Սկսվել են «Հին Երևան՚ նախագծի իրագործման աշխատանքները

Արմինֆո.Սկսվել են «Հին Երևան՚ նախագծի իրագործման աշխատանքները: Տվյալ պահի դրությամբ այդ նախագծի համար նախատեսված տեղամասի մի մասում ընթանում են հողային աշխատանքներ, իսկ մյուս մասում քաղաքապետարանն իրականացնում է օտարման և մնացած տարածքի մաքրման գործընթաց: Այդ մասին ԱրմԻնֆո-ին հաղորդել է Քաղաքաշինության պետական կոմիտեի ղեկավարի մամուլի քարտուղար Անահիտ Եսայանը:

Նա նաև տեղեկացրել է, որ շուտով այդ ծրագրի շրջանակում Տերյան փողոցում կսկսվի ստորգետնյա տեղամասերի կառուցապատում: Աբովյան փողոցում նույնպես շուտով կսկսվեն շինարարական աշխատանքներ: «Հին Երևան՚ ծրագիրն ընդգրկում է քաղաքի կենտրոնական փողոցները` Աբովյան, Փավստոս Բուզանդ, Եզնիկ Կողբացի, Արամի և Մաշտոցի պողոտա:

Հիշեցնենք, որ նախագծի իրագործման գաղափարն ի հայտ է եկել դեռ 2005 թվականին,  2010 թվականին նախատեսվում էր սկսել այն, սակայն ճգնաժամի և միջոցների բացակայության առնչությամբ ծրագրի իրագործումը կասեցվեց: 2014 թվականին կառավարությունը շուրջ 130 մլն դոլարի ներդրումային համաձայնագիր է ստորագրել շվեյցարահայ ներդրող, «Ֆրանկ Մյուլլեր՚ ընկերության ղեկավար Վարդան Սերմակեսի հետ` վերը նշված հատվածի կառուցապատման աշխատանքների վերսկսման շուրջ:

«Հին Երևան՚ նախագծի հեղինակ Լևոն Վարդանյանի մասնակցությամբ ծրարի մշակմանն առնչվող հարցերի քննարկման և լուծման նպատակով օրերս կայացել է  միջգերատեսչական խորհրդատվություն, որը գլխավորել է Քաղաքաշինության պետականն կոմիտեի նախագահ Նարեկ Սարգսյանը: Հանդիպմանը ներկա են եղել ՀՀ մշակույթի նախարարության և Երևանի քաղաքապետարանի աշխատակիցներ: Հանդիպմանը որոշվել է ծրագրի հետագա իրակացման ժամանակ ղեկավարվել հաստատված հայեցակարգային դրույթներով, որոնք ներկայացրել են Քաղաքաշինության պետական կոմիտեն, Մշակույթի նախարարությունն ու Երևանի քաղաքապետարանը:

Քննարկման ընթացքում նաև որոշվել է վերականգնել Բուզանդի փողոցի թթ. 97 և 25 շենքերը, որոնք այժմ քանդվում են: Որոշվել է դրանք վերականգնել քաղաքի այն մասում, որն ընդգրկված է «Հին Երևան՚ նախագծում: Այդ նախագիծը նախատեսում է քաղաքի 19-րդ դարավերջի` 20-րդ դարասկզբի ճարտարապետական տեսքի վերստեղծում: Քաղաքի կենտրոնում կվերականգնվի մի քանի տասնյակ շենք և ճարտարապետական կառույց, որոնք կառուցվել էին այդ շրջանում և պատմամշակութային արժեք էին ներկայացնում:

Նախագծի հեղինակ, ճարտարապետ Լևոն Վարդանյանն ավելի վաղ հայտարարել էր, թե պատմական թաղամասի վերակառուցման շրջանակում, նախատեսվում է առևտրահանրային համալիրի, երկհարկանի ստորգետնյա ավտոկայանատեղիի կառուցում, ընդ որում` բնակելի տարածքի առկայությունը բացառվում է: Վարդանյանի ասելով, կառուցապատման համար նախատեսված ողջ տեղամասը` շուրջ 20 հազար քմ, բաժանված է երկու ներդրողների միջև` 16,5 հազար քմ և 3,5 հազար քմ` համապատասխանաբար: Նախագծի արժեքը նա չի նշել: Նախագծի ներրդողներն են Old City ընկրությունը` ի դեմս հիմնադիր Վարդան Սերմակեսի, ինչպես նաև տեղացի ձեռներեց Վահե Հարությունյանը:

Հավելենք, որ նախօրեին կառավարությունում քննարկվել է ոչ պակաս հետաքրքիր` «Հայկական գյուղ՚ ազգագրական թաղամասի ստեղծման նախագիծը, որի արժեքը կկազմի 100-150 մլն դոլար: Վարչապետ Կարեն Կարապետյանի համոզմամբ, ազգագրական թաղամասը կարող է դառնալ Երևանի տեսարժան վայրերից մեկը: Արդեն հայտարարվել է միջազգային հայտամրցույթ,  մասնակցության հայտ են ներկայացրել 4 ընկերություններ, որոնց հետ քննարկվում են նախագծի մանրամասները: