2017 թ. Հայաստանն ավելացրել է գինու արտահանումը 30%-ով

Արմինֆո. 2017 թ. Հայաստանն ավելացրել է գինու արտահանումը 30%-ով, վարչապետ Կարեն Կարապետյանի հետ հանդիպման ժամանակ ասել է գյուղատնտեսության նախարար Իգնատի Առաքելյանը:

Մասնավորապես, նա նշել է, որ նախորդ տարվա ընթացքում հանրապետությունում արտադրվել է 9 մլն լիտր գինի՝ 2016-ի 7 մլն-ի փոխարեն:

Այդ առնչությամբ Կարեն Կարապետյանը խնդիր է դրել 2018-ի ընթացքում գինու արտահանման ծավալները զգալիորեն ավելացնել՝ հաշվի առնելով առկա շուկաներն ու այնտեղ մուտք գործելու ուղղությամբ իրականացվող աշխատանքները: «Ավելի քան վստահ եմ, որ մենք խաղողի մեծ պահանջարկ ունենք ու խաղող արտադրել ցանկացողների թիվը գնալով աճելու է»,- նշել է վարչապետը:

Այդ առնչությամբ Առաքելյանը հայտնել է, որ խաղողի մթերման ծավալները 2017-ի ընթացքում աճել են 1 տոկոսով, պտղի մթերումն աճել է 21 տոկոսով, բանջարեղենինը՝ 11: Գյուղատնտեսության նախարարը զեկուցել է նաև, որ մեկնարկել են խաղողի տնկարկների քարտեզագրման աշխատանքները, և երկու տարվա ընթացքում կունենանք առկա բոլոր խաղողի այգիների գրանցվածությունը:

ՀՀ Մաքսային ծառայության տվյալներով՝ 2017 թ. առաջին կիսամյակում Հայաստանն արտահանել է 1.2 մլն լիտր գինի՝ 61% տարեկան աճով՝մաքսային արժեքի 84,3%-ով, մինչև $4.7 մլն աճի դեպքում: Հայկական գինու արտահանման ավելի քան 80%-ը (1 մլն լիտր) բաժին է ընկնում ռուսական շուկային: Ըստ որում, Ռուսաստան արտահանման ծավալները հաշվետու շրջանում աճել են 68,1%-ով: