Արմինֆո.Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը կանխատեսում է առաջիկա ամիսներին կարագի գների նվազում: Նա այդ մասին հայտարարել է հունվարի 16-ին լրագրողների հետ հանդիպմանը:
Շաբոյանը հիշեցրել է, որ կարագի գներն սկսել էին բարձրանալ դեռ 2016 թվականի սեպտեմբերից, ինչը, նրա ասելով, պայմանավորված էր, հիմնականում, միջազգային շուկայում առկա իրավիճակով: Ինչպես նշել է փորձագետը, այդ մթերքի հիմնական զանգվածը Հայաստան է ներմուծվում Նոր Զելանդիայի խոշորագույն Fonterra կաթնամթերքի ընկերությունից: «Համաշխարհային գների դիտարկումը ցույց է տվել, որ նորզելանդական կարագի գները բարձրացել են 2016 թվականի մայիսից, ինչն արտացոլվել է տեղական շուկայի վրա` սեպտեմբերից: Fonterra-ի կարագի վաճառքի ամենաբարձր գինը սահմանվել է 2017 թվականի հուլիսին` 6 հազար դոլար 1 տոննայի դիմաց, ինչի հետևանքով մանրածախ շուկայում 1 կգ կարագի գինը կազմել է 4520 դրամ՚, - ասել է ՏՄՊՊՀ նախագահը:
Այդուհանդերձ, այսօր միջազգային շուկայում դիտվում է կարագի գների նվազում, ինչը, ՏՄՊՊՀ ղեկավարի կարծիքով, ժամանակի ընթացքում կարտացոլվի տեղական շուկայի վրա` 2-3 ամսվա ընթացքում: Միևնույն ժամանակ, ինչպես հայտարարել է Շաբոյանը, կարագի շուկայում տեղի են ունենում կառուցվածքային փոփոխություններ, եթե նախկինում ոլորտի խոշորագույն ներմուծողը «Ալեքս Հոլդինգն՚ էր` շուկայի շուրջ 80 տոկոսը, ապա այժմ նրա բաժինն զգալիորեն կրճատվել է` մինչև 55 տոկոս: Շուկայի մնացած 40 տոկոսը կիսում են 28 ընկերություններ, որոնց մեծ մասը կարագ է ներմուծում ԵԱՏՄ երկրներից:
Հիշեցնենք, որ 2017 թվականի նոյեմբերին փորձագետները հայտարարել էին, որ Հայաստանում սերուցքային կարագը 30-40 տոկոսով թանկացել է: Ընդ որում, նշելով ապրանքի գների աճը միջազգային շուկայում, նրանք հայտարարել էին բարձրացման անհամարժեքության մասին, ընդսմին նշելով, որ 2018 թվականի սկզբին գների աճը կշարունակվի` ԵԱՏՄ Մաքսային օրենսգրքի ուժի մեջ մտնելու առնչությամբ:
RUB | 4.19 | 0.00 |
USD | 394.07 | -1.03 |
EUR | 420.75 | 0.36 |
GBP | 491.72 | -0.42 |
CAD | 286.47 | 0.33 |
JPY | 25.52 | -0.03 |
CNY | 54.44 | -0.14 |
CHF | 433.66 | 0.15 |