ԱԿԲԱ-ԿՐԵԴԻՏ ԱԳՐԻԿՈԼ բանկի հերթական  բիզնես դասընթացները ներառել են «Հյուրանոցային ծառայությունների մարքեթինգ՚, «Հոգատարություն հյուրերի հանդեպ՚ թեմաները

Արմինֆո. ԱԿԲԱ-ԿՐԵԴԻՏ ԱԳՐԻԿՈԼ բանկը շարունակում է մարզերում գործող ՓՄՁ ներկայացուցիչների համար նախատեսված անվճար բիզնես դասընթացների շարքը: Ինչպես ԱրմԻնֆո-ին հաղորդել են բանկի մամուլի ծառայությունից, հերթական երկօրյա բիզնես դասընթացները տեղի են ունեցել Գյումրի քաղաքում և ներառել են «Հյուրանոցային ծառայությունների մարքեթինգ՚, «Հոգատարություն հյուրերի հանդեպ՚ նոր ներդրված թեմաները: Դասընթացներին մասնակցել են Շիրակի մարզի փոքր և միջին ձեռնարկությունների շուրջ 20 ընկերությունների ներկայացուցիչներ:

«Մեկ ամիս առաջ ԱԿԲԱ-ԿՐԵԴԻՏ ԱԳՐԻԿՈԼ բանկը և Շիրակի մարզպետարանը հուշագիր ստորագրեցին, որով մենք պարտավորվեցինք  Շիրակում միավորել մեր ուժերը ՓՄՁ ոլորտի զարգացման համար։ Բանկի՝ թրեյնինգներ անցկացնող աշխատակիցները, որոնք Միջազգային ֆինանսական կորպորացիայի (IFC Business Edge) կողմից վերջերս ստացել են միջազգային թրեյնավարների սերտիֆիկացման աստիճան, այս տարի Երևան քաղաքից բացի  դասընթացներ են անցկացրել Լոռու, Արմավիրի, Սյունիքի, ինչպես նաև Շիրակի մարզերում, իսկ այս դասընթացը Շիրակում արդեն թվով չորրորդն  է։ Կարող ենք փաստել, որ այս տարի ունենք զբոսաշրջիկների հոսքի աճ, և նոր ներդրված մոդուլով մարզի հյուրանոցային բիզնեսի ոլորտի համար  իրականացվող  բիզնես դասընթացի բովանդակությունը պայմանավորված է հենց ոլորտում ստեղծված պահանջարկով և առաջիկա զարգացումների կանխատեսմամբ։ Համոզված ենք, որ մեր գործունեության 20 տարիների ընթացքում կուտակած, ինչպես նաև միջազգային լավագույն փորձը, որոնք դասընթացի շրջանակում այս օրերին փոխանցեցինք Շիրակի մեր գործընկերներին, դրական ազդեցություն կթողնեն և՛ նրանց կողմից մատուցվող ծառայությունների որակի բարձրացման, և՛ նրանց բիզնեսի զարգացման վրա»,- ասել էց բանկի Զարգացման և մարքեթինգի վարչության պետ Արսեն Մելքոնյանը: 

ԱԿԲԱ-ԿՐԵԴԻՏ ԱԳՐԻԿՈԼ բանկի կողմից իրականցվել է 55 անվճար բիզնես դասընթաց, որոնց մասնակցել են ավելի քան 700  ՓՄՁ ներկայացուցիչներ շուրջ 380 կազմակերպություններից: Բիզնես դասընթացներին կարող են մասնակցել ՀՀ-ում գործող բոլոր ՓՄՁ ներկայացուցիչները։ Դասընթացների իրականացման ժամանակացույցին կարելի է ծանոթանալ www.SME.acba.am կայքում, իսկ դրանց մասնակցելու համար` գրանցվել այստեղ. http://www.sme.acba.am/hy/register։

ԱրմԻնֆո ԼԳ պատրաստած «Հայաստանի բանկերի ֆինանսական վարկանիշի՚ տվյալներով, 2017թ. հուլիսի 1-ի դրությամբ, ԱԿԲԱ-ԿՐԵԴԻՏ ԱԳՐԻԿՈԼ բանկի վարկային պորտֆելում ՓՄՁ բաժինը կազմել է 20% կամ 86.4 մլն դոլար (41.5 մլրդ դրամ) 22,8% տարեկան աճով, իսկ միայն երկրորդ եռամսյակում` 10,8%: Իսկ բանկերի ընդհանուր ներդրումների ծավալում ԱԿԲԱ-ԿՐԵԴԻՏ ԱԳՐԻԿՈԼ բանկի բաժինը հասնում է  7%: «ԱԿԲԱ-ԿՐԵԴԻՏ ԱԳՐԻԿՈԼ բանկ՚ ՓԲԸ Հայաստանում գործում է 1995  թվից: 2006 թվի սեպտեմբերից որպես բանկի մեծամասնական բաժնետեր  հանդես է  գալիս եվրոպական  խոշորագույն Credit Agricole S.A. բանկային խումբը` կապիտալում 15,56% մասնակցությամբ,  մասակցության չափով նրան հետևում է SJSC "Sacam International բաժնետիրական ընկերությունը (Credit Agricole S.A խմբի անդամ)` 12,44%, որոնցից զատ կապիտալում ներկա են 10 մարզային գյուղացիական փոխօգնության միություններ: Բանկն առաջատար հնգյակում է մասնաճյուղերի ցանցի ընդգրկմամբ, իսկ մարզային մասնաճյուղերի  թվով երրորդ դիրքում է: ԱԿԲԱ-ԿՐԵԴԻՏ ԱԳՐԻԿՈԼ բանկը  հիմնական հաշվեկշռային ցուցանիշնենրի գծով պահպանում է դիրքերն առաջատար հնգյակում: