Հայաստանի գյուղատնտեսության նախարարը կոչ է անում խուճապի չմատնվել մսի գների աճի կապակցությամբ

Արմինֆո. Հայաստանի գյուղատնտեսության նախարար Իգնատի Առաքելյանը կոչ է անում խուճապի չմատնվել մսի գների բարձրացման կապակցությամբ: «Կան ապրանքներ, որոնք կարող են թանկանալ, և կան ապրանքներ, որոնք կարող են էժանանալ: Կա շուկա, որն արձագանքում է այդ հարաբերություններին», - հայտարարել է նախարարը հոկտեմբերի 11-ի ամփոփիչ մամլո ասուլիսում:

Նրա խոսքերով, գների բարձրացումը բարիք է, քանի որ այն կբերի ներդրումների աճին այդ ոլորտում, և, ի վերջո, շուկան ինքն է կարգավորում գները: «Մեկամսյա թանկացումների արդյունքներով հետևություններ անելը սխալ է: Հատկապես սխալ է պնդել, որ  գյուղնախարարությունը չի վերահսկում իրավիճակի և չունի տեղեկատվություն: Մենք ամեն ինչին տիրապետում ենք, բայց ոչ ամեն ինչին ենք ցանկանում արձագանքել», - ասել է Առաքելյանը:

Հատկանշական է, ինչպես հայտարարել է նախարարը, որ գյուղացիների հետ զրույցների արդյունքում հասկացել է, որ չնայած կերի թանկացումներին, իրենք չեն բարձրացրել տավարի և ոչխարի մսի գները: Ըստ նախարարի, նրանք դրանում հետաքրքրված չեն, քանի որ ունեն իրացման հետ կապվբած պրոբլեմ: Եվ այստեղ, ինչպես խոստովանել է նախարարը, ինքը տեսնում է կոնկրետ հակասություն: «Այս համատեքստում Երևանում մսի գների բարձրացումն ինձ համար անհասկանալի է, ես չեմ կարող որևէ կերպ բացատրել երևույթը», - նշել է Առաքելյանը:

Այնուամենայնիվ, ըստ նախարարի, Հայաստանում մսամթերքի գների բարձրացումը հիմնականում պայմանավորված է միջազգային շուկայում խոզի մսի գների բարձրացումով: Ոչխարի միսը թանկացել է արտահանման ծավալների կրկնապատկման պատճառով: Այս տարի Հայաստանն արտահանել է 12 հազարով ավելի ոչխար, քան նախորդ տարի: Արտահանումն ուղղավել է դեպի Իրաք, Իրաքի Քրդստան և Քաթար: Իսկ տավարի միսը, ըստ Առաքելյանի, թանկացել է ընդամենը 100-150 դրամով: «Դա գների բարձրացում չէ, պարզապես շուկան արել է իր սեփական ճշգրտումները», - ասել է նա: Բացի այդ, ըստ Առաքելյանի, տարին անբարենպաստ էր անասնակերի թանկացման առումով: Սակայն, ինչպես նշել է նախարարը, անասնապահական տնտեսություններն ապահովված են անհրաժեշտ քանակությամբ կերով: «Եթե լինի պակասորդ, մենք պատրաստ ենք կազմակերպել դրա ներմուծումը», - ավելացրել է նա:

Նշենք, որ վերջին ամիսներին Հայաստանում դիտվում է մսի և կարագի թանկացում: ՀՀ Ազգային վիճակագրական ծառայության տվյալներով, օգոստոսին Երևանում 1 կգ տավարի մսի միջին գինը կազմել է շուրջ 2100 դրամ, իսկ ոչխարի մսի գինը`2200 դրամ: Խոզի մսի գների աճն ավելի շոշափելի էր`2,600 դրամ: Այսպիսով, եթե տավարի մսի գինն աճել է մոտ 200 դրամով, խոզի մսի գների աճը կազմել է մոտ 800 դրամ: Արդեն սեպտեմբերին մեկ կիլոգրամ տավարի մսի գինը հասավ 2500 դրամի, ոչխարի մսի գինը`2800 դրամի, խոզի մսինը`3500 դրամի: Համապատասխան մարմինները դա բացատրում են գյուղատնտեսության ոլորտի համար անբարենպաստ պայմաններով, իսկ կարագի թանկացումը`համաշխարհային շուկայում գնային տատանումներով: Մասնագետները կանխատեսում են նաև առաջին անհրաժեշտության ապրանքների գների հետագա աճ: