Կարեն Կարապետյանն ու Արկադի Դվորկովիչը քննարկել են Մեղրիի ԱՏԳ-ում ռուսական բիզնեսի և կապիտալի ակտիվ ներգրավմանն առնչվող հարցեր

Արմինֆո. Հայաստանի վարչապետ Կարեն Կարապետյանը Դավոսի համաշխարհային տնտեսական ֆորումի շրջանակում հանդիպել է Ռուսաստանի փոխվարչապետ Արկադի Դվորկովիչի հետ:

 «ՌԴ փոխվարչապետ Արկադի Դվորկովիչի հետ քննարկել ենք հայ-իրանական սահմանին բացված Ազատ տնտեսական գոտում ռուսական բիզնեսի և կապիտալի ակտիվ ներգրավման, ԵՏՄ գործունեության հետ կապված հարցեր։ Անդրադարձել ենք նաև գյուղատենտեսության՝ մասնավորապես անասնաբուծության ոլորտում համագործակցության հեռանկարներին», - Facebook սոցիալական ցանցի իր էջում գրել է Կարեն Կարապետյանը:

Հիշեցնենք, որ 2017-ի դեկտեմբերի 15-ին վարչապետ Կարեն Կարապետյանի և Հայաստանում Իրանի դեսպան Սեյեդ Քազեմ Սաջադի մասնակցությամբ բացվեց Մեղրիի ազատ տնտեսական գոտին: Ինչպես բացման արարողությանը հայտարարել է ՀՀ տնտեսական զարգացման և ներդրումների նախարար Սուրեն Կարայանը, շինարարական աշխատանքներ գոտում  նախատեսվում է իրականացնել երկու փուլով: Առաջին փուլում, - ասել է նա, ստեղծվել են աշխատանքի անհրաժեշտ նվազագույն պայմանները, իսկ երկրորդ փուլում նախատեսվում է ընդլայնել տարածքը 70 հեկտարով և շահութաբեր գործունեության համար անհրաժեշտ բոլոր պայմանների ստեղծումը: Նախարարը նշել է, որ նախատեսվում է առաջիկա տարիներին ներգրավել 50-70 ընկերությունների, որոնք կկատարեն $ 100-130 մլն-ի ներդրումներ: Արդյունքում, կստեղծվի 1500 աշխատատեղ, իսկ ապրանքների և ծառայությունների արտահանման մակարդակը կհասնի $ 250 մլն-ի: «Մեղրի» ազատ տնտեսական գոտում գործող ընկերությունները կազատվեն եկամտահարկից, ավելացված արժեքի հարկից և ակցիզային հարկից և մաքսատուրքերից: Նրանք վճարում են միայն եկամտահարկ: Ազատ տնտեսական գոտում կներկայացվեն գյուղատնտեսական, վերամշակման, առևտրի, տրանսպորտի, ճանապարհորդական ընկերություններ: «Մեղրի՚ ԱՏԳ կառուցման ընդհանուր արժեքը գնահատվում է 32 մլն դոլար, որից 28 մլն կապիտալ ծախսերն են: Իրանի հետ սահմանին ԱՏԳ կառուցումը ՀՀ կառավարության առաջնային ներդրումային ծրագրերից մեկն է և նախատեսում է 10-15 հա մակերեսով ազատ տնտեսական գոտու ստեղծում` մինչև 45-50 հա հետագա ընդլայնման հնարավորությամբ: Չնայած այն հանգամանքին, որ ԱՏԳ դեռ կառուցված չէ, արդեն տարբեր ընկերություններից ԱՏԳ հետ աշխատանքին մասնակցելու բազմաթիվ հայտեր են ստացվել: Խոսքը վերաբերում է Ռուսաստանի 10-ից ավելի ընկերությունների, կան ընկերություններ Իրանից ու Եվրոպայից: Տնտեսական զարգացման և ներդրումների նախարարության գնահատմամբ, ԱՏԳ շահագործումը թույլ կտա ստեղծել 2,5 հազար աշխատատեղ և 30 տոկոսով ավելացնել արտահանումը Հայաստանից: ԱՏԳ ստեղծման հիմնական նպատակն Իրանի և տարածաշրջանի այլ երկրների հետ առևտրատնտեսական հարաբերությունների զարագցումն է, Սյունիիք մարզի զարգացումը, ինչպես նաև Հայաստանի դիրքավորումը որպես Իրանը ԵԱՏՄ երկրների և Վրաստանի հետ կապող օղակ: Ենթադրվում է, որ այնտեղ կգործի 100-120 ընկերություն, որոնց շահույթը 10 տարում կկազմի 52 մլն դոլար: Արտադրված արտադրանքը նախատեսվում է արտահանել Իրան, ԵԱՏՄ երկրներ, Մերձավոր արևելք, Թուրքմենստան և այլ երկրներ: 10 տարվա ընթացքում բոլոր ընկերությունների ներդրումների ընդհանուր ծավալը նախատեսվում է հասցնել մինչև 350-400 մլն դոլար: ԱՏԳ գոտու գործունեությունն արդեն ամրագրված է ԵԱՏՄ մաքսային օրենսդրությունում: ԵԱՏՄ-ում  duty-free համակարգով կգործի այդպիսի յոթ գոտի: