Երեթշաբթի, 17 Մայիսի 2022 12:38

Արմինֆո. ՀՀ տարածքային կառավարման և ենթակառուցվածքների նախարար Գնել Սանոսյանը Իրանի Իսլամական Հանրապետություն կատարած աշխատանքային այցի շրջանակներում հանդիպել է ԻԻՀ նավթի նախարար Ջավադ Օջիի հետ։

 

ՏԿԵՆ մամուլի ծառայության հաղորդման համաձայն, հանդիպման ժամանակ քննարկվել է գազ-էլեկտրաէներգիայի դիմաց ծրագրով նոր պայմանագիրը։ Նախարար Սանոսյանը առաջարկներ է ներկայացրել պայմանագրի վերակնքման հետ կապված։ Առաջիկայում, երբ պայմանագիրը կվերջնականացվի, պատրաստ լինեն ներկայացված առաջարկությունների վերաբերյալ իրանական կողմի պատասխանները, պայմանագիրը կկնքվի։

 

Քննարկվել են նաև նավթի վերամշակման, բիտումի, բիտումի գնի հետ կապված հարցեր։ Նախարարը նշել է, որ Հայաստանում ակտիվ ճանապարհաշինական աշխատանքներ են ընթանում, սակայն բիտումի գնի հետ կապված փոփոխությունները որոշակի դժվարություններ են առաջ բերել։ Նախարարը նկատել է՝ ցանկալի կլիներ, որ բիտումը Հայաստան հասցվեր ավելի մատչելի։

 

Հանդիպման ընթացքում քննարկվել են երկկողմ հետաքրրքություն ներկայացնող այլ հարցեր։ Կողմերը հանդիպումը գնահատել են որպես դրական և կառուցողական։

 

Հիշեցնենք, որ մարտի վերջին Իրանի նավթի նախարար Ջավադ Օջին էներգետիկ ոլորտում երկկողմ համագործակցության հարցերով ՀՀ վարչապետի խորհրդական Արտաշես Թումանյանի հետ քննարկել էր էներգետիկայի ոլորտում համագործակցությունը:  Ըստ Mehr-ի, որը հղում էր անում հայկական ԶԼՄ-ներին, Երեւանն ու Թեհրանը պայմանավորվել են ավելացնել իրանական գազի արտահանումը Հայաստան: Այժմ Ռուսաստանը Հայաստան է մատակարարում գազի մոտ 80 տոկոսը։ Դեռևս 2021 թվականի սեպտեմբերին փոխվարչապետ Մհեր Գրիգորյանը հայտարարել էր, որ Երևանը դիտարկում է այլ երկրներից գազ ներկրելու հնարավորությունը, սակայն այդ որոշումը պետք է կայացվի ենթակառուցվածքային հնարավորություններից ելնելով ։ "Նման մոտեցումն իրականացվում է Իրանի հետ սվոփ-գործարքի (SWAP) շրջանակներում", - պարզաբանել էր փոխվարչապետը:

 

2004 թվականին Թեհրանն ու Երևանը ստորագրել են էլեկտրաէներգիայի դիմաց՝ գազի մասին բարտերային համաձայնագիր՝ 20 տարի ժամկետով, որի համաձայն, Իրանից արտահանվող գազը սպառվելու է Հայաստանի էլեկտրակայանների կողղմից, իսկ փոխարենը, Իրանը էլեկտրաէներգիա է ներմուծում Հայաստանից։ ՀՀ-ն Իրանից գազ է ներկրում 2009-ի կեսերից։ Հայաստանն Իրանի հետ "Գազ Էլեկտրաէներգիայի դիմաց" բարտերային գործարք է իրականացնում՝ Իրանի 1 խմ երկնագույն վառելիքի դիմաց 3 կՎտ/Ժ էլեկտրաէներգիա հաշվարկով։ Գազի մատակարարումներն իրականացվում են Իրան - Հայաստան գազատարով, իսկ Հայաստանից էլեկտրաէներգիան երկու ԷՀԳ-ով ուղարկվում է Իրան։