«Պոլիմետալ» ընկերությունը 2017 թվականին Կապանի ԼՀԿ-ում վերամշակել է 530 հազ. տոննա հանքաքար

Արմինֆո. Կապանի լեռնահարստացման կոմբինատը (ԼՀԿ), որը Polymetal International plc խմբի անդամ է, 2017 թվականի 12 ամիսներին արդյունահանել է 527 հազ. տոննա և վերամշակել է 530 հազ. տոննա հանքաքար: Միայն 4-րդ եռամսյակում  արդյունահանման ծավալը կազմել է 140 հազ. տոննա, վերամշակման ծավալը` 141 հազ. տոննա: Ընդ որում՝ նախորդ տարվա նույն ժամանակահատվածի համեմատ արդյունահանումն աճել է 33%-ով, վերամշակումը` 24%-ով: Այս մասին ասվում էընկերության 2017 թվականի չորրորդ եռամսյակի արդյունքների  մասին հաշվետվությունում:

Ըստ հաշվետվության՝ ոսկու պարունակությունը մեկ տոննա վերամշակված հանքաքարում IV եռամսյակում կազմել է 2.2 գրամ, ինչը 38%-ով ավելի է 2016-ի IV եռամսյակի արդյունքից: Արծաթի պարունակությունը կազմել է 33 գրամ (+6%), պղնձինը` 0.34% (+57%) և ցինկինը` 2.41% (+119%): Ընդ որում՝ ոսկու կորզման գործակիցը կազմել է 79.8% (+ 5%), արծաթինը` 82.1% (+8%), պղնձինը` 93.6% (+7%) և 85.5% ցինկինը`(0%): Արդյունքում IV եռամսյակում ոսկու արտադրությունը կազմել է 6.9 հազ. ունցիա (2017-ի 12 ամիսներին`ավելի քան 28.0 հազ. ունցիա), արծաթի արտադրությունը` 0.1 մլն ունցիա (0.5 մլն ունցիա), պղնձինը` 0.4 հազ. տոննա (1.3 տոնա) և ցինկի արտադրությունը` 1.2 հազ. տոննա (4.8 հազ. տոննա): IV եռամսյակում, ըստ զեկույցի, ոսկու արտադրությունը Կապանում 3%-ովգերազանցել է III եռամսյակի ցուցանիշը:

Ոսկու տարեկան արդյունահանումը կազմել է ռեկորդային` 28 հազ. ունցիա և ոսկու համարժեք 50 հազ. ունցիա: Գերազանց արտադրական արդյունքները Կապանում ձեռք են բերվել հանքաքարի վերամշակման ծավալների ավելացման և հանքաքարում պարունակության բարելավման շնորհիվ` ստորգետնյա հանքի արտադրողականության և կորզումների մակարդակի բարձրացմանն ուղղված միջոցառումների ներդրման ֆոնին:

Ըստ զեկույցի՝ 2017-ի 12 ամիսներին ընկերության կողմից շահագործվող Շահումյանի հանքավայրում լեռնանցումային աշխատանքները (ստորգետնյա հորատանցում) կազմել են 16937 մետր:

Պոլիմետալ խմբի ընդհանուր տարեկան արտադրությունը 2017-ին ավելացել է 13%-ով, նախորդ տարվա համեմատ և հասել է 1433 ունցիա ոսկու համարժեքի, 2% գերազանցելով  արտադրության 1400 հազ. ունցիայի թիրախը: Ոսկու տարեկան արտադրությունը կազմել է 1075 հազ. ունցիա, ինչը 21%-ով գերազանցում է նախորդ տարվա ցուցանիշը: Սա Պոլիմետալին հնարավորություն է տալիս մտնել հեղինակավոր կազմակերպությունների ցանկը, որոնց արտադրության ծավալները կազմում են ավելի քան 1 մլն ունցիա ոսկի և դառնալ երկրորդ ընկերությունը, որի բաժնետոմսերը շրջանառվում են Լոնդոնի ֆոնդային բորսայում, որը հասել է այդպիսի կարևոր արդյունքի:

2017-ին Պոլիմետալը վճարել է 138 մլն ԱՄՆ դոլարի շահաբաժիններ, ապահովելով 2.7% դիվիդենդային եկամտաբերություն՝ մեկ բաժնետոմսի տարվա միջին գնի համեմատ:

Պոլիմետալը հաստատում է 2018 թվականի արտադրական պլանը 1.55 մլն ունցիա ոսկու համարժեքի ծավալով, իսկ 2019-ի համար` 1.7 մլն ունցիա ոսկու համարժեքի ծավալով: Աճի հիմնական գործոնները կլինեն Կիզիլի գործարկումը և նախագծային արտադրողականության հասցնելը, ինչպես նաև՝ օքսիդացված հանքաքարի վերամշակման տեղամասի կրկին գործարկումը Մայսկոյեում և Վարվարինսկոյեի ու Կապանի գործունեության շարունակական բարելավումը: Այս ամենը պետք է փոխհատուցի Խականջինսկոյեում և Վորոնցովսկոյեում պարունակությունների  նախատեսված նվազումը: Ինչպես նախորդ տարիներին, հաջորդ 2 տարիների արտադրությունն ավանդաբար ավելի բարձր կլինի տարվա երկրորդ կեսին՝ սեզոնայնության պատճառով:

«Պոլիմետալը 2017 թվականը եզրափակել է գերազանց արդյունքներով, գերազանցել արտադրական պլանը վեցերորդ տարին անընդմեջ, - ասել է ընկերության գլխավոր գործադիր տնօրեն Վիտալի Նեսիսը: Առջևում կարևոր տարի է, երբ Կիզիլում արտադրության սկիզբը հիմքեր կստեղծի Նեժդանինսկի և ԱԳՄԿ-2-իներդրումային որոշումների համար: Միևնույն ժամանակ մենք կշարունակենք առաջացնել դրական դրամական հոսք և առաջնահերթությունը տալ շահաբաժինների վճարմանը կապիտալի բաշխման ժամանակ»:

Հիշեցնենք, որ «Պոլիմետալ» ընկերությունն իր գործունեությունը Հայաստանում սկսել է 2015 թվականին՝ ձեռք բերելով Սյունիքի մարզի Լիճքվազ-Թեյի ոսկուհանքավայրի նկատմամբ ընդերքօգտագործման իրավունքներ ունեցող «Լիճքվազ» ընկերությունը: Ընկերությունը շահագործում է նաև  Կապանի  լեռնահարստացման կոմբինատը (Կապանի ԼՀԿ), որը ձեռք է բերել 2016 թվականի ապրիլին:

«Պոլիմետալ»-ն աշխարհի խոշորագույն առաջնային արծաթ արտադրողներից է, հանդիսանում է Ռուսաստանի ոսկի արդյունահանող առաջատար երեք ընկերություններից մեկը: Այն իրականացնում է թանկարժեք մետաղների արդյունահանում, ինչպես նաև երկրաբանական հետազոտություններ Ռուսաստանում, Ղազախստանում և Հայաստանում:

Պոլիմետալն ինքնուրույն իրականացնում է հանքավայրերի շահագործումը, սկսած երկրաբանական ուսումնասիրությունից մինչև շահագործում: Ռազմավարության առանցքային տարրը վերամշակման կենտրոնների ստեղծումն է (hubs), որոնք հնարավորություն են տալիս առավել արդյունավետ և պատասխանատու օգտագործել ֆինանսական և մարդկային ռեսուրսները, նպաստել ներդրված կապիտալի եկամտաբերության աճին: 2011-ի նոյեմբերին Պոլիմետալը, առաջինը ռուսական ընկերություններից, պրեմիում ցուցակում անցավ Լոնդոնի ֆոնդային բորսայում (թիքքեր POLY):