Հայաստանը հետաձգում է պարտադիր բժշկական ապահովագրության ներդրման ժամկետները

Արմինֆո. Հայաստանի առողջապահության նախարարությունը պատրաստ չէ նշել պարտադիր բժշկական ապահովագրության (ՊԲԱ) փուլային ներդրման ժամկետները: «Հարցը կառավարության օրակարգում է՚, - մարտի 6-ին լրագրողների հետ հանդիպմանը հայտարարել է փոխնախարար Սամվել Մարգարյանը` պատասխանելով ԱրմԻնֆո-ի հարցին: Փոխնախարարը հորդորել է չկենտրոնանալ որոշակի ժամկետների վրա: Մինչդեռ ավելի վաղ հաղորդվել էր, որ 2018 թվականի երկրորդ կեսից սոցփաթեթը կընդգրկի բնակչության առավել անապահով խավերին` 612 հազար մարդու, որոնց մեկ տարի անց պետք է հարեն բոլոր մյուսները:

Փոխնախարարի ասելով, բոլորը հասկանում են, որ ՊԲԱ ներդրման հարցն անհրաժեշտ է լուծել համատարած: Սակայն, քանի որ գործը վերաբերում է Հայաստանի 3 մլն բնակչությանը,  Առողջապահության նախարարությունը հետևում է «փոքր քայլերի սկզբունքին՚: Տվյալ փուլում գերատեսչությունը գրեթե ավարտել է ՀՀ առավել կարիքավոր քաղաքացիների համար ՊԲԱ ներդրման նախապատրաստական աշխատանքները` առանց ներդրման ժամկետների ճշգրտման: «Հուսով ենք, որ ժամանակի ընթացքում երկրի քաղաքացիներն` իրենք կհանգեն այն ըմբռնման, որ բժշկական ապահովագրությունն օբյեկտիվ անհրաժեշտություն է՚, - հայտարարել է նա:

Միակ տեղեկատվությունը, որ այսօր պատրաստ են տրամադրել Առողջապահության նախարարությունում, դա այն է, որ ըստ նախնական փորձագիտական հաշվարկների,   պետծառայող չհանդիսացող աշխատողների համար, որոնք ընդգրկված չեն «Փարոս՚ ծրագրի ցուցակներում, պարտադիր բժշկական ապահովագրության ամսական վճարը կկազմի 6 հազար դրամ: Միևնույն ժամանակ, դեռ 2017 թվականի հոկտեմբերին ԱրմԻնֆո-ի թղթակցին հաղորդել էր առողջապահության նախարար Լևոն Ալթունյանը: Սակայն չաշխատող քաղաքացիներին, կենսաթոշակառուներին և երեխաներին առնչվող հարցը բաց է մնում, քանի որ բյուջեն ի վիճակի չէ լրացուցիչ բեռ ստանձնել:

Այդուհանդերձ, ինչպես ԱրմԻնֆո-ի թղթակցին հավաստիացրել է Սամվել Մարգարյանը, այդ բոլոր հարցերի պատասխանները պետք է տա ՊԲԱ ընդհանուր հայեցակարգը, որի հիման վրա կմշակվի համապատասխան օրենքը: Ինչպես խոստանում է փոխնախարարը, օրինագիծը կանցնի հանրային լսումներ, որոնց ընթացքում հաշվի կառնվեն բոլոր «կողմ՚ և «դեմ՚ կարծիքները:

Հայտնի չէ, թե որքան ժամանակ կպահանջվի ՊԲԱ ներդրման օրենսդրական հիմքի նախապատրաստման համար: Այսօրվա դրությամբ, ինչպես նշել է Մարգարյանը, ինքը կարող է վկայակոչել միայն կառավարության 2017-2022թթ. ծրագիրը, որտեղ սահմանված են ՊԲԱ հայեցակարգի մշակման ժամանակային շրջանակները` 5-ամյա ժամանակահատված: Կա նաև կառավարության որոշակի հանձնարարական, որը պահանջում է այդ փաստաթուղթը մշակել մինչև 2018 թվականի նոյեմբեր: Այդ ուղղությամբ աշխատանքները նախատեսվում է մեկնարկել առաջիկա ամսվա ընթացքում: Մարգարյանը նաև չգիտի, թե դեռ որքան ժամանակ կպահանջվի, որպեսզի, ձեռքին ունենալով հայեցակարգ, դրան հաղորդեն օրինագծի ձև, անցկացնեն խորհրդարանում և ձեռնամուխ լինեն իրագործմանը: «Կան երկրներ, որոնք հայեցակարգը մշակել են 5-6 տարում՚, - նշել է նա: Ընդ որում, վկայակոչելով իր անձնական փորձը, փոխնախարարը հիշեցրել է, որ Հայաստանում ԱՊՊԱ համակարգը ներդնելիս հայեցակարգի մշակման պահից մինչև համապատասխան օրենքի ընդունումը 8 տարի պահանջվեց:

Հիշեցնենք, որ 2017 թվականի հոկտեմբերի 1-ին Հայաստանում մեկնարկել է ՊԲԱ համակարգի փուլային ներդրման գործընթացը, և սոցփաթեթի առաջին հերթի շահառուներ դարձան պետծառայողները: Հենց այն ժամանակ հայտարարվել էր, որ առաջին փուլում ֆինանսավորումը կիրականացնի Առողջապահության նախարարությունը պետական միջոցների հաշվին` հաշվի առնելով շահառուների կարգավիճակը: Ինչպես հայտարարվել էր, այդպես կլինի նաև երկրորդ փուլում, երբ 2018 թվականի երկրորդ կեսից սոցփաթեթը ընդգրկի բնակչության առավել անապահով շերտերը` ևս 612 հազար առավել կարիքավոր քաղաքացիների: Եվ միայն մեկ տարի անց այդ երկու փուլերի դրական արդյունքների դեպքում պետք է ողջ ուժով աշխատի ՊԲԱ  տոտալ համակարգը: