Երեթշաբթի, 27 Փետրվարի 2018 18:31

Արմինֆո. ՀՀ գյուղատնտեսության նախարարի տեղակալ Աշոտ Հարությունյանը,  «Արդշինբանկ» ՓԲԸ կորպորատիվ բիզնեսի տնօրեն Արթուր Գյուլազյանը,  «Հայբիզնեսբանկ» ՓԲԸ վարչության նախագահի տեղակալ Նշան Գրիգորյանը, «Հայաստանի զարգացման և ներդրումների կորպորացիա» ՓԲԸ (նախկինում`«ՓՄՁ ներդրումներ» ՈւՎԿ) գործադիր տնօրենի տեղակալ Հրաչ Դարբինյանը և ՀՀ կառավարության աշխատակազմի «Գյուղական տարածքների տնտեսական զարգացման ծրագրերի իրականացման գրասենյակ» ՊՀ գյուղական ֆինանսավորման կառույցի տնօրենի ժամանակավոր պաշտոնակատար Վահե Հարությունյանն այսօր ստորագրել են  Հայաստանում ժամանակակից տեխնոլոգիաներով մշակվող ինտենսիվ պտղատու այգիների հիմնման, կարկտապաշտպան ցանցերի և կաթիլային ոռոգման համակարգերի ներդրման համար տրամադրվող վարկերի տոկոսադրույքների սուբսիդավորման  ծրագրերի իրականացումն ապահովելու նպատակով համագործակցության հուշագրեր:

 

Ինչպես տեղեկացնում է Նախարարության մամուլի ծառայությունը, ինտենսիվ այգիների հիմնման, կարկտապաշտպան ցանցերի և կաթիլային ոռոգման համակարգերի ներդրման ծրագրերին միացել է ևս երեք ֆինանսական կառույց: Ծրագրերի շրջանակներում վարկերը տրամադրվելու են ֆիզիկական և իրավաբանական անձանց, այդ թվում՝ կոոպերատիվներին ու անհատ ձեռնարկատերերին: Պետության կողմից իրականացվելու է վարկերի տոկոսադրույքների մասնակի սուբսիդավորում: Շահառուները  կարկտապաշտպան ցանցերի և կաթիլային ոռոգման համակարգերի ներդրման համար կարող են ստանալ տարեկան 2, իսկ ինտենսիվ պտղատու այգիների հիմնման համար` 5 % տոկոսադրույքով վարկեր:

 

«Մեր ծրագրերին արդեն միացել է 8 ֆինանսական կառույց, ավելացել է նաև կապալառուների ցանկը` համալրվելով և' տեղական կազմակերպություններով, և' արտասահմանյան բավական մեծ փորձ ունեցող ընկերություններով», - նշել է նախարարի տեղակալ Աշոտ Հարությունյանը: Փոխնախարարի խոսքով` ծրագրերի նկատմամբ մեծ հետաքրքրություն են ցուցաբերում  թե' գյուղացիական տնտեսությունները և թե' բանկային կառույցները:

 

«Սա պետություն-մասնավոր հատված համագործակցության հերթական քայլն է, որը, համոզված եմ, մեծ դրական արդյունք կունենա մեր տնտեսվարողների համար: Մենք մեր հաճախորդներին արդեն կարող ենք առաջարկել այնպիսի ֆինանսավորում, որն էապես կնպաստի նրանց բիզնեսի զարգացմանը, քանի որ պետության կողմից տոկոսադրույքների սուբսիդավորման էական առաջարկ է արվում», - նշել է «Արդշինբանկ» ՓԲԸ կորպորատիվ բիզնեսի տնօրեն Արթուր Գյուլազյանը:

 

«Հայբիզնեսբանկ» ՓԲԸ վարչության նախագահի տեղակալ Նշան Գրիգորյանն ընդգծել է, որ նշված ծրագրերով առավել քան բարենպաստ պայմաններ են ստեղծված գյուղատնտեսության ոլորտի վարկավորման համար, և  «Հայբիզնեսբանկ»-ը ևս ակտիվորեն կմասնակցի ծրագրին` իրականացնելով ծրագրերով նախատեսված պայմաններով վարկավորում: «Պետության կողմից սուբսիդավորման արդյունքում շատ մատչելի ֆինանսական ռեսուրսներ կտրամադրվեն ծրագրերի ֆինանսավորման համար: Կանխատեսում ենք, որ պահանջարկը կլինի բավականին մեծ և արդյունավետ գյուղատնտեսության զարգացման համար»,  - իր հերթին նշել է «Հայաստանի զարգացման և ներդրումների կորպորացիա» ՓԲԸ գործադիր տնօրենի տեղակալ Հրաչ Դարբինյանը:

 

Մինչ օրս նշված ծրագրերի շրջանակում համագործակցության հուշագրեր են ստորագրվել նաև «ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ», «Ինեկոբանկ»,  «Կոնվերս բանկ», «Արմսվիսբանկ» ՓԲԸ-ների և «Ֆարմ Կրեդիտ Արմենիա» ունիվերսալ վարկային կազմակերպություն առևտրային կոոպերատիվի հետ:

 

Ըստ Գյուղատնտեսության նախարարության տվյալների, հակակարկտային ցանցերի տեղադրման վարկավորման ծրագրի տոկոսադրույքների սուբսիդավորման ծրագրի շրջանակներում վարկերը կտրվեն 7 տարի մարման ժամկետով, տարեկան 14% տոկոսադրույքով, որի սուբսիդավորումը թույլ կտա վարկը տրամադրել 2%-ով: 0.5-10 հեկտար մակերեսով ինտենսիվ պտղատու այգիների տնկման նպատակով տրամադրվող վարկերի տոկոսադրույքների սուբսիդավորման ծրագրի շրջանակներում վարկերը կտրամադրվեն 7 տարի մարման ժամկետով, 5% տարեկան տոկոսադրույքով: Իսկ կաթիլային ոռոգման համակարգերի տեղադրման նպատակով տրամադրվող վարկերի տոկոսադրույքների սուբսիդավորման ծրագրի շրջանակներում վարկերը կտրամադրվեն 3 տարի մարման ժամկետով, 14% տարեկան տոկոսադրույքով, որի սուբսիդավորումը թույլ կտա վարկերը տրամադրել 2%-ով:

 

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, գյուղատնտեսական վարկերի ծավալը 2018 թվականի հունվարի 1-ի դրությամբ հասել է 160.3 մլրդ դրամի կամ 331.1 մլն դոլարի, տարեկան 6.3% աճով: ԱԿԲԱ-Կրեդիտ Ագրիկոլ Բանկը հանդես է գալիս որպես գյուղատնտեսական վարկավորման առաջատարը, ընդգրկելով շուկայի ընդհանուր ծավալների 47.4%-ը (կամ 76.024 մլրդ դրամ), իսկ Հայբիզնեսբանկի և Արդշինբանկի մասնաբաժինները համապատասխանաբար կազմել են` 5.5% և 1.8% կամ բացարձակ արտահայտություն կազմել են`8.7 մլրդ դրամ և 2.9 մլրդ դրամ: (2017 թվականի դեկտեմբերի 31-ի դրությամբ ՀՀ դրամի հաշվարկային փոխարժեքը կազմել է 484.10 դրամ / $ 1):