Երեթշաբթի, 31 Մայիսի 2022 15:23

Արմինֆո. Վերին Լարսի անցակետում կուտակումը պայմանավորված է հսկիչ անցակետերի թողունակության սահմանափակ հնարավորություններով։ Այդ մասին ԱրմԻնֆո-ի թղթակցի հետ հեռախոսազրույցում հաղորդել է "Վերին Լարս" հսկիչ անցակետում Հայաստանի մաքսային կցորդ Արամ Թանանյանը։

Նա պարզաբանել է, որ Թուրքիայից դեպի Ռուսաստան ապրանքահոսքի էական ավելացման առնչությամբ ռուս-վրացական սահմանի հսկիչ անցակետը, փաստորեն, չի դիմանում ծանրաբեռնվածությանը: Թանանյանը տեղեկացրել է, որ, օրինակ, Սարփիում, վրաց-թուրքական սահմանին, կանգնած է մոտ 700 ֆուր։ "Դատելով այն բանից, որ դրանց թույլ չեն տալիս մուտք գործել Վրաստան, ողջ Վրաստանը լցված է ֆուրերով, իսկ դա նշանակում է, որ մի քանի հազար մեքենա բառացիորեն կանգնած է: Մեկ օրում Վրաստանից Ռուսաստան է մեկնել մոտ 430-450 բեռնատար և մոտ 700 մարդատար ավտոմեքենա": Ըստ մաքսային կցորդի, դա բավականին մեծ թիվ է Վերին Լարսի թողունակության հետ համադրման մեջ. 100 ֆուր, 100 մարդատար և 30 ավտոբուս մեկ ուղղությամբ: "Մենք տեսնում ենք, թե որքան է դա գերազանցում նախագծային հնարավորությունները", - նկատել է նա: Այդ առնչությամբ Թանանյանը պատմել է, որ ստեղծված իրավիճակը հաղթահարելու համար ռուսական մաքսային ծառայություններն աշխատում են ուժեղացված ռեժիմով։ "Նրանք անցել են հերթապահության 12-ժամյա աշխատանքային ռեժիմի, ինչը շատ բարդ է ։ Բայց այլ ելք չկա", - նշել է նա։

Ընդ որում, ՀՀ ներկայացուցիչը ուշադրություն է հրավիրել այն հանգամանքին, որ բոլոր երկրների մեքենաները, բացառությամբ Հայաստանի, Վրաստանից կարող են Ռուսաստանի ուղղությամբ մեկնել ադրբեջանական "Կարմիր կամուրջ" – ով՝ դեպի Դաղստան: Սակայն Կարմիր կամրջի վրա էլ մոտ 600 ֆուրի  կուտակում է դիտվում, ինչը խոսում է նաև ադրբեջանական խցանված ճանապարհների մասին։

"Մի խոսքով, հոսքերը շատ մեծ են եւ դեռ ավելանալու են, այդ թվում նաեւ ռուսաստանցիների կողմից իրենց հանգիստը Վրաստանում կազմակերպելու կապակցությամբ", - ասել է Թանանյանը, նշելով, որ հոսքերի ամենամեծ ինտենսիվությունը պետք է սպասել հունիսի 1-ից:

Բացի այդ, ավտոմոբիլային հաղորդակցության ծանրաբեռնվածության վրա որոշակի դեր է խաղացել մի շարք ընկերությունների կողմից լաստանավային փոխադրումների դադարեցումը՝ կապված Սև ծովում տիրող իրավիճակի առնչությամբ (ռուս-ուկրաինական հակամարտություն, որի հետ կապված ծովում հայտնաբերվում են  ականներ - խմբ.)։ Թանանյանի ասելով, նկատի ունենալով նշված իրադարձությունները, որոշ ֆիրմաների մոտ առաջացել են լաստանավային անցման հետ կապված դժվարություններ, այդ պատճառով արտահանողներն ու ներմուծողները անվտանգության տեսանկյունից շեշտը դնում են ավտոմոբիլային փոխադրումների վրա:

Այս պահին, ըստ նրա, քննարկումներ են ընթանում ռուսական մաքսային ծառայությունների հետ՝ "Վերին Լարս" հսկիչ անցակետի թողունակության բարձրացման ուղղությամբ։ Մասնավորապես, Թանանյանը հիշեցրել է ՌԴ տրանսպորտի նախարարության՝ Վերին Լարսի անցակետի արդիականացման ծրագրերի մասին, ինչի արդյունքում մինչեւ տարեվերջ անցակետում կստեղծվի մարդատար ավտոմեքենաների 26 լրացուցիչ ուղի, եւ 13-ը՝ մեծ բեռնատարների համար:

Նա նշել է, որ ռուսական կողմում կուտակված մեքենաներից հայկական մեքենաներին բաժին է ընկնում մոտ 20% - ը, իսկ Վրաստանում՝ մոտ 10% - ը:

Նշենք, որ երկրորդ շաբաթն է՝ "Վերին Լարս" հսկիչ անցակետում դիտվում է մի քանի հազար բեռնատարների կուտակում։ Տարբեր գնահատականներով՝ Ռուսաստան մուտքի է սպասում մինչեւ 3 հազար բեռնատար Հայաստանից, Վրաստանից եւ Թուրքիայից։ Պարապուրդի պատճառով կորուստները գնահատվում են օրական միջինը 600-700 եվրո։

Հիշեցնենք, որ մեկ շաբաթ առաջ իրավիճակի առնչությամբ հայտարարությամբ հանդես է եկել էկոնոմիկայի նախարար Վահան Քերոբյանը։ Նա հաղորդել է, որ աշխատանքներ են տարվում հայկական բեռնատարների համար առանձին միջանցք ստեղծելու ուղղությամբ։ Բացի այդ, վերջերս նախարարությունը հայտարարել էր այս տարվա հունիսին լաստանավային հաղորդակցության գործարկման մասին, որը Հայաստանի երկաթուղային համակարգը կկապի եվրասիականի հետ: