Արմինֆո. Հայաստանի Պետական գույքի կառավարման վարչությունը 2018 թվականին մտադիր է իրականացնել 16 միլիոն դոլարի ներդրումային ծրագրեր: Այս մասին ՀՀ վարչապետ Կարեն Կարապետյանին զեկուցել է ՀՀ կառավարությանն առընթեր Պետական գույքի կառավարման վարչության պետ Արման Սահակյանը:
Նա նշել է, որ 2017-ին Վարչությունը նախատեսում էր իրականացնել 18 մլն.դոլարի ներդրումային ծրագրեր, մինչդեռ, տարեվերջին ներդրումային ծրագրերի ծավալը կազմեց 8 մլն.դոլար, 5 մլն.դոլարի փոխարեն: Խոսելով ընթացիկ տարվա ծրագրերի մասին, Ա. Սահակյանն ընդգծել է, որ պետական գույքի գրանցման գործընթացում նախատեսված են արմատական բարեփոխումներ, մասնավորապես, էլեկտրոնային համակարգի ներդրում, որը թույլ կտա ցանկացած ժամանակ պարզել տվյալ գույքի օգտագործման արդյունավետության աստիճանը: Նրա խոսքերով, էլեկտրոնային համակարգը հասանելի կլինի բոլոր գերատեսչություններին: «Արդյունքում մենք կստանանք պետական գույքի հաշվառման իդեալական բազա», - ասել է նա: Բացի այդ, Ա.Սահակյանը հավելել է, որ 2018 թվականին աճուրդները կանցկացվեն բացառապես էլեկտրոնային ձևաչափով:
Միևնույն ժամանակ, վարչության պետը զեկուցել է վարչապետին, որ օտարումներից ստացված միջոցները կազմել են 685.7 մլն.դրամ, 5,7 անգամ գերազանցելով մեկ տարի առաջվա ցուցանիշը, որից 544 մլն. դրամը փոխանցվել է պետական բյուջեին, իսկ 141,7 մլն դրամը`համապատասխան համայնքային բյուջեներին: Իսկ գույքի մասնավորեցումից ստացված միջոցները տարեկան կտրվածքով ավելացել են 5.5%, մինչև 66.4 մլն դրամ, որից 62.3 մլն դրամն ուղղվել է պետբյուջեին, իսկ 4,1 մլն դրամը`համապատասխան համայնքների բյուջեներին: Պետական անշարժ գույքի վարձակալումից պետբյուջեին է ուղղվել 398 մլն դրամ, տարեկան աչը`8%:
Պետական սեփականոթյուն հանդիսացող շինությունների տանիքների վրա կապի սարքավորումների տեղադրումից և սպասարկումից փաստացի ստացվել է 156.2 մլն. դրամ, որից 40.8 մլն դրամը փոխանցվել է պետական բյուջեին: ՊՈԱԿ-ների համապատըասխան բյուջեներին է ուղղվել 166,4 մլն.դրամ, ինչը մոտ 5 անգամ ավելի է 2016-ի ցուցանիշից:
Պետական սեփականություն համարվող հողերի կադաստրային արժեքի վճարումից մուտքերը կազմել են 367 393.4 հազ. դրամ, աճը՝ 852 տոկոս: Նշված հոդվածներով ստացված դրամական միջոցները կազմել են 2 մլրդ 46 մլն 278 հազ. դրամ, ինչը 2016-ի դիմաց ավելի է 165,9 տոկոսով: ՀՀ պետական բյուջե է փոխանցվել 1 մլրդ 390 մլն դրամ` աճը 175 տոկոս: Հարուցված հայցերի և բանակցությունների արդյունքում ՀՀ պետական բյուջե է վերադարձվել 59 316.1 հազ.դրամ գումար: Զեկուցվել է, որ պետգույքի կառավարման ոլորտում 2017-ի ընթացքում կանխատեսվել էր ներգրավել 18 մլն դոլարի ներդրումային ծրագրեր, սակայն իրականացվել է 8 մլն դոլարի ծրագիր՝ 2016-ի 5 մլն-ի դիմաց: 2018 թվականի ընթացքում կանխատեսվում է իրականացնել 16 մլն դոլարի ներդրումային ծրագրեր: Միաժամանակ, Արման Սահակյանը զեկուցել է, որ պետական գույքի մասնավորեցման 2017-2020 թվականների ծրագրում ընդգրկված է 47 պետական գույք և ներկայացրել բարձր արժեք ունեցող պետական անշարժ գույքի օտարման գործընթացացը:
Սնանկ ընկերություններին, նրա խոսքով, վճարվել են 294 մլն դրամի վարկային պարտք, որից բյուջեին է փոխանցվել 7 մլն դրամ, համայնքային բյուջեներին`1.1 մլն դրամ, աշխատավարձի գծով`187.4 մլն դրամ, իսկ այլ վարկային պարտքերի գծով`35 մլն դրամ: