Հինգշաբթի, 3 Օգոստոսի 2023 13:52

Արմինֆո. Կառավարությունն այսօրվա նիստում հավանություն է տվել «ՋիԷՆՍԻ-ԱԼՖԱ» ընկերության («Ռոստելեկոմի» դուստր ընկերություն) կողմից ներկայացված ներդրումային ծրագրին:

 

Կառավարության հաղորդագրության համաձայն, սույն նախագծի ընդունումը պայմանավորված է «ՋիԷՆՍԻ-ԱԼՖԱ» ՓԲԸ կողմից իրականացվող ներդրումային ծրագրի շրջանակներում անհրաժեշտ ենթակառուցվածքների հասանելիության ապահովմամբ՝ տվյալների մշակման կենտրոնի շահագործման համար փոխլրացնող երկու ենթակայանների և համապատասխան մալուխային գծերի կառուցման և ճանապարհային հասանելիություն ապահովելու համար տրանսպորտային ճանապարհի կառուցման և վերակառուցման մասով: Սույն նախագծի ընդունումը հնարավորություն կտա նպաստել ընկերության կողմից իրականացվող ներդրումային ծրագրի արդյունավետ իրականացմանը։

 

Վարչապետի ճշգրտող հարցին, թե պետության սեփականություն հանդիսացող ենթակայաններն ո՞վ է սպասարկում և ի՞նչ պայմաններով, փոխվարչապետ Տիգրան Խաչատրյանը պատասխանել է. «Այս կոնկրետ հարցի առնչությամբ մենք քննարկել ենք մեզ մոտ եղած իրավակարգավորումները և դրանց էությունը հետևյալն է, երբ որևէ կազմակերպություն կարող է իր արտադրական առանձնահատկություններով պայմանավորված կարիք ունի բարձր լարման էլեկտրահաղորդման ցանցից հասանելիություն ունենալ, ապա դիմում է ՀԷՑ-ին: Եթե ՀԷՑ-ը մոտակայքում ունի նման հզորություն, որոշ դեպքեր կան, երբ կան նման ենթակայաններ, այդ դեպքում ՀԷՑ-ն առաջարկում է և՛ ծառայություն, և՛ հատուկ դրա համար նախատեսված սակագին: Քանի որ ՀԷՑ-ն այս դեպքում չունի ենթակայան և առաջիկա տարիների կապիտալ ներդրումների ծրագիրը նախապես համաձայնեցրել է կառավարության հետ, ունի զարգացման իր պլանը և չի նախատեսել այդ վայրում նման լրացուցիչ ներդրում, մենք առաջ ենք ընկնում: Այսինքն՝ հաշվի առնելով ներդրումների առաջնահերթությունը, պետական միջոցներով ձևավորում ենք պետական սեփականությամբ ենթակառուցվածք և դրա կառավարումը փոխանցում ՀԷՑ-ին: Այդ կառավարումը փոխանցելու հետ մեկտեղ կհստակեցվեն նաև հետագա սպասարկման կանոնները: Այսինքն՝ ՀԷՑ-ն ինչպես իր ենթակայաններն է սպասարկում, այնպես էլ կսպասարկի այս ենթակայանը և կապահովի համապատասխան ծառայություն: Դրա դիմաց առաջարկված վճարաչափն արդեն կհատուցի նաև այդ սպասարկման, ծառայությունների համար նախատեսված ծախսերը»: Տիգրան Խաչատրյանը նաև հավելել է, որ քննարկումներ կլինեն համակարգային ավելի լայն հնարավորություններ ընձեռող ենթակառուցվածք ձևավորելու ուղղությամբ:

 

Կառավարության ղեկավարն իր հերթին նշել է, որ այս, ինչպես նաև «Ենթակառուցվածք՝ ներդրումների դիմաց» ծրագրի իրականացումը կմեծացնի նոր ներդրումների հավանականությանը։ Նիկոլ Փաշինյանի խոսքով, ներդրողների համար ավելի նախապատվելի կլինի ներդրումներ կատարել մի վայրում, որտեղ կա ենթակայան, ճանապարհ, ջուր, կապ: «Այս տրամաբանությունը ոչ միայն այսօրվա ներդրողի համար է, այլև ինչ-որ առումով հրավեր է այլ ներդրողներին, որ գիտեք` այստեղ կլաստեր է ձևավորվում, եկեք դուք էլ մասնակցեք։ Ու կանխատեսելի է նաև, որ այդտեղ որոշակի աշխուժություն է լինելու»,- ասել է վարչապետը։ Նա նաև ընդգծել է, որ եթե չկան մոդուլային ենթակայաններ, ապա պետք է ինժեներների առաջ խնդիր դնել՝ ունենալ մոդուլային ենթակայաններ, որոնք իրենց հզորություններն ավելացնելու որոշակի հնարավորություն կունենան։

 

Այս թեմայի շրջանակում Էկոնոմիկայի նախարարի տեղակալ Ռաֆայել Գևորգյանը ներկայացրել է նաև չզեկուցվող հարցերի փաթեթում ներառված մեկ այլ նախագիծ, ըստ որի` կառավարությունը հավանություն է տվել «Եվրոպլաստ 999» ընկերության կողմից ներկայացված ներդրումային ծրագրին: Սույն նախագծի ընդունումը պայմանավորված է ընկերության կողմից իրականացվող ներդրումային ծրագրի շրջանակներում ապահովելու անհրաժեշտ ենթակառուցվածքների կառուցում՝ աջակցելու իրականացվող ներդրման 20 տոկոսի չափով նշված ենթակառուցվածքների՝ ընկերության կողմից արտադրության արդյունավետ կազմակերպման և ծավալների ու արտադրատեսակների ընդլայնման նպատակով ձեռքբերած 24,300 քառ․ մետր հողատարածքում նախնական մոտ 3,000 քառ․ մետր արտադրական տարածք կառուցելու ծրագրի իրականացման և համապատասխան ենթակառուցվածքների ապահովման միջոցով: Սույն նախագծի ընդունումը հնարավորություն կտա նպաստել ընկերության կողմից իրականացվող ներդրումային ծրագրին։

 

Բարձր տեխնոլոգիական և արդյունաբերության նախարար Ռոբերտ Խաչատրյանը քննարկվող հարցի շրջանակում նշել է. «Նման ենթակառուցվածքները շատ անհրաժեշտ են ոլորտի զարգացման համար։ Մենք ծրագրի իրականացման առաջին օրերից շատ սերտ աշխատել ենք «ՋիԷՆՍԻ-ԱԼՖԱ» ընկերության հետ և վերջերս էլ մի քննարկում ունեցանք, որտեղ ներկայացվեց վերջնական ծրագիրը, թե ինչ է արվելու։ Ուզում եմ նշել, որ ստեղծվող ենթակառուցվածքի հնարավորությունները ներկայացվել է Տեղեկատվական համակարգերի կառավարման խորհրդում և արդեն իսկ ունենք որոշակի պատկերացումներ, թե ինչպես կարելի է այդ ենթակառուցվածքի շնորհիվ լուծել առկա խնդիրները՝ նույնիսկ մեր պետական տվյալների կառավարման հետ կապված։ Արդիական տեխնոլոգիաներով է կառուցվում Տվյալների կենտրոնը և համապատասխանում է ժամանակակից բոլոր ստանդարտներին»։