Արմինֆո. «Տաշիր՚ ընկերությունների խումբը հուլիսի 1-ից սոցիալապես անապահով ընտանիքներին կտրամադրի էլեկտրաէներգիայի սակագնի մասնակի փոխհատուցում: Այդ մասին ասվում է «Տաշիր՚ ընկերությունների խմբի հայտարարությունում, որի տեքստն ԱրմԻնֆո-ին տրամադրվել է ընկերության մամուլի ծառայությունը:
«ՀՀ վարչապետ Ն. Փաշինյանի հետ քննարկումների արդյունքում «Տաշիր՚ ընկերությունների խումբը որոշում է կայացրել ս.թ. հուլիսի 1-ից սոցիալապես անապահով ընտանիքներին տրամադրել էլեկտրաէներգիայի սակագնի մասնակի փոխհատուցում` 1 կվտ*ժ-ի դիմաց 10 դրամի չափով՝ ամսական մինչև 250 կվտ*ժ ծախսից: Փոխհատուցումը կտրամադրվի «Տաշիր՚ ընկերությունների խմբի սեփական միջոցներիցև կկազմի սոցիալապես անապահով ընտանիքների էլեկտրաէներգիայի ծախսի 25-ից 30 տոկոս:
Սոցիալապես անապահով խմբերին ցուցաբերվող աջակցությունը ընկերության սոցիալական ծրագրերի գերակա ուղղություններից է: Ընդունված որոշումը դեռևս 2015-2016թթ. իրականացված ծրագրի տրամաբանական շարունակությունն է: Հիշեցնենք, որ 2015թ. օգոստոս ամսից մինչև 2016թ. հուլիսը մինչեւ 250 կվտ*ժ էլեկտրաէներգիա սպառող յուրաքանչյուր բաժանորդի՝ ՀՀ կառավարության եւ «Տաշիր»-ի կողմից պարիտետային սկզբունքով փոխհատուցում է տրամադրվել ավելացված սակագնի չափով՚, - ասվում է հայտարարությունում:
Ավելի վաղ, հունիսի 8-ին հաղորդվել էր, որ ՀՀ կառավարության նախաձեռնությամբ 10 դրամի չափով կնվազեցվի անապահով ընտանիքներին տրամադրվող էլեկտրաէներգիայի սակագինը: Ինչպես կառավարության նիստում հաղորդել էր ՀՀ էներգետիկ ռեսուրսների և բնական պաշարների նախարար Արթուր Գրիգորյանը, դա կտարածվի շուրջ 110-120 հազար քաղաքացու վրա: Նրա ասելով, էլեկտրաէներգիայի սակագնի վերանայման հետ կապված առկա են մի շարք ռիսկեր, որոնք, հիմնականում պայմանավորված են ատոմակայանի նորոգման և աշխատանքի երկարաձգման հետ: «Այս պահին էլեկտրաէներգիայի սակագնի վերանայման հետ կապված ունենք մի շարք ռիսկեր, որոնք չենք կարող հաշվի չառնել: Դրանք հիմնականում պայմանավորված են ատոմակայանի նախադեպը չունեցող այս տարվա ընթացքում նորոգման և աշխատանքի երկարաձգման հետ: Պատմության մեջ ընդհանրապես չի եղել, որ ատոմակայանը այս կարգով կանգնի և կատարվեն երկարաձգման աշխատանքներ՚, - նշել էր նախարարը, հավելելով, որ Աշխատանքի և սոցիալական հարցերի նախարարության և Հայաստանի էլեկտրական ցանցերի հետ կճշտեն վերջնական թիվը: Արթուր Գրիգորյանը հաղորդել է, որ հաշվարկների արդյունքում եկել են այն եզրահանգման, որ հնարավոր է 10 դրամի չափով նվազեցնել անապահով ընտանիքներին տրամադրվող էլեկտրաէներգիայի սակագինը: «Մենք ունենք երկու տարբերակ. առաջին, որ իրականացնենք Հանրային ծառայությունները կարգավորող հանձնաժողովի հետ միասին և երկրորդ, որ մեր բանակցությունները Հայաստանի էլեկտրական ցանցերի հետ՝ ի դեմս սեփականատեր «Տաշիր» ընկերության պայմանավորվածություն է ձեռք բերվել, որպեսզի իրենք իրենց շահույթի հաշվին սակագները ուղղակի նվազեցնեն 10 դրամով: Այստեղ ունենք նաև մեկ այլ առավելություն. եթե մենք «Տաշիր» ընկերության հետ կազմակերպենք սակագնի վերանայումը, մեզ մոտ նաև չեն նվազի հարկերը: Սակագինը մնում է նույնը, սակայն նրանք պակաս են գանձում գումարը, և արդյունքում մենք նաև հավելյալ կանխատեսվող գումարը, որը պետք է մուտաքգրվեր բյուջե, մուտքագրում ենք»:
Սարգիս Խաչատրյան. Մեր գործունեությունն ուղղված է լինելու հաճախորդների փորձառության բարելավմանը
Բիզնեսի թվայնացման հիմնախնդիրը, ո՞ր հանգրվանում է Հայաստանը
Գևորգ Մանթաշյան. Բարձր տեխնոլոգիական արդյունաբերության նախարարությունը հետևողական աշխատանք է տանում Հայաստանում ստարտափների կայացման ուղղությամբ
Bank of Georgia-ն հայտարարել է 303.6 մլն դոլարով "Ամերիաբանկի" ձեռք բերման շուրջ նախնական համաձայնության մասին