Հայաստանում գյուղական տարածքների տնտեսական զարգացման հիմնադրամը 2018թ. կիրականացնի 4 ընկերությունների զարգացման ծրագրերի 600 մլն դրամի համաֆինանսավորում

Արմինֆո. Վարչապետ Կարեն Կարապետյանի գլխավորությամբ կառավարությունում տեղի է ունեցել Հայաստանում գյուղական տարածքների տնտեսական զարգացման հիմնադրամի հոգաբարձուների խորհրդի հերթական նիստը:

Նախ խորհուրդը փոփոխություններ և լրացումներ է կատարել հիմնադրամի կանոնադրության մեջ, այնուհետև քննարկել ու հաստատել է հիմնադրամի 2016-2017 թվականների տարեկան աշխատանքային ծրագրով նախատեսված միջոցառումների իրականացման վերաբերյալ հաշվետվությունը, հիմնադրամի հաճախորդ ընկերություններում անցկացված 2016թ-2017թ. մոնիտորինգի ամփոփ արդյունքների հաշվետվությունը, հիմնադրամի 2016թ. ֆինանսատնտեսական գործունեության անկախ աուդիտ իրականացնող կազմակերպության կողմից ներկայացված ֆինանսական հաշվետվությունների և անկախ աուդիտորական եզրակացությունը, հիմնադրամի 2016-2017թթ. բյուջեների կատարողականները:

Զեկուցվել է, որ Հայաստանում գյուղական տարածքների տնտեսական զարգացման հիմնադրամի կողմից 2017 թ. ընթացքում իրականացվել է 4 ներդրումային ծրագրի համաֆինանսավորում՝ 500 մլն դրամի չափով: Ծրագրերն իրականացվել են գյուղմթերքի վերամշակման, ձկնարտադրության և ստվարաթղթղի արտադրության ոլորտներում:

Խորհուդը հաստատել է նաև Հայաստանում գյուղական տարածքների տնտեսական զարգացման հիմնադրամի 2018թ. տարեկան աշխատանքային ծրագրի նախագիծը, որով նախատեսվում է ընթացիկ տարում իրականացնել 600 մլն դրամի համաֆինանսավորում՝ 4 ընկերությունների զարգացման ծրագրերում:

Նիստի ընթացքում քննարկվել են նաև հիմնադրամի գործունեության արդյունավետությունը բարձրացնելուն վերաբերող այլ հարցեր: Վարչապետ Կարապետյանը հանձնարարել է քննարկել և առաջիկայում այդ ուղղությամբ ներկայացնել համապատասխան առաջարկություններ:

Հայաստանում տնտեսական ակտիվությունը 2017 թ. հունվար-նոյեմբերին տարեկան կտրվածքով 0.6%-ից արագացել է մինչև 7,3%, ինչի դրայվերն են եղել առևտրի, սպասարկման և արդյունաբերության ոլորտները:Այսօրվա դրությամբ գյուղատնտեսության ոլորտը մնում է տնտեսության միակ ուղղությունը, որտեղ պահպանվում է բացասական միտումը. գյուղատնտեսական համախառն արտադրանքի ծավալը նվազել է 3,9%-ով` կազմելով 811,7 մլրդ դրամ: Տնտեսական ակտիվության աճը 2017-ի հունվար-նոյեմբերին շարունակել են խթանել առևտուրը՝ 14,4%, ծառայությունների ոլորտը՝ 14,2%, արդյունաբերական հատվածը՝ 12.3%: Արտահանման ծավալներն աճել են 23,5%, մինչև 971.4 մլրդ դրամ ($ 2013,8 մլն), իսկ ներմուծումը`28%, մինչև 1819 մլրդ դրամ ($ 3,770.4 մլն):