Երևանում կայացել է հայ-չեխական տնտեսական համագործակցության հարցերով միջկառավարական հանձնաժողովի երրորդ նիստը

Արմինֆո. Սեպտեմբերի 12-ին Երևանում կայացել է հայ-չեխական տնտեսական համագործակցության հարցերով միջկառավարական հանձնաժողովի երրորդ նիստը։ Միջկառավարական հանձնաժողովի համանախագահներն են, հայկական կողմից՝ ՀՀ տնտեսական զարգացման և ներդրումների նախարարի առաջին տեղակալ Գարեգին Մելքոնյանը, չեխական կողմից՝ Չեխիայի արդյունաբերության և առևտրի նախարարի տեղակալ Վլադիմիր Բարտլը։ Այս մասին ԱրմԻնֆո գործակալությանը տեղեկացվել է նախարարության մամուլի ծառայությունից,

Աղբյուրի համաձայն, հայկական կողմից Հանձնաժողովի նիստի աշխատանքներին մասնակցել են ՀՀ նախագահի աշխատակազմի, ՀՀ կառավարության աշխատակազմի, ՀՀ տնտեսական զարգացման և ներդրումների, արտաքին գործերի, ֆինանսների, գյուղատնտեսության, էներգետիկայի և բնական պաշարների, տրանսպորտի, կապի և տեղեկատվական տեխնոլոգիաների, կրթության և գիտության, մշակույթի, բնապահպանության, պաշտպանության նախարարությունների, ՀՀ արդյունաբերողների և գործարարների միության, ՀՀ առևտրաարդյունաբերական պալատի, այլ շահագրգիռ կառույցների ներկայացուցիչներ:

Չեխական կողմից նիստի աշխատանքներին մասնակցել են Չեխիայի արդյունաբերության և առևտրի, արտաքին գործերի, գյուղատնտեսության, բնապահպանության նախարարությունների, բանկային համակարգի, Չեխիայի արդյունաբերության կոնֆեդերացիայի, առևտրաարդյունաբերական պալատի, մասնավոր ընկերությունների ներկայացուցիչներ, ինչպես նաև Հայաստանում Չեխիայի դեսպանության աշխատակիցներ։ 

Միջոցառմանը մասնակցել են Չեխիայի Հանրապետությունում Հայաստանի Հանրապետոթյան արտակարգ և լիազոր դեսպան Տիգրան Սեյրանյանը և Հայաստանի Հանրապետությունում Չեխիայի Հանրապետության արտակարգ և լիազոր դեսպան Պետեր Միկիսկան։

Միջկառավարական հանձնաժողովի նիստի ընթացքում քննարկվել են Հայաստանի և Չեխիայի միջև առևտրատնտեսական, ֆինանսական, էներգետիկայի, գյուղատնտեսության, առողջապահության, կրթության և գիտության, մշակույթի, ստանդարտացման, տրանսպորտի, տեղեկատվական տեխնոլոգիաների, զբոսաշրջության և այլ ոլորտներում համագործակցության զարգացման հեռանկարներն ու հնարավորությունները:

Նիստի արդյունքում ստորագրվել է նիստի արձանագրությունը, որով սահմանվել են հետագա համագործակցության ուղղություններն ըստ ոլորտների:

ՀՀ տնտեսական զարգացման և ներդրումների նախարարի տեղակալ, հայ-չեխական միջկառավարական հանձնաժողովի համանախագահ Գարեգին Մելքոնյանի խոսքով, նիստի ընթացքում քննարկվել է հարցերի լայն շրջանակ և պայմանավորվածություններ են ձեռք բերվել ամենատարբեր ուղղություններով համագործակցության վերաբերյալ:

Ընդհանուր առմամբ, այս օրակարգը լավ նախադրյալ է լինելու հաջորդ տարվա համար: Նախագծվել է բավականին հագեցած և բազմաոլորտ օրակարգ` ուղղված և’ մասնավորի  և’ միջկառավարական մակարդակով համագործակցությանը: Չեխիայի արդյունաբերության և առևտրի նախարարի տեղակալ, չեխական կողմի համանախագահ Վլադիմիր Բարտլն իր հերթին նշել է. «Կա լավ համագործակցություն Հայաստանի հետ: Հայաստանի և Չեխիայի միջև շատ նմանություններ կան: Բացի դրանից Հայաստանը կարող ենք դիտարկել մեզ համար ոչ միայն  որպես բաց երկիր, այլ նաև որպես դարպաս դեպի Իրան և Ռուսաստան»:

Համանախագահները կարևորել են նաև երկու երկրների գործարարների միջև կապերի խթանման ուղղությամբ տարվող քայլերը և նշել, որ առաջիկայում` հոկտեմբերին, Երևանում կանցկացվի հայ-չեխական հերթական գործարար համաժողովը, ինչը լավ հնարավորությունն է գործարար կապերը նոր մակարդակի հասցնելու համար:

Նշենք, որ տարվա առաջին կիսամյակում դեպի Հայաստան չեխական արտահանումը կազմել է 10 մլն.դոլար, զգալիորեն աճելով, իսկ հայկական ներմուծումը Չեղիա, հակառակը, հազիվ հասել է 1 մլն.դոլարի: Սակայն, վերջին ժամանակներս Հայաստանն ալկոհոլից բացի (կոնյակ և գինիներ) Չեխիա արտահանել թեթև արդյունաբերության ապրանքներ`տղամարդու և կանացի հագուստներ: Այսօր Չեխիան Հայաստանին մատակարարում է բազմաթիվ ապրանքներ`տուրբիններ, գեներատորներ, Էլեկտրական սարքավորումների ՀԷԿ-երի համար, բջջային հեռախոսներ, մարտկոցներ, բժշկական սարքեր և, իհարկե, չեխական հայտնի ապակի և գարեջուր: Կան գյուղատնտեսական տեխնիկայի մատակարարման ծրագրեր, լիզինգային ծրագրերի պետական ​​աջակցության շրջանակներում: Ինչպես գտնում է դեսպան Պետր Միկիսկան, Հայաստանի արտահանման առաջարկները, որոնք նախատեսված են ԵՄ համար, դեռևս սահմանափակված են որակյալ մրցունակ ապրանքների քանակային առումով, թեև գործընթացը, նրա կարծիքով, կամաց-կամաց թափ է հավաքում: Մյուս կողմից, հայ արտահանողների մոտ դեռևս պահպանվում են բարձր ծախսերը, կապված տրանսպորտային հաղորդակցության և լոգիստիկայի հետ: Գլխավորը, վստահ է Պետր Միկիսկան, Հայաստանում լրջորեն փոխվում է ներդրումային մթնոլորտը, վերջին ժամանակներս նկատվում է աշխուժություն, ավելի հաճախ են Հայաստան այցելում չեխական բինեսի ներկայացուցիչները, ընթանում են աշխույժ խորհրդատվություններ մի շարք ներդրումային նախագծերի գծով, մասնավորապես արևային էներգիայի, գյուղատնտեսական արտադրության ոլորտներում: «Մենք ակնկալում ենք բեկում: Հայաստանում ավելի հեշտ է սկսել աշխատելը: Այժմ ամեն ինչ կախված է փոխադարձ շահերի սահմանումից», - ասել է դեսպանը: Հանդիպման արդյունքում կողմերն ստորագրել են արձանագրություն: