«Արմենիա՚ ավիաընկերությունը 2017 թվականին ընդլայնել է սեփական չվերթների աշխարհագրությունը. 2018 թվականին խոստանում է ուղիղ չվերթներ դեպի Եվրոպա

Արմինֆո. «Արմենիա՚ ավիաընկերությունը, 390 մլն դրամ վճարելով պետբյուջե, 305-րդ տեղում է հայտնվել Հայաստանի Հանրապետության 1000 խոշոր հարկատուների շրջանում: Ընթացիկ տարում տեղական ավիափոխադրողը կարողացել է 50 տոկոսով կրճատել 2016 թվականին կրած վնասները: Այդուհանդերձ, չնայած ակնհայտ ձեռքբերումներին, մոսկովյան ուղղությունն այդպես էլ մնացել է ավիափոխադրողի համար անհասանելի: Դեկտեմբերի 26-ին լրագրողների հետ հանդիպմանն այդ մասին հայտարարել է «Արմենիա՚ ավիաընկերության  գլխավոր տնօրեն Ռոբերտ Հովհաննիսյանը` պատասխանելով ԱրմԻնֆո-ի հարցին:

Ռոբերտ Հովհաննիսյանը հիշեցրել է, որ «Արմենիան՚ դեռ 2016  թվականի փետրվարի 22-ին շահագործողի սերտիֆիկատ է ստացել, և 2016 թվականի հունիսին սկսվել է կանոնավոր չվերթների իրագործումը: Ներկայացված հայտն համաձայն, ավիաընկերությունը նախատեսում էր կանոնավոր ավիափոխադրումներ իրականացնել 17 ուղղություններով: Նախատեսվում էր, որ ավիաընկերությունը կսկսի կանոնավոր թռիչքներ իրականացնել ապրիլի 21-ին` դեպի Թել Ավիվ և Մոսկվա: Այնուհետև ընկերությունը պարտավորվել է ձեռնամուխ լինել կանոնավոր չվերթների իրականացմանը դեպի Թեհրան, Դուբայ, Պրահա, Կիև, Մինսկ, Բարսելոնա, Լոնդոն և Լառնակա: Առաջնային ուղղությունների թվում նշվում էին Ռուսաստանը, որտեղ, մայրաքաղաքից զատ, ավկաընկերությունը նախատեսում էր թռիչքներ իրականացնել դեպի Սոչի, Դոնի Ռոստով, Մինվոդի, Սամարա, իսկ եվրոպական ուղղություններից` դեպի Գերմանիա և Իտալիա:

2016 թվականի հունիսից մինչև դեկտեմբերը ներառյալ ավիաընկերությունը փոխադրել է 22 հազար ուղևոր, 2017 թվականի հունիս-դեկտեմբեր ամիսներին ուղևորափոխադրումներն ավելացել են մինչև 53 հազար: 2017 թվականին ավիաընկերությունը կատարել է 480 չվերթ, այսինքն, միջին հաշվով օրական մեկ չվերթից ավելի: Ինչպես նշել է ընկերության ղեկավարը, ընդհանուր առմամբ, իրականացվել է 1660 ժամ թռիչք, սակայն, օդանավի փոխհատուցվելիությունն ապահովելու համար այն պետք է թռչի տարեկան առնվազն 3500 ժամ: «Այդուհանդերձ, եթե 2016 թվականին ընկերությունը թռիչքներ է իրականցրել վնասով, արդեն 2017 թվականին կարողացել են կիսով չափ կրճատել կրած վնասները՚, - հայտարարել է Հովհաննիսյանը: Դա, նրա ասելով, հնարավոր է դարձել սեփական չվերթների աշխարհագրության ընդլայնման և կանոնավոր չվերթների հաճախականույթյան մեծացման շնորհիվ: Այսօրվա դրությամբ «Արմենիան՚ կանոնավոր չվերթներ է իրականացնում Երևանից Վորոնեժ, Մինվոդի, Թել Ավիվ, Բեյրութ: Դեպի Թեհրան թռիչքները դադարեցվել են, սակայն հաջորդ տարվա մարտից երթուղին կվերականգնվի: 2018 թվականի ապրիլից նախատեսվում են լրացուցիչ չվերթներ Երևան-Թել Ավիվ ուղղությամբ, թռիչքների հաճախականությունը կավելացվի շաբաթական 2-ից մինչև 4: Ավիափոխադրողն իրականացնում է նաև չարտերային թռիչքներ դեպի Հռոմ (ձմռան շրջանում), ինչպես նաև` դեպի Լառնակա, Կորֆու կղզի, Վենետիկ, Սալոնիկ, Իրակլիոն:  2018 թվականին նախատեսվում են չվերթներ դեպի Բարսելոնա: 2018 թվականի մարտից ցուցակը կհամալրեն Բաղդադն ու Էրիբիլը, հաջորդ տարվա ամռանը սպասվում են չարտերային չվերթներ  դեպի Վառնա և Քուվեյթ: 2018 թվականի ապրիլին նախատեսվում է  Embraer 190 ինքնաթիռի գործարկում (2009թ.), իսկ  2018 թվականի ապրիլի 19-ից կմեկնարկեն կանոնավոր չվերթները, դեպի Լիոն, ապրիլի 23-ին` դեպի Քյոլն: Այդ քաղաքների օդանավակայանների ղեկավարությունը ընդառաջել են ավիաընկերությանը` սահմանելով 50 տոկոս զեղչ: Երևանի օդանավակայանը նույնպես պատրաստ է աջակցել «Արմենիային՚ դեպի Եվրոպա չվերթների իրականացման գործում:

Այդուհանդերձ, այսօրվա դրությամբ դեպի Մոսկվա չվերթների իրականացումը ռուսական ավիափոխադրողների առանձնաշնորհն է: Ձմռան շրջանում օդանավակայանից մոսկովյալ ուղղությամբ իրականացվում է օրական 14 չվերթ, ամռանը` 17: «Արմենիան՚ փորձել է այդ շուկա մուտք գործել դեռ 2016 թվականին. հունիս-հոկտեմբեր ամիսներին իրականացրել է  չվերթներ, հետո ստիպված է եղել դադարեցնել թռիչքները: «Այդ ուղղությամբ շատ անհավասար պայմաններ են: ՌԴ օրենսդրության համաձայն, ոչ ազգային փոխադրողը մի քանի անգամ ավելի թանկ է վճարում, քան` ռուսականը՚, - նշել է Հովհաննիսյանը: Այդպիսով, ինչպես նա պարզաբանել է, հայաստանյան փոխադրողի համար յուրաքանչյուր 100 կմ 100 դոլար է, իսկ ռուսաստանյան փոխադրողի համար`27 դոլար` չխոսելով  արդեն օդանավակայանում գանձումների և վառելիքի սակագների մասին:

Այսօրվա դրությամբ, ավիաընկերությունում աշխատում է 44 մարդ: 2017 թվականին «Արմենիան՚ շարք է մտցրել երկու օդանավի հրամանատարի, վերաորակավորել է 6 երկրորդ օդաչուի: Ավիաընկերության հիմնական պարկը ներառում է Հայաստանում գրանցված «Բոինգ -737-500՚, ինչպես նաև երկու «Բոինգ 737-700՚ և 2 «Embraer 190՚` Georgian Airways-ի հետ պայմանագրի հիման վրա, չնայած այն հանգամանքին, որ գործարար ծրագիրը նախատեսված էր 6 ինքնաթիռի համար:

Հավելենք, որ «Արմենիա՚ ավիաընկերության հիմնադիրներն են Աշոտ Թորոսյանը (բաժնետոմսերի 51%), Թամազ Գաիաշվիլին (25%) և Ռոբերտ Հովհաննիսյանը (24%): Թամազ Գաիաշվիլին վրացական «Airzena՚ ավիաընկերության հիմնադիրն է և ընկերույթյան տնօրենների խորհրդի նախագահը, իսկ Ռոբերտ Հովհաննիսյանը նրա նախկին տեղակալն է: Այժմ հայրենական ավիաշուկայում գործում է երկկու հայկական ընկերություն` «Արմենիան՚ և «Տարոն Ավիան՚: