Արմինֆո.Վարչապետ Կարեն Կարապետյանն ընդունել է իտալական «Ռենկո» ընկերության գլխավոր տնօրեն Ջովաննի Ռուբինիի գլխավորած պատվիրակությանը:
Ինչպես ԱրմԻնֆո-ին հաղորդեցին կառավարւության տեղեկատվության և հասարակայնւոթյան հետ կապերի վարչությունից, կողմերն անդրադարձել են մարտի 23-ին Երևանում ՀՀ կառավարության և «Ռենկո» ընկերության միջև կնքված շրջանակային համաձայնագրի դրույթների կատարման ընթացքին, որոնք վերաբերում են Երևանի ՋԷԿ-ի հարակից տարածքում նոր ջերմաէլեկտրակայանի կառուցմանը:
Ջովաննի Ռուբինին գոհունակությամբ ընդգծել է, որ բոլոր աշխատանքներն ընթանում են ըստ ժամանակացույցի:
Կարեն Կարապետյանը կարևորել է 280 մլն դոլար արժողությամբ այս ծրագիրը՝ նշելով, որ այն մեծ նշանակություն ունի Հայաստանի էներգետիկ համակարգը էլեկտրաէներգիա արտադրող ժամանակակից և արդյունավետ հզորություններով համալրելու առումով:
Մարտին Հայաստանի կառավարությունը հավանություն է տվել Երևանում շոգեգազային ցիկլի էլեկտրակայանի նախագծման, զարգացման, ֆինանսավորման, շինարարության և շահագործման շուրջ շրջանակային համաձայնագրի ստորագրմանը: Ըստ ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանի, շինարարական աշխատանքների ավարտը նախատեսվում է 25 ամիս անց: Ծրագրի շրջանակներում կստեղծի շուրջ 900 ժամանակավոր աշխատատեղ, իսկ շահագործման պահից` 200 մշտական և բարձր վարձատրվող աշխատատեղ: «Շինարարության ընթացքում կօգտագործվեն լավագույն արդյունավետ տեխնոլոգիաները, իսկ օգտակար գործողության գործակիցը կլինի 53%, մինչդեռ, Հրազդանի էներգաբլոկում այս ցուցանիշը կազմում է 44%, Երևանի ՋԷԿ-ում`49%: Դա նշանակում է, որ մենք կարող ենք ապահովել երկրի էներգետիկ համալիրի հուսալիությունը և անվտանգությունը», - ասել է նա:
Միևնույն ժամանակ Ա. Մանուկյանը նշել է, որ Հայաստանի էներգետիկ արտահանման ներուժը 2019-ի վերջին, երբ շահագործման հանձնվի Իրան-Հայաստան-Վրաստան էլեկտրահաղորդման գիծը, կկազմի 1050 ՄՎտ: Մարտի 20-ին նոր ՋԷԿ հիմնարկեքի արարողությանը մասնակցել է նաև Սերժ Սարգսյանը: Նոր ՋԷԿ-ը կկառուցվի Երևանի ՋԷԿ հարևանությամբ և կիրականացվի «Ռենկո՚ ընկերության կողմից: