Moodys-ն «Անելիք Բանկին» շնորհել է «B2» վարկանիշ՝ կայուն հեռանկարով

Արմինֆո. Միջազգային Moody's Investors Service գործակալությունը «Անելիք Բանկին» շնորհել է «Երկարաժամկետ տեղական եւ արտարժութային ավանդների» B2 վարկանիշ՝ կայուն հեռանկարով: Ինչպես ԱրմԻնֆո-ին հաղորդեցին բանկի մամուլի ծառայությունից, տվյալ վարկանիշը շնորհվել է հաշվի առնելով Բանկի բավականին բարձր կապիտալի համարժեքությունը, շահութաբերության էական ավելացումը, ակտիվների բարձր որակը, ինչպես նաև իրացվելիության մակարդակը:

Ըստ Moody’s ընկերության սպասումների` առաջիկա 12-18 ամիսների ընթացքում Անելիք Բանկի շահութաբերության մակարդակը զգալի կբարձրանա։ «Անելիք Բանկին միջազգային վարկանիշի շնորհումը մեզ համար շատ կարեւոր իրադարձություն է:

Վստահ եմ, որ Moody’s-ի վարկանիշը կնպաստի Հայաստանում ու արտասահմանում մեր հին ու նոր գործընկերների հետ հարաբերությունների զարգացմանը, Հայաստանում օտարերկրյա ներդրողների հետ գործընկերական հարաբերությունների ընդլայնմանը», - ասել է «Անելիք Բանկ» ՓԲԸ վարչության նախագահ Ներսես Կարամանուկյանը:

Moody’s-ը փաստում է, որ 2016 թվականին «Անելիք Բանկի» նորմատիվային ընդհանուր կապիտալն աճել է 165% -ով, մինչև 35.5 մլրդ` 2011 թվականի 13.4 մլրդ-ից` գերազանցելով 2017 թ.-ից պահանջվող կապիտալի նորմատիվային նվազագույն շեմը (30 մլրդ դրամ): Այս ցուցանիշի 21,8 մլրդ-ով ($ 45 մլն) աճն  ապահովվել է նոր բաժնետիրոջ մուտքի շնորհիվ` ի դեմս FISTOCO LTD, որի մասնաբաժինը կազմել է 59.68%: 2016 թիվն «Անելիք Բանկը» ավարտել է 1,2 մլրդ դրամ զուտ շահույթով, 2015 թ.  215 մլն-ի դիմաց, որը ձեւավորվել է ակտիվների չափավոր շահութաբերություն` 0.6%: Moody's- ի ակնկալիքների համաձայն, այդ ցուցանիշն զգալիորեն կբարելավվի առաջիկա 12-18 ամիսների ընթացքում, ինչը պայմանավորված կլինի վարկավորման ծավալների եւ տոկոսային մարժայի ավելացմամբ` տոկոսադրույքների նվազման հետևանքով:  Moody's- ը նաեւ ակնկալում է, որ որակը Բանկի ակտիվների որակը կմնա համարժեք իրականացվող գործառնությունների կայունացմանն ու ապահովված վարկային ապրանքներին ուշադրության սևեռմանը: 2017 թ. հունվարի 1-ի դրությամբ բանկի ժամկետանց վարկերը (կորպորատիվ եւ ավելի քան 90 օր ժամկետանց մանրածախ վարկերը) կազմել են ընդհանուր վարկային ներդրումների 3.4%-ը:

Բանկի վարկանիշի կայուն կանխատեսումը արտացոլում է ակնկալիքներն առ այն, որ հետագա 12-18 ամիսներին «Անելիք Բանկի» վարկային պորտֆելի որակը չի վատանա, կհաջողվի ամրապնդել կապիտալի գծով դիրքերը, մեծացնել շահութաբերությունը եւ իրացվելիությունը:

Ըստ ԱրմԻնֆո գործակալության պատրաստած «Հայաստանի բանկերի ֆինանսական վարկանիշի», «Անելիք Բանկը» 2016 թվականի արդյունքներով  ակտիվների գծով զբաղեցրել է 5-րդ դիրքը` 283.5 մլրդ դրամ, վարկային ներդրումների գծով զբաղեցրել է 4-րդ տեղը` 218.8 մլրդ դրամ,  ընդհանուր պարտավորությունների գծով` 4-րդ տեղը`  241,9 մլրդ դրամ, նույն դիրքն է ապահովվել ժամկետային ավանդների գծով` 156 մլրդ, որոնց առյուծի բաժինը` շուրջ 70%-ը, իրավաբանական անձանց միջոցներն են: «Անելիք Բանկի» վարկային ներդրումների ծավալը 2016 թվականին աճել է  3.6 անգամ, ինչը թույլ է տվել հաշվետու տարում ակտիվներն ավելացնել 3 անգամ, վարկային պորտֆելի բաժինը բանկի ակտիվներում ավելացել է 68% -ից մինչեւ 77%: Բանկի ժամկետային ավանդները հաշվետու տարում աճել են 3,5 անգամ, ինչը հնարավորություն է տվել գրեթե նույնքան ավելացնել պարտավորությունները (3,3 անգամ): «Անելիք Բանկը» զուտ շահույթ ավելացրել է 5,3 անգամ` մինչեւ 1,2 մլրդ դրամ: (31.12.2016 դրությամբ դրամի հաշվարկային փոխարժեքը` 483,94 դրամ/1դոլար): 2017 թ. հունիսի 30-ի դրությամբ NasdaqOMX Armenia ֆոնդային բորսայում արժենշվում են  «Անելիք Բանկի» արժեկտրոնային պարտատոմսերի երեք տրանշեր` 5-ական մլն դրամի երկու դոլարային և 1 մլդ դրամի դրամային: Ընդ որում, առաջին  դոլարային տրանշը թողարկվել է 2016 թ. դեկտեմբերին, իսկ մյուս երկուսը` 2017 թվականին: Բանկի պարտատոմսերի հերթական 5 մլն դոլարի չորրորդ թողարկումը տեղի ունեցավ հունիսի 29-ին, տեղաբաշխումն ընթացքում է:

Հիշեցնենք, որ «Անելիք Բանկը» շուկայում գործում է 1996 թվականի հոկտեմբերից: 2016 թվականի նոյեմբերին իրականացված լրացուցիչ թողարկմից հետո Բանկի բաժնետերերի կազմը փոխվեց, միացավ կիպրոսյան FISTOCO LTD ընկերությունը, 59.68% բաժնեմասով, ինչը նվազեցրել նախկին բաժնետերերի մասնաբաժինը, դեմս Լիբանանյան ԿրեդիտԲանկ S.A.L ի, 100%-ից մինչև 40.32%: Բանկի անուղղակի մեծամասնական բաժնետերերն են հանդիսանում ֆիզիկական անձինք` Tarek J. Khalefe (CreditBank S.A.L) և Վարդան Դիլանյանը (FISTOCO ՍՊԸ):