Երեթշաբթի, 8 Հունվարի 2019 18:52

Արմինֆո. Երևանի «Արմենալ՚ գործարանի արտադրանքի վերադարձն ԱՄՆ շուկա դարձյալ հարցականի տակ է: ԱՄՆ Սենատում դեմոկրատների առաջնորդ Չակ Շումերը ռուսաստանցի գործարար Օլեգ Դերիպասկայի վերահսկողության տակ գտնվող En+, UC Rusal և Evrosibenergo ընկերությունների նկատմամբ պատժամիջոցները վերացնելու ԱՄՆ ֆինանսների նախարարության որոշման դեմ ուղղված բանաձև է նախապատրաստել, հաղորդել է The Daily Beast-ը:

 

2018 թվականի դեկտեմբերին ԱՄՆ ֆինանսների նախարարությունը Կոնգրեսին տեղեկացրել էր En+, UC Rusal և Evrosibenergo ընկերությունների նկատմամբ պատժամիջոցները վերացնելու մտադրության մասին, քանի որ Դերիպասկան կկրճատի իր մասնաբաժինը, նշում է «ՌԻԱ Նովոստին՚: Ընդ որում, ինքը` Դերիպասկան, կմնա պատժամիջոցների ցուցակում, իսկ այն ակտիվները, որոնց առնվազն 50 տոկոսը պատկանում է Դերիպասկային, կմնան սառեցված վիճակում:

 

«Ես դա անում եմ ոչ այն պատճառով, որ որոշել եմ, թե Կոնգրեսը պետք է միջոցներ ձեռնարկի այդ համաձայնագրի դեմ (պատժամիջոցների վերացման շուրջ – խմբ.), առայժ նման որոշում չունեմ, այլ` նման բանաձև ներկայացնելու ընթացակարգային հնարավորությունը պահպանելու նպատակով, եթ դրա կարիքը լինի՚, - նշել է Շումերը և հավելել, որ կոնգրեսականները կշարունակեն քննարկել Դերիպասկայի կողմից վերահսկվող ընկերությունների նկատմամբ պատժամիջոցները վերացնելու Դոնալդ Թրամփի վարչակազմի որոշման հիմնավորումները: Եթե Շումերը որոշի ներկայացնել այդ բանաձևը, ապա կպահանջվի Կոնգրեսի երկու պալատների պարզ մեծամասնությունը, որպեսզի փաստաթուղթը հայտնվի նախագահի սեղանին: «Թրամփը, ամենայն հավանականությամբ, կմերժի բանաձևը,  ուստի կոնգրեսականները ստիպված են լինելու բավականաչափ ձայներ հավաքել` նախագահական վետոն շրջանցելու համար՚, - գրում է պարբերականը: Կոնգրեսական Սթենի Հոյերն, իր հերթին, հայտարարել է, որ դեմոկրատները կքննարկեն այդ կարևոր հարցի լուծման բոլոր հնարավոր տարբերակները:

 

Հիշեցնենք, որ UC Rusal-ի կառուցվածքում ներառված Երևանի «Արմենալ՚ գործարանի համար ԱՄՆ շուկա վերադառնալու հնարավորություն է ի հայտ եկել այն բանից հետո, երբ ԱՄՆ ֆինանսների նախարարությունը Կոնգրեսին տեղեկացրել էր En+, UC Rusal և Evrosibenergo ընկերությունների նկատմամբ պատժամիջոցները վերացնելու մտադրության մասին:

 

ԱրմԻնֆո-ի վերլուծաբանների կարծիքով, այդ որոշումը UC Rusal-ի դուստր ընկերություն Երեւանի «Արմենալ» գործարանին թույլ կտար վերսկսել փայլաթիթեղի մատակարարումն ԱՄՆ, որը կասեցվել էր տարվա կեսին` UC Rusal-ի խոշոր բաժնետեր Օլեգ Դերիպասկայի նկատմամբ սահմանված պատժամիջոցների առնչությամբ:

 

«Արմենալը՚ ոչ միայն ԱՄՆ, այլեւ Եվրամիության երկրներ պատրաստի արտադրանքի խոշորագույն արտահանող է: ՀՀ վիճակագրական ծառայության տվյալներով, 2018 թվի հունվար-նոյեմբեր ամիսներին Հայաստանում ալյումինե փայլաթիթեղի արտադրությունը նախորդ տարվա նույն ժամանակահատվածի հնամեմատ կրճատվել է 12 տոկոսով` մինչև 26714 տոննա: Վիճակագրական տվյալների համաձայն, միայն նոյեմբերին ալյումինե փայլաթիթեղի արտադրությունը կրճատվել է 9,7 տոկոսով` մինչև 2004 տոննա: