2017 թվականի 9 ամիսներին Polymetal ընկերությունը Կապանի կոմբինատում վերամշակել է 389 հազար տոննա հանքաքար

Արմինֆո. Կապանի լեռնահարստացման կոմբինատը (ԼՀԿ), որը Polymetal International plc խմբի անդամ է, 2017 թվականի 9 ամիսներին վերամշակել է 389 հազար տոննա հանքաքար: Միայն III եռամսյակում վերամշակման ծավալները կազմել են 143 հազար տոննա, նախորդ տարվա նույն ժամանակահատվածի 116 հազար տոննայի փոխարեն: Այս մասին է ասված է ընկերության այս տարվա երրորդ եռամսյակի արտադրական արդյունքների մասին հաղորդագրությունում:

Ըստ հաղորդագրության՝ ոսկու պարունակությունը մեկ տոննա հանքաքարում III եռամսյակում կազմել է 2.0 գրամ, ինչը 15%-ով ցածր է 2016-ի III եռամսյակի արդյունքների համեմատ: Իսկ արծաթի պարունակությունը կազմել է 35 գրամ (-27%), պղինձ`0.27% (-14%) և ցինկ` 1.32% (-17%): Ընդ որում՝ ոսկու կորզման գործակիցը կազմել է 84,6% (-1%), արծաթինը`81.6% (-3%), պղնձինը` 92.5% (+1%), ցինկինը`91.4% (0%): Արդյունքում՝ երրորդ եռամսյակում ոսկու արտադրությունը կազմել է 6.7 հազար ունցիա (2017-ի առաջին 9 ամիսներին` 21.1 հազ. ունցիա), արծաթ՝ 0.1 միլիոն ունցիա (0.4 մլն ունցիա), պղինձ՝ 0.3 հազար տոննա (0.9 հազար տոննա) և ցինկ՝ 1.3 հազար տոննա (3.6 հազար տոննա):

Երրորդ եռամսյակում, ըստ հաշվետվության, Կապանում արտադրվել է 6.7 հազար ունցիա ոսկի, ինչը 4%-ով ավելի է նախորդ տարվա նույն ժամանակահատվածի ցուցանիշից: Դա պայմանավորված է ստորգետնյա հանքում արտադրողականության բարձրացմանն ուղղված միջոցառումներով: Օգոստոսին Կապանի հարստացման կոմբինատը նոր ռեկորդ է սահմանել՝ մեկ ամսվա ընթացքում վերամշակելով 51 հազար տոննա հանքաքար:

Ընկերության կողմից շահագործվող Շահումյանի հանքավայրում տարվա առաջին 9 ամիսներին կատարվել են 12,270 մետրստորգետնյա լեռնանցումային աշխատանքներ: 9 ամիսների ընթացքում արդյունահանվել է 399 հազար տոննա մետաղական հանքաքար: Միայն 3-րդ եռամսյակում արդյունահանման ծավալը կազմել է 149 հազար տոննա, ինչը 33%-ով գերազանցում է 2016-ի նույն ժամանակահատվածի ցուցանիշը:

«Մենք երրորդ եռամսյակում հասել ենք գերազանց գործառնական արդյունքների և  հաստատում ենք տարվա արտադրականպլանը և կանխատեսումը ծախսերի առումով», - ասել է Polymetal խմբի գործադիր տնօրեն Վիտալի Նեսիսը:  2017 թվականիերրորդ եռամսյակում  Պոլիմետալն արտադրել է ռեկորդային 470 հազար ունցիա ոսկու համարժեք՝ մինչև 26%-ով գերազանցելով նախորդ տարվա ցուցանիշը, իսկ առաջին 9 ամիսներին ընկերության ձեռնարկություններում արտադրվել է 1028 հազար ունցիա ոսկու համարժեք, ինչը նախորդ տարվա համեմատ ավելացել է 15%-ով և համապատասխանում է 2017-ի արտադրական պլանին, որի ծավալը կազմում է 1.4 մլն ունցիա ոսկու համարժեք:

Հիշեցնենք, որ «Պոլիմետալն» իր գործունեությունը Հայաստանում սկսել է 2015 թվականից՝ ձեռք բերելով Լիճքվազ-Թեյի հանքավայրը Սյունիքի մարզում: Ընկերությունը շահագործում է հարստացման ֆաբրիկա Կապանում (Կապանի ԼՀԿ), որը ձեռք է բերել 2016 թ. ապրիլին:

«Պոլիմետալ»-ն աշխարհի խոշորագույն առաջնային արծաթ արտադրողներից է, հանդիսանում է Ռուսաստանի ոսկիհանքարդյունահանող առաջատար երեք ընկերություններից մեկը: Այն իրականացնում է թանկարժեք մետաղների արդյունահանում, ինչպես նաև երկրաբանական հետազոտություններ Ռուսաստանում, Ղազախստանում և Հայաստանում: Պոլիմետալն ինքնուրույն իրականացնում է հանքավայրերի շահագործումը, սկսած երկրաբանական ուսումնասիրությունից մինչև շահագործում: Ռազմավարության առանցքային տարրը վերամշակման կենտրոնների ստեղծումն է (hubs), որոնք հնարավորություն են տալիս առավել արդյունավետ և պատասխանատու օգտագործել ֆինանսական և մարդկային ռեսուրսները, նպաստել ներդրված կապիտալի եկամտաբերության աճին: 2011-ի նոյեմբերին Պոլիմետալը, առաջինը ռուսական ընկերություններից, պրեմիում ցուցակում անցավ Լոնդոնի ֆոնդային բորսայում (թիքքեր POLY).

Նշենք, որ Պոլիմետալ ընկերության բաժնետիրային կապիտալի մոտ 27%-ը ((LSE, Մոսկվայի բորսա. POLY, ADR `AUCOY) պատկանում է Ալեքսանդր Նեսիսի «ԻՍՏ» խմբին, 13%-ը` Չեխիայի Պիտեր Կելլերի PPF խմբին: Բացի այդ, կանոնադրական կապիտալի մոտ 1%-ը վերահսկում են ընկերության ղեկավարությունը և տնօրենները, 19%-ը` մասնավոր անձինք, իսկ 40%-ը`անհատ ներդրողներ: