Արմինֆո. Հայաստանի ապահովագրողները 2017 թվականի 9 ամիսներին տարբեր դասերով իրականացրել են 11.98 մլրդ դրամի կամ 25,1 մլն դոլարի ապահովագրական հատուցում (ըստ ՀՀ ԿԲ չափանիշներով կազմված հաշվետվությունների): Տարեկան կտրվածքով ապահովագրական հատուցումներն աճել են 19.3%, նախորդ տարվա նույն ժամանակահատվածի 4.8% աճի փոխարեն: Իսկ ապահովագրականպրեմիաների գծով աճը կազմել է 3,8%, մինչև 24,6 մլրդ դրամ կամ 51.3 մլն դոլար, նախորդ տարվա 0,3% աճի փոխարեն: Ըստ ԱրմԻնֆո գործակալության`Հայաստանի ապահովագրական ընկերությունների Ռենկինգի, հատուցումների տարեկան աճ են ապահովել հինգ ընկերություններ, որտեղ առաջատարներն են`«ՌԵՍՈ» - 61.8%, «Նաիրի Ինշուրանս» - 52.4% ընկերությունները, իսկ տարեկան միակ անկումն արձանագրել է «Ռոսգոսստրախ Արմենիա» ապահովագրական ընկերությունը - 0.6%:
Ըստ ապահովագրության դասերի, հատուցումների գծով ամենաբարձր տարեկան աճն արձանագրվել է բեռնափոխադրումների ապահովագրության գծով - 2,4 անգամ, գույքի ապահովագրույան գծով (հրդեհ, բնական աղետներ) - 77.8%, ընդհանուր պատասխանատվության ապահովագրության գծով - 67.6%, մյուս գույքային վնասի գծով - 53, 5%, իսկ ԱՊՊԱ գծով անցյալ տարվա 1,5% բացասական դինամիկան բարելավվել է մինչև 33,3% դրական աճ, իսկ ԿԱՍԿՈ գծով` բացասական 3,8% դինամիկան փոխարինվել է 3.2% դրական դինամիկայով: Վերընթաց դինամիկա է արձանագրվել նաև արտասահման մեկնողների ապահովագրության հատվածում`27.6%: Ապահովագրական մյուս դասերով հատուցումների տարեկան դինամիկան ցուցադրել է անկում`Ֆինանսական վնասների ապահովագրության գծով - 42,5%, դժբախտ պատահարների - 26.8%, ցամաքային տրանսպորտի օգտագործումից բխող պատասխանատվության ապահովագրության գծով - 23.6%, առողջության ապահովագրության գծով - 0,4%: Համեմատության համար նշենք, որ 2016 թվականի առաջին 9 ամիսներին տարեկան աճ են արձանագրել ապահովագրության հետևյալ դասերը`ֆինանսատնտեսական վնասներ - 6.7 անգամ, բեռնափոխադրումներ - 2,6 անգամ, ցամաքային տրանսպորտի պատասխանատվության ապահովագրություն - 99,2%, գույքի ապահովագրություն - 89.8%, բժշկական ապահովագրություն - 14.1%: Անկում են արձանագրել` արտասահման մեկնողների ապահովագրությունը - 11.8%, դժբախտ պատահարներից` 27,2%, ընդհանուր պատասխանատվություն`73,9%, գույքային այլ վնասների ապահովագրություն` 95,7%:
Հաշվետու ժամանակահատվածում ապահովագրական հատուցումներ չեն իրականացվել վարկային ռիսկերի ապահովագրության գծով (լիցենզավորված է միայն Ռոսգոսստրախ-Արմենիան), օդային տրանսպորտի և պատասխանատվության ապահովագրության գծով (լիցենզավորված են ԻՆԳՈ Արմենիան, Ռոսգոսստրախ-Արմենիան և Նաիրի Ինշուրանսը), ջրային տրանսպորտի և դրանից բնխող պատասխանատվության ապահովագրության գծով (լիցենզավորված է միայն ԻՆԳՈ Արմենիան), ինչպես նաև երաշխիքների տրամադրման ապահովագրության գծով (լիցենզավորված են ԻՆԳՈ Արմենիան և Ռոսգոսստրախ-Արմենիան):
Ապահովագրական հատուցումների ամենամեծ ծավալներն ավանդաբար ապահովել է «Ռոսգոսստրախ-Արմենիա» ապահովագրական ընկերությունը`3,6 մլրդ դրամ (առաջին տեղում է նաև պրեմիաների գծով): Այնուհետև հաջորդում են`«ԻՆԳՈ Արմենիա» ՍՊԸ-ն`2.8 մլրդ դրամ, «Նաիրի Ինշուրանսը»`2.04 մլրդ դրամ, «Սիլ Ինշուրանսը»`1,6 մլրդ դրամ, ՌԵՍՈ-ն`1,3 մլրդ դրամ, «Արմենիա Ինշուրանսը»`676.1 մլն դրամ:
Ապահովագրական հատուցումների ընդհանուր ծավալներում ամենամեծ բաժինը կազմել են ԱՊՊԱ գծով հատուցումները - 66.82% կամ 8 մլրդ դրամ, նախորդ տարվա 59.82% փոխարեն: Բժշկական ապահովագրության մասնաբաժինը կազմել է 21.32% կամ 2.6 մլրդ դրամ, նախորդ տարվա`25.54%-ի համեմատ: ԿԱՍԿՈ հատվածի մասնաբաժինը կազմել է 812.9 մլն. դրամ կամ 6.78%, նախորդ տարիվա 7.85% փոխարեն: Ֆինանսական վնասների ապահովագրության մասնաբաժինը կազմել է 2.01% կամ 241.2 մլն դրամ, նախորդ տարվա նույն ժամանակահատվածի 4.18% -ի փոխարեն: Մյուս դասերով ապահովագրական հատուցումները տատանվում 7.3-132 միլիոն դրամի սահմաններում, որտեղ նվազագույն ցուցանիշն արձանագրել է ընդհանուր պատասխանատվության ապահովագրությունը (հատուցումների 0.06%-ը), իսկ առավելագույն ցուցանիշը`գույքի ապահովագրությունը (1.1%):
2017 թվականի առաջին 9 ամիսներին Հայաստանի ապահովագրական ընկերություններն ընդհանուր առմամբ արձանագրել են շուրջ 132 հազար ապահովագրական պատահար, որի մեծ մասը կազմել է առողջության ապահովագրությունը - մոտ 87 հազար դեպք: ԱՊՊԱ գծով այս ցուցանիշը կազմել է 42 հազար: Երրորդ տեղում է ԿԱՍԿՈ դասը - 1,4 հազար դեպք: Հայաստանի ապահովագրական շուկայում գործում է ապահովագրության երկու պարտադիր տեսակ`ԱՊՊԱ-ն և պետական ծառայողների բժշկական ապահովագրությունը:
Նշենք, որ Հայաստանի ապահովագրական շուկայում ներկայումս գործում է 6 ընկերություն, որոնք աշխատում են ապահովագրական 19 դասերի լիցենզիաներից 17 դասերով, բացառությամբ` երկաթուղային տրանսպորտի և դատական ու արտադատարանական ծախսերի ապահովագրություններից: Ապահովագրական 16 դասերի լիցենզիա ունի «ԻՆԳՈ Արմենիա» ընկերությունը (միակն է, որ զբաղվում է ջրային տրանսպորտի ապահովագրութամբ), որին լիցենզավորման դասերի թվով հաջորդում է «Ռոսգոսստրախ Արմենիա»-ն` ապահովագրության 15 դաս (միակն է վարկային ռիսկերի ապահովագրության ոլորտում): (ՀՀ դրամի միջին հաշվարկային փոխարժեքը 30.06.2017 թ. կազմել է 480.47 դրամ/դոլար):