Սանիր. Իրան-Հայաստան 400 կիլովոլտանոց  ԷՀԳ շինարարությունը կավարտվի պայմանագրում նշված ժամկետում

Արմինֆո. 2019 թվականի սեպտեմբերի 1-ին կավարտվի Իրան-Հայաստան 400 կիլովոլտանոց ԷՀԳ շինարարությունը: Լրագրողների հետ զրույցում այդ մասին հայտարարել է իրանական «Սանիր՚ ընկերության հայաստանյան գրասենյակի ղեկավար Համիդրեզա Քոտուզիանը` փետրվարի 27-ին Երևանում հայ-իրանական միջկառավարական հանձնաժողովի նիստի շրջանակում:

Նախագծի կապալառու ընկերության ներկայացուցչի ասելով, շինարարներն աշխատանքները կավարտեն նախանշված ժամկետում: «Եթե անակնկալ խոչընդոտներ չծագեն, Իրան-Հայաստան 400 կիլովոլտանոց ԷՀԳ շինարարությունը կավարտվի պայմանագրում նշված ժամկետում` մինչև 2019 թվականի սեպտեմբերի 1-ը՚, - հայտարարել է Համիդրեզա Քոտուզիանը:

Հիշեցնենք, որ ընկերությունը շուրջ 15 տարի գործում է Հայաստանում. նրա հաշվին է «Հայաստան-Իրան՚ գազամուղի, Պուշկինի լեռնանցքում հողմային էլեկտրակայանի կառուցման նախագծերի իրագործումը: «Սանիրը՚ նաև առաջին և երկրորդ ԷՀԳ շինարարության գլխավոր կապալառում էր:

Իրան-Հայաստան երրորդ բարձրավոլտ ԷՀԳ շինարարիության աշխատանքները վերսկսվել են 2016 թվականին: Նախագծի իրագործումը կասեցվել էր 2,5 տարի առաջ: 2015 թվականի դեկտեմբերի 23-ին Երևանում քառակողմ հուշագիր է ստորագրվել է Հայաստանի, Ռուսաստանի, Վրաստանի և Իրանի միջև, որով նախատեսվում է Էլեկտրաէներգիայի փոխհոսքերի կառավարման արդյունավետության, էներգահամակարգերի անվտանգության և հուսալիության բարձրացումը:

Ըստ ՀՀ էներգետիկայի և բնական պաշարների նախարարության, այս նախաձեռնությամբ բարենպաստ միջավայր է ստեղծում մի կողմից այն հանգամանքը, որ Հայաստանի և Իրանի, Վրաստանի և Ռուսաստանի էներգահամակարգերն իրար հետ աշխատում են զուգահեռ  սինխրոն ռեժիմներով, Մասնավորապես նախատեսվում է մինչև 2018թ. շահագործման հանձնել Հայաստան-Վրաստան 400/500 կՎ էլեկտրահաղորդման գիծն ու հաստատուն հոսանքի ներդիրով ենթակայանը։ Դրա արդյունքում կապահովվի Վրաստանի էներգետիկ համակարգի հետ զուգահեռ ասինխրոն ռեժիմում աշխատանքի հնարավորություն և էլեկտրաէներգիայի փոխհոսքի հզորությունը  առաջին փուլում կկազմի 350 Մվտ, մինչև 2021 թ-ը հասնելով 700 Մվտ-ի: Բացի այդ, 2018թ. նախատեսվում է շահագործման հանձնել նաև Իրան-Հայաստան 400 կՎ էլեկտրահաղորդման երկշղթա գիծը։ Այն թույլ կտա Իրանի հետ էլեկտրաէներգիայի փոխհոսքերը հասցնել ընդհուպ մինչև 1200 Մվտ հզորության։ Այս միջոցառումների իրականացման նպատակն է իրագործել հյուսիս-հարավ էլեկտրաէներգտիկական միջանցքի ստեղծման նախաձեռնությունը, որը հնարավորություն կտա աշխատել ԵԱՏՄ և ԵՄ էներգահամակարգերի հետ։  Իրան-Հայաստան ԷՀԳ կառուցման նախագծի արժեքը կազմում է 107 մլն դոլար: Միջոցները տրամադրել է իրանական կողմը, նախագիծն իրագործում է իրանական «Սանիր՚ ընկերությունը: