«Լիդիան Արմենիա» ընկերությունը 100 հազար ԱՄՆ դոլար է ներդրել Վայքի հիվանդանոցի վերանորոգման և տեխնիկական վերազինման համար

Արմինֆո.«Լիդիան Արմենիան» հատուկ հոգածություն ունի առողջության և անվտանգության մշակույթի հանդեպ: Մինչ Ամուլսարի հանքի շահագործումը նախաձեռնվել էր Վայք քաղաքի հիվանդանոցի վերազինումը, քանի որ այն ընկերության աշխատակիցների առաջին շտապ բուժօգնության համար ամենահարմար բժշկական հաստատությունն է։

Ինչպես ԱրմԻնֆո գործակալությանը տեղեկացվել է Ընկերության մամուլի ծառայությունից, չնայած Ամուլսարի աշխատանքային ճամբարի տարածքում ընկերությունն ունի արագ արձագանքման պայմաններին հարմարեցված առաջնային օգնության բուժկետեր, առողջության և անվտանգության միջազգային չափանիշների անհրաժեշտ պահանջներից է՝ մոտակայքում հատուկ պայմաններով ապահովված հիվանդանոցի առկայությունը։ Վայքի բուժհաստատության հետ համագործակցության հաստատումից ի վեր «Լիդիան Արմենիան» ընկերությունը Վայքի հիվանդանոցի պայմանների բարելավման համար ներդրել է 100 հազար ԱՄՆ դոլար։

Դեկտեմբերի 13-ին Վայքի բուժհաստատությունում  բացվեց Լիդիանի աջակցությամբ  վերանորոգված և տեխնիկայով վերազինված նոր վիրահատարանը, ինչպես նաև հիվանդանոցային պահանջներին հարմարեցված վերելակը: Մինչ Լիդիանի կողմից վերելակի տեղադրումը հիվանդանոցում հիվանդներին վիրահատարան էին բարձրացնում ոտքով:

Միջոցառմանը ներկա էին «Լիդիան Արմենիա» ընկերության ներկայացուցիչները, Վայքի բուժհաստատության անձնակազմը, գլխավոր բժիշկ Ռոբերտ Ասլանյանը, Վայոց Ձորի մարզպետ Հարություն Սարգսյանը, Վայքի քաղաքապետ Թարո Ավետյանը:

Բացի բժշկական տեխնիկայի, սարքավորումների ու անհրաժեշտ հիվանդանոցային պայմանների ապահովումից, Վայքի հիվանդանոցի բուժանձնակազմը, Լիդիանի ֆինանսավորմամբ, պարբերաբար կանցնի վերապատրաստման դասընթացներ։ Առաջիկայում Երևանում մասնագիտական վերապատրաստում են անցնելու հիվանդանոցի 4 մասնագետներ՝ նյարդաբան, վիրաբույժ-օրթոպեդ, բժիշկ-լաբորանտ, լապարոսկոպիկ վիրաբույժ, 2,5-7 ամիս ժամկետով՝ մասնագիտական հմտությունների կատարելագործման և նոր  կարողությունների ձեռքբերման նպատակով։

«Լիդիան Արմենիան» ընկերության գործադիր տնօրեն Հայկ Ալոյանը ծանոթանալով հիվանդանոցի նոր պայմաններին, ընդգծեց նման ներդրումների կարևորությունը: «Լիդիանի համար հատուկ կարևորություն ունեն այն ներդրումները, որոնք միաժամանակ ծառայելու են թե՛ Ամուլսարի հանքավայրի կարիքներին, թե՛ նաև նպաստելու են շրջակա համայնքների կենսապայմանների բարելավմանը: Լիդիանը ակնկալում է Վայքի հիվանդանոցի հետ ունենալ շարունակական համագործակցություն: Այս վերազինված բուժհաստատությունից օգտվելու են ոչ միայն Ամուլսարի աշխատակիցները, այլև տարածաշրջանի բնակիչները»,- ասել է Հայկ Ալոյանը:

«Լիդիան Արմենիա» ընկերության բուժծառայության ղեկավար Վիգեն Տատինցյանը նշում է, որ  Լիդիանում առողջության և անվտանգության պահանջները շատ խիստ են: «Ընկերության նպատակն է հնարավորինս նվազեցնել պատահարների և աշխատանքային վնասվածքների ռիսկը: Ամուլսարում շինարարության սկզբից ի վեր ծանր վնասվածքներ չեն արձանագրվել, այդուհանդերձ պատասխանատու ընկերությունը միշտ պետք է պատրաստ լինի տարբեր իրավիճակների և Վայքի հիվանդանոցի վերազինումը հենց այդ նպատակն ունի: Բացի այդ, Լիդիանի օգնությամբ վերազինված հիվանդանոցը և վերապատրաստված բուժանձնակազմը ավելի լավ առողջապահական ծառայություններ կապահովի տեղի բնակչությանը»,- ասել է Վիգեն Տատինցյանը:

Վայոց Ձորի մարզպետ Հարություն Սարգսյանը շնորհակալություն հայտնեց «Լիդիան Արմենիա» ընկերությանը այս կարևոր ներդրման համար, շեշտելով, որ վերազինված բուժհաստատությունը կծառայի ամբողջ մարզի բնակչությանը: Պատասխանելով լրագրողների հարցերին, մարզպետը նաև կարևորեց Ամուլսարի ծրագրի դերը մարզում աշխատատեղեի ստեղծման և սոցիալ-տնտեսական առաջընթացի առումով:-