Չորեքշաբթի, 1 Նոյեմբերի 2023 13:11

Արմինֆո.Վարչապետի աշխատակազմի ծախսերը 2024 թվականին կկազմեն 24.5 մլրդ դրամ, ինչը 4.7 մլրդ դրամով գերազանցում է 2023 թվականի ցուցանիշը։ Այդ մասին հայտարարել է ՀՀ վարչապետի աշխատակազմի ղեկավարի տեղակալ Արմենակ Խաչատրյանը՝ Ազգային ժողովի հանձնաժողովներում 2024 թվականի պետական բյուջեի նախագծի վերաբերյալ լսումների ժամանակ։

 

Ծախսերի ավելացումը, նրա ասելով, կապված է պետական հատվածի արդիականացման ծրագրի հետ։ Խաչատրյանը նշել է, որ այդ մասով նախատեսված են 3 մլրդ դրամի կապիտալ ծախսեր, որոնք ուղղվելու են սարքավորումների և ծրագրային ապահովման ձեռք բերմանը:

 

Ընդհանուր առմամբ, ինչպես պարզաբանել է նա, 2024 թվականի համար կառավարության ղեկավարի աշխատակազմը մտադիր է իրականացնել 11 ծրագիր և 51 միջոցառում։

 

Մասնավորապես, պետական հատվածի արդիականացման ծրագրից զատ, իրականացվելու են հասարակական և այլ կազմակերպությունների աջակցության, հանրային իրազեկման, պետական ծառայողների վերապատրաստման, վարչապետի լիազորությունների իրականացման ապահովման, Հայաստան-Սփյուռք գործակցության, հանքարդյունաբերության ոլորտի զարգացման, տեսչական վերահսկողության, տոների և հիշատակի օրերի նշման, Սփյուռքի ներուժի ներգրավման, միջազգային արբիտրաժներում, դատարաններում Հայաստանի Հանրապետության շահերի ներկայացման և պաշտպանության և այդ ատյանների որոշումների իրականացման ծրագրեր:

 

Խոսելով վերջինի մասին՝ Խաչատրյանը նշել է, որ ծախսերը 1.8 մլրդ դրամից աճել են մինչև 3.8 մլրդ դրամ, ինչն առավելապես կապված է իրավաբանական և փաստաբանական խորհրդատվական ծառայություններ ստանալու անհրաժեշտության հետ:

 

Նա նաև տեղեկացրել է, որ հանրային իրազեկման ծրագրի ծախսերն աճել են մինչև 245 մլն դրամ, քանի որ այլ գերատեսչությունների լիազորություններն այդ կապակցությամբ անցել են վարչապետի աշխատակազմին:

 

Խորհրդարանականների շրջանում դժգոհություն են առաջացրել Հանրային խորհրդի գրասենյակի պահպանման հետ կապված ծախսերը, որոնք կազմել են 12 մլն դրամ: Վերջիններիս ասելով՝ խորհրդի գործունեության, կառուցվածքի, կատարած աշխատանքների մասին որևէ տեղ տեղեկություն չկա: Պատգամավորներն աշխատակազմի ղեկավարի տեղակալին խնդրել են տրամադրել համապատասխան տեղեկատվություն