Ավտոսեփականատերերն ստացել են ընտրության հնարավորություն, այժմ ԱՊՊԱ վկայագրերը կարող են գնել նաև on-line ռեժիմով

Արմինֆո. Հայաստանի ավտոապահովագրողների բյուրոն ավտոսեփականատերերին տեղեկացնում է, որ այսուհետ ցանկացած ապահովագրական ընկերության հետ ԱՊՊԱ պայմանա­գրե­ր կարելի է կնքել նաև առցանց (on-line) եղանակով և այդ տարբերակով ԱՊՊԱ պայմանագրի կնքման դեպքում վճարվում է սահմանվածից 5% ցածր ապահովագրավճար: Այս մասին ԱրմԻնֆո գործակալությանը տեղեկացվել է Հայաստանի ավտոապահովագրողների բյուրոյից:

Բյուրոն տեղեկացնում է նաև, որ առաջիկա 1-2 ամիսների ընթացքում նախատեսվում է ԱՊՊԱ պայմանագրերի on-line կնքման հնարավորություն ստեղծել նաև կանխիկի ընդունման հնարավորությամբ վճարային տերմինալների, մասնավորապես՝ «Թել-Սել», «Իզի Փեյ», «Մոբի Դրամ» և «Իդրամ» կազմակերպությունների վճարային տերմինալների միջոցով, ինչի մասին Բյուրոյի կողմից լրացուցիչ կիրազեկվի։

Աղբյուրի համաձայն, ԱՊՊԱ պայմանագրի on-line կնքումը պարզ գործընթաց է և տևում է առավելագույնը 3-ից 4 րոպե, ԱՊՊԱ պայմանագրի on-line կնքման վճարումն իրականացվում է պայմանագրի կնքման պահին՝ ցանկացած վճարային քարտի միջոցով, ԱՊՊԱ պայմանագրի on-line կնքումից անմիջապես հետո ապահովագրության վկայագիրն ուղարկվում է վկայագրում նշված՝ Ապահովադրի էլեկտրոնային հասցեին:

Բյուրոն հիշեցնում է, որ ԱՊՊԱ ապահովագրության վկայագրի թղթային կամ տպված տարբերակն ավտոմեքենաներում պահպանելը պարտադիր չէ: Ճանապարհային ոստիկանությունն ավտոմեքենաների վերաբերյալ ԱՊՊԱ պայմանագրերի առկայությունը ստուգում է Ճանապարհային ոստիկանության և ԱՊՊԱ տեղեկատվական համակարգերի միջև իրական ժամանակի ռեժիմում (on-line) իրականացվող հարցումների միջոցով:

ԱՊՊԱ պայմանագրերի առցանց կնքման համար կարելի է այցելել Հայաստանի ավտոապահովագրողների բյուրոյի www.appa.am պաշտոնական կայքի «ԱՊՊԱ պայմանագրերի առցանց կնքում» բաժին, www.aswa.am կայք կամ ցանկացած ապահովագրական ընկերության պաշտոնական կայք։

Ըստ Ավտոապահովագրողների բյուրոյի տվյալների, 2017 թվականի սեպտեմբերի 30-ի դրությամբ Հայաստանում եղել է 479356 գործող ԱՊՊԱ պայմանագիր, նախորդ տարվա 451132 պայմանագրի փոխարեն: ԱՊՊԱ գծով հավաքագրված ապահովագրական պրեմիաների ծավալը տարվա առաջին 9 ամիսներին կազմել է 13,9 մլրդ դրամ (տարեկան աճը`4.5%), իսկ իրականացված ապահովագրական հատուցումների ծավալը` 8.2 միլիարդ  դրամ (տարեկան աճը`34,4%): ԱՊՊԱ գծով վնասաբերության գործակիցը կազմել է 60%, տարեկան աճը`մոտ 10 տոկոսային կետով: Հայաստանում ներկայումս  գործում է վեց ապահովագրական ընկերություն:

Ըստ ԱրմԻնֆո գործակալության`Հայաստանի ապահովագրական ընկերությունների Ռենկինգի, 2017 թվականի սեպտեմբերի 30-ի դրությամբ ԱՊՊԱ դասում ապահովագրական պրեմիաների և հատուցումների գծով առաջատարն է «Ռոսգոսստրախ Արմենիա» ընկերությունը, որին հաջորդում են`«ԻՆԳՈ Արմենիա» և «Նաիրի Ինշուրանս» ընկերությունները: ԱՊՊԱ մասնաբաժինն ապահովագրական պրեմիաների ընդհանուր ծավալներում կազմել է 56.08%, իսկ հատուցումների ընդհանուր ծավալում`66.82%: ԱՊՊԱ գծով ապահովագրական պրեմիաների տարեկան աճն արագացել է`1,4%-ից մինչև 4.5%,  իսկ հատուցումների դինամիկան անկումից հետո արձանագրել է զգալի աճ: Ընդհանուր առմամբ, ապահովագրական պրեմիաների ընդհանուր ծավալը (բոլոր դասերով) կազմել է 24,6 մլրդ դրամ (տարեկան աճը`3,8%), իսկ ապահովագրական հատուցումները`11.98 մլրդ դրամ (տարեկան աճը`19.3%):