«Լիդիան Արմենիան՚ Ամուլսարի հանքավայրի շահագործման համար 65 մլն դոլարի խոշոր ավտոպարկ ձեռք կբերի Caterpillar ընկերությունից

Արմինֆո.Ամուլսարի ոսկու հանքավայրի  շահագործմամբ զբաղվող «Լիդիան Արմենիա՚ ընկերությունը զարգացնում է համագործակցությունը Հայաստանում Caterpillar ընկերության պաշտոնական ներկայացուցիչ «Ցեպելին Արմենիայի՚ հետ: «Մենք ձեռք ենք բերում ավտոպարկ, որը մշակվել է հատուկ Ամուլսարի հաշագործման համար: Դա ամենախոշոր պայմանագիրն է Caterpillar-ի պատմության ընթացքում՚, - նոյեմբերի 17-ին լրագրողներին ասել է «Լիդիան Արմենիա՚ ընկերության գործադիր տնօրեն Հայկ Ալոյանը: Ավտոպարկի ընդհանուր արժեքը 65 մլն դոլար է:

«Լիդիան Արմենիայի՚ տեխնիկական ապահովման համար պատասխանատու Պիտեր Նելայի ասելով, այսօրվա դրությամբ ավտոպարկը ներառում է էքսկավատոր, կոնվեյեր, բեռնիչներ, որոնք կարող են բեռնել մինչև 180 տ բեռ` 42 քմ մակերեսով, ջարդիչներ, օժանդակ մեքենաներ և այլն: «Ակնկալում ենք ևս երեք բեռնիչ ԱՄՆ-ից: Արդյունքում` կունենանք 9 բեռնիչ, մեկ էքսկավատոր, որն արդեն ստացել ենք Գերմանիայից, և այլ օժանդակ տեխնիկա, ինչը միանգամայն բավարար է հետագա երեք տարվա աշխատանքների իրագործման համար՚, - ընդգծել է նա: Սակայն տեխնիկայի շահագործմանը կհաջողվի ձեռնամուխ լինել միայն հակահրդեհային համակարգերի ներդրումից հետո, որոնք շուտով կհասցվեն Հայաստան:

Նա, միևնույն ժամանակ, նշել է, որ անձնակազմին մասնագիտական տեխնիկայի կառավարում ուսուցանելու համար ընկերությունը ձեռք է բերել սիմուլյատորներ, որոնք լիովին նմանեցված են այդպիսի տեխնիկայի վարման պայմաններին: Վարորդի ուսուցման դասընթացն ընկերության վրա կնստի շուրջ 20  հազար դոլար: Դասընթացի ավարտին վարորդները կստանան հատուկ լիցենզիա, որը կիրառվում է լեռնահանքային ճյուղում` ողջ աշխարհում:

Հաշվի առնելով տեխնիկական ներուժն ու շինարարական աշխատանքների իրագործման ընթացքը` Հ.Ալոյանը նշել է, որ ընկերությունն արդեն 2018  թվականի ամռանը ձեռնամուխ կլինի ոսկու արդյունահանմանը: Նրա ասելով, արտադրության տարեկան ծավալը կկազմի 210 հազար ունցիա ոսկի կամ 250 մլն դոլարի ծավալ` արժեքային արտահայտհությամբ: Արդեն այսօր բանակցություններ են վարվում ոսկեբեր հանքաքարի մատակարարման շուրջ, առավելապես, եվրոպական երկրների և ԱՄՆ հետ, նշել է նա:

Բացի այդ, հարկ է նշել, որ այս տարվա հունվարից մինչև սեպտեմբեր «Լիդիան Արմենիան՚  19-րդ տեղն է զբաղեցրել Հայաստանի խոշորագույն հարկատուների ցուցակում` վճարված հարկերի 4 մլրդ դրամ  ծավալով: «Հաջորդ տարվանից, կախված ոսկու գնից, պետբյուջե ընկերության  հարկային վճարումների տարեկան ծավալը կկազմի շուրջ 50-50 մլն դոլար՚, - եզրափակել է նա:

Հիշեցնենք, որ «Լիդիան Արմենիան՚ բրիտանական Lydian International-ի դուստր ընկերությունն է, որի բաժնետերերն են նաև ԱՄՆ, Մեծ Բրիտանիայի, մի շարք եվրոպական երկրների միջազգային ինստիտուցիենալ ներրդողներ, այդ թվում` IFC և EBRD: Ամուլսարի ոսկու հանքավայրի շահագործման նախագիծն այսօր Հայաստանում արդյունաբերական ամենախոշոր նախագիծն է, որի ընդհանուր արժեքը կազմում է 370 մլն դոլար: 2016 թվականի օգոստոսին տեղի ունեցավ նախագծի մեկնարկի պաշտոնական արարողությունը, որը նախատեսում է շինարարության և հանքավայրի իրացման սկիզբը: Ամուլսարի հանքավայրի շահագործման ժամկետը կկազմի 10 տարի և 4 ամիս, նախատեսվում է տարեկան արդյունահանել 200 հազար ունցիա ոսկի (մոտ 10 մլն. տոննա հանքանյութ): Ամուլսարի ծրագրի շրջանակում կստեղծվի 1300 աշխատատեղ, ևս 650-700 աշխատատեղ` հանքավայրի շահագործման ողջ ընթացքում:  Ընկերության բաժնետոմսերը ցուցակված են Տորոնտոյի ֆոնդային բորսայում: Ամուլսարի հանքավայրն իր պաշարնորով երկրորդն է Հայաստանում:

«Ցեպելին Արմենիա՚ ՍՊԸ Caterpillar ընկերության միակ և պաշտոնական ներկայացուցիչն է Հայաստանի Հանրապետությունում` 2005 թվականից: «Ցեպելին Արմենիան՚ գերմանական Zeppelin GmbH կորպորատիվ խմբի մի մասն է, որն էլ իր հերթին հանդիսանում է Caterpillar-ի միջազգային խոշորագույն դիլերը Եվրոպայում:  «Ցեպելին Արմենիայի՚ գլխավոր գրասենյակը գտնվում է Աբովյան քաղաքում: Կենտրոնական պահեստը և կոմպոնենտների նորոգման կենտրոնը նույպես գտնվում են Աբովյանում: Արագ զարգանալով մենք արդեն մասնաճյուղեր ենք բացել Քաջարանում, Թեղուտում և Սոթքում: