Ամերիաբանկի թիմը «Virtual Banking» առցանց համաշխարհային 8-րդ մրցույթում դուրս է եկել եզրափակիչ փուլ

Արմինֆո. Ամերիաբանկի թիմը բանկերի միջև անցկացվող ակտիվների և պարտավորությունների կառավարման առցանց համաշխարհային  8-րդ մրցույթում /virtual Banking/ դուրս է եկել եզրափակիչ փուլ, որը տեղի կունենա ս/թ նոյեմբերի 23-ին Հաագայում: Բացի Ամերիաբանկից, եզրափակիչ փուլ դուրս է եկել ևս 3 ընկերություն՝  Bancop SA (Պարագվայ), Supervielle (Արգենտինա) և Ficohsa (Հոնդուրաս):

Ինչպես ԱրմԻնֆո գործակալությանը տեղեկացվել է Ամերիաբանկի մամուլի ծառայությունից, մրցույթին մասնակցել է 30 բանկ Աֆրիկա, Ասիա, Լատինական Ամերիկա, Եվրոպա/Կենտրոնական Ասիա տարածաշրջաններից:

Մրցույթը վերաբերում է բանկերում ակտիվների և պարտավորությունների, ինչպես նաև ռիսկերի արդյունավետ կառավարման խնդիրներին: Այն նպատակ ունի նպաստել ֆինանսաբանկային ոլորտի գիտելիքների զարգացմանն ու պրոֆեսիոնալ մակարդակի բարձրացմանը, այլընտրանքային և նորարարական գիտելիքների փոխանցմանը, միջազգային փորձի փոխանակմանը, բանկերում ռիսկերի կառավարման ուժեղացմանն ու զարգացմանը:

Մրցույթը կազմակերպվել է SimArch Group-ի կողմից, ֆինանսաբանկային ուսումնական պորտալի շրջանակներում և ֆինանսավորվել է FMO-ի` Նիդերլանդների միջազգային զարգացման բանկի, DEG-ի` KfW Bankengruppe-ի (KfW բանկային խումբ) անդամի և PROPARCO ֆինանսների զարգացման ֆրանսիական գործակալության կողմից:

Նշենք, որ SimArch Group-ը դեռևս 1999 թ-ից առաջարկում է նորարական և առաջադեմ ուսուցողական լուծումներ ֆինանսաբանկային ոլորտի մասնագետների համար՝ ստեղծելով կրթական մեծ հնարավորություններ: Ընկերության կրթական ծրագրերը հաջողությամբ կիրառվել են ավելի քան 45 երկրի 170 ընկերությունների կողմից, որոնց շարքում են այնպիսի խոշորագույն բանկեր, ինչպիսիք են՝ ABN AMRO,  ING, FirstRand, Dexia և այլն:

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, 2017 թվականի հունիսի 30-ի դրոթւյամբ Ամերիաբանկը շուկայի առաջատարն է ընդհանուր կապիտալով, ակտիվներով, վարկային ներդրումներով, պարտավորություններով, միջազգային կազմակերպություններից ներգրավված ֆինանսական միջոցներով: Բացի այդ, Ամերիաբանկը երկրորդ տեղն է զբաղեցնում կանոնադրական կապիտալով, արժեթղթերում կատարված ներդրումներով ( զուտ շահույթով: Բանկը զբաղեցնում է երրորդ հորիզոնականը ժամկետային ավանդներով (ինչպես ֆիզիկական, այնպես էլ իրավաբանական անձանց), ընդ որում, առաջատարն է իրավաբանական անձանց ցպահանջ ավանդներով և երկրորդն է ֆիզիկական անձանց ցպահանջ ավանդներով: 2017 թվականի հուլիսի 1-ին Ամերիաբանկի ընդհանուր կապիտալը կազմել է 67.8 մլրդ դրամ, կանոնադրական կապիտալը`39.8 մլրդ, ակտիվները`653,3 մլրդ դրամ, վարկային ներդրումները` 419.9 մլրդ.դրամ (ակտիվների 64.3%-ը), արժեթղթերում կատարված  ներդրումները`67.3 մլրդ.դրամ (այդ թվում`պետպարտատոմսերում -58,3 մլրդ), պարտավորությունները կազմել են 585.5 մլրդ դրամ, ժամկետային ավանդները`200.6 մլրդ. դրամ, ցպահանջ ավանդները`185,4 մլրդ.դրամ, միջազգային կազմակերպություններից ներգրավված միջոցները`154.8 մլրդ դրամ: Ամերիաբանկը տարվա առաջին կիսամյակը եզրափակել է 3,3 մլրդ դրամ զուտ շահույթով, տարեկան աճը`55.8%: Ամերիաբանկը շատ ակտիվ է նաև կորպորատիվ պարտատոմսերի թողարկման առումով: Այսօր ՆԱՍԴԱՔ ՕԷՄԷՔՍ Արմենիա ֆոնդային բորսայում շրջանառվում են Ամերիաբանկի 6 թողարկումները, երկուսը դրամային - 2.5 մլրդ դրամ ընդհանուր ծավալով և չորս դոլարային, $ 45 մլն ծավալով, որոնք բոլորն են շրջանառվում են Abond հիմնական ցուցակում: (ՀՀ դրամի հյաշվարկային փոխարժեքը 06.30.2017թ. կազմել է 480,47 դրամ / $ 1):

Հիշեցնենք, որ «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: Բանկը հայաստանյան շուկայում գործում է 1996 թվականի հոկտեմբերի 31-ից: Ամերիաբանկն ունի 12 մասնաճյուղ, որից 8 գտնվում է մայրաքաղաքում, իսկ 4-ը`Հայաստանի մարզերում: 2017 թվականի հունվարի 1-ի դրությամբ Բանկի բաժնետերեն են` Ameria Group CY ՍՊԸ – 65,8%, ՎԶԵԲ - 20,7%, ESPS Holding Limited - 13,5%:-