Երեթշաբթի, 20 Փետրվարի 2018 14:18

Արմինֆո. 2018 թվականի հունվարին Հայաստանում տնտեսական ակտիվությունը նվազել է 47,6%-ով` 10,2% տարեկան աճի պայմաններում` նախորդ տարվա հունվարի 46,9% անկման և 6,5% տարեկան աճի դիմաց: ՀՀ ազգային վիճակագրական ծառայության նախնական տվյալներով, տարեկան աճին նպաստել են բոլոր ոլորտները` բացի ագրոհատվածից: Չնչին աճ է արձանագրվել էներգահամալիրում:

 

2018թ. հունվարին արդյունաբերական արտադրանքի ծավալները նվազել են 25%-ով,  ծառայությունների ոլորտինը` 21,6%-ով, առևտրինը` 54,8%-ով, ագրոհատվածինը` 81,2%-ով, շինարարությանը ոլորտինը` 89,4%-ով, և միայն էներգահամալիրում աճ է արձանագրվել` 0,6%: Տարեկան կտրվածքով (2018թ. հունվարին` 2017թ. հունվարի համեմատ) առավել աճով աչքի են ընկել շինարարության ոլորտը և առևտրի հատվածը` 19,7% և 17,3%` համապատասխանաբար, որոնցից հետո գալիս են ծառայությունների ոլորտը` 15,2%, արդյունաբերության հատվածը` 13,9% և էներգահամալիրը` 7%, իսկ ագրոհատվածում արձանագրվել է 0,4% անկում:

 

Վիճակագրական տվյալների համաձայն, 2018 թվականի հունվարին արդյունաերական արտադրանքի գների ինդեքսը բարձրացել է 1,2%` 5,2% տարեկան աճի պայմաններում: Մեկ տարի առաջ, 2017 թվականի հունվարին արդյունաբերական արտադրանքի գների ինդեքսը բարձրացել է  0,3%-ով` 5,5% տարեկան աճի պայմաններում:

 

2018 թ. հունվարին բացարձակ մեծությամբ առաջատարությունը պահպանում է առևտրի հատվածը` 157.4 մլրդ դրամ (326.3 մլն դոլար): Ըստ ծավալի երկրորդ տեղում է արդյունաբերական հատվածը` 128.3 մլրդ (265.9 մլն դոլար), երրորդ տեղում`ծառայությունների ոլորտը`111.4 մլրդ դրամ (231 մլն դոլար), չորրորդ տեղում` ագրոհատվածը 17.5 մլրդ դրամ (36.4 մլն դոլար), հինգերորդ` շինարարական հատվածը` 9.3 մլրդ դրամ (19.3 մլն դոլար): էլեկտրաէներգիայի արտադրության ծավալը 2018 թ. հունվարին կազմել է 830.1 մլն կՎտ/ժ.:

 

Միևնույն ժամանակ, 2018 թվականի հունվարին Հայաստանի արտաքին առևտրի շրջանառությունը կազմել է 226.4 մլրդ դրամ (504.2 մլն դոլար)` 47,6% տարեկան աճով: Դրա կառուցվածքում արտահանման ծավալն աճել է տարեկան 45,2% մինչև 85.3 մլրդ դրամ (176.7 մլն դոլար), իսկ ներմուծմանը` 48,9% տարեկան աճ, մինչև 141.1 մլր դրամ (327.5 մլն դոլար): Միայն 2018 թվականի հունվարին արտաքին առևտրի շրջանառությունը կրճատվել է 26,8%` ներմուծման 28,4% և արտահանման 23,8% անկման հաշվին: 2017թ. հունվարին արտաքին առևտրի շրջանառությունն աճել է տարեկան 45,5%-ով`  արտահանման 35,4% և ներմուծման 51,4% աճի հաշվին, իսկ միայն 2017թ. հունվարին  արտահանման` 21,8% և ներմուծման 27% անկումը հանգեցրել էր արտաքին առևտրի շրջանառության 25,3% նվազման:

 

2018 թվականի հունվարին դրամի միջին հաշվարկային փոխարժեքը կազմել է 482,40 դրամ/1դոլար` 2017 թվականի հունվարի 486,01 դրամ/1դոլարի դիմաց: Նշենք, որ Համաշխարհային բանկը 2018 թ. Հայաստանում կանխատեսում է ՀՆԱ 3,8% աճ` 2019թ. մինչև 4% արագացմամբ: ՀԲ-ն կանխատեսում է 2018 թվականին Հայաստանի արտաքին առևտրի աճի տեմպերի էական դանդաղում, մասնավորապես, արտահանման գծով մինչև 9,2% և ներմուծման գծով մինչև 10,3%, սակայն 2019թ., հակառակը, կլինի արտահանման մինչև 9,7% և ներմուծման մինչև 10,6% զգալի արագացում: 2018 թվականի բյուջեում ամրագրված է ՀՆԱ 4,5% աճ: