ներհոսքը`$ 563,5 մլն, տարեկան անկումը` 22%: Տրանսֆերտների ներհոսքի և արտահոսքի ծավալներում 2016 թվականի արդյունքներով գերիշխում է Ռուսաստանը`58.5% և 40.8%, նախորդ տարվա` 61.8% և 37.6% ծավալների փոխարեն: