Իտալական «Էլիտալիանա» ընկերությունը Հայաստանում ուղղաթիռային փոխադրումներ կատարելու մտադրություն ունի

Արմինֆո.ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը նոյեմբերի 21-ին ընդունել է «Էլիտալիանա» (ELITALIANA) ընկերության ներկայացուցիչներին՝ գլխավոր գործադիր տնօրեն Ալեսանդրո Ջիուլիվիի գլխավորությամբ։

«Էլիտալիանա»-ն, որը մասնագիտացած է տրանսպորտային միջոցների արտադրության ոլորտում, նպատակ ունի Հայաստանում ներկայացնել իր արտադրանքը և համագործակցության հնարավորություններ ձեռք բերել։ Ինչպես ԱրմԻնֆո-ին հաղորդեցին ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունից, նախարարի հետ նախորդ հանդիպման ընթացքում ունեցած պայմանավորվածության համաձայն՝ իտալացի մասնագետները ներկայացրել են հնարավոր համագործակցության իրենց ծրագիրը։ Բացի իտալական տրանսպորտը Հայաստանում ներկայացնելուց, ընկերությունը ցանկանում է իր արտադրած բարձրակարգ ուղղաթիռները մեր երկրում շահագործել դեպի մարզեր ուղևորափոխադրումներ իրականացնելու, զբոսաշրջային, առողջապահական, արտակարգ իրավիճակների, մասնավոր այլ նպատակներով: Իտալացի մասնագետները նախարարին ներկայացրել են իրենց արտադրած մի քանի ուղղաթիռների մոդելներ՝ ընդգծելով դրանց առավելությունները լեռնային պայմաններում: Պայմանավորվածություն է ձեռք բերվել երկկողմ համատեղ քննարկումները շարունակել շահագրգիռ մյուս գերատեսչությունների ներկայացուցիչների հետ հանդիպումներից հետո: 

Հիշեցնենք, որ հոկտեմբերի 18-ին ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը «Էլիտալիանա» (ELITALIANA) ընկերության ներկայացուցիչների հետ հանդիպմանը հույս էր հայտնել, որ արդյունավետ համագործակցություն կձևավորվի։ «Էլիտալիանա» ընկերության մասնագետները նախարարին ներկայացրել էին ընկերության գործունեության շրջանակները։ Նշվել էր, որ այն ավելի քան 50 տարվա պատմություն ունի։ Սկզբնական շրջանում գործունեություն են ծավալել տարբեր բնագավառներում, իսկ 1980-ական թվականներից սկսած՝  մասնագիտացել են տրանսպորտային միջոցների արտադրության ոլորտում: Ընդգծվել էր արտադրված տեխնիկայի բարձր որակը, որը հաստատված է համապատասխան հավաստագրերով։ Հանդիպման ընթացքում քննարկվել էին իտալական տրանսպորտային տեխնիկան Հայաստանում շահագործելու հնարավորությունները։ Պայմանավորվածություն էր ձեռք բերվել երկու կողմերի  մասնագետների մասնակցությամբ մշակել հնարավոր համագործակցության ծրագիր և այն առավել մանրակրկիտ քննարկել  հաջորդ հանդիպման ընթացքում։

Հայտնի իտալացի ձեռներեց Վիտորիո Մագնիի կողմից 1964 թվականին ստեղծված «Էլիտալիանա» ընկերությունն ունի ուղղաթիռային բազաներ և տարբեր ծառայություններ է մատուցում բազմաթիվ երկրներում: Իտալիայում լայն ցանցից զատ ընկերությունը ներկա է Բոսնիա և Հերցեգովինայում, Կոսովոյում, Լատինական Ամերիկայի որոշ երկիրներում: Ընկերությունն զբաղվում է նյութերի և ապրանքների փոխադրմամբ, օդային տաքսիի ծառայություններ է մատուցում, աշխատուժ է փոխադրում դժվար հասանելի շրջաններ, զբաղվում է քաղաքացիական պաշտպանության հարցերով, իրականացնում է աերոնկարահանումներ, օգնում է վարել էկոլոգիական դիտարկում, հետևում է խողովակաշարերի հուսալիությանը, մասնակցում անտառային հրդեհների մարմանը, աշխատում ոստիկանության մարմինների համար: