Արմինֆո.2024 թվականի հունվարի 1-ից ժամանակավոր օգտագործման նպատակով Վրաստանից կամ ԵԱՏՄ անդամ չհանդիսացող այլ երկրից ներմուծված ավտոմեքենաների համար ՀՀ քաղաքացիները պետք է որոշակի գումար մուտքագրեն մաքսային մարմնի դեպոզիտ հաշվին: Որոշումն ընդունվել է կառավարության նոյեմբերի 30-ի նիստում։
Ինչպես ասվում է փաստաթղթին կից պարզաբանման մեջ, պայմանավորված այն հանգամանքով, որ Եվրասիական տնտեսական միության անդամ չհանդիսացող պետություններում (հիմնականում՝ Վրաստանում) մարդատար ավտոմեքենաների մաքսային ձևակերպման ժամանակ օրենքով նախատեսված մաքսավճարների չափը ցածր է Եվրասիական տնտեսական միության օրենսդրությամբ նախատեսված մաքսավճարների չափից, այդ տրանսպորտային միջոցները Հայաստանի Հանրապետությունում օրենքին համապատասխան ազատ շրջանառության նպատակով ձևակերպելու և գրանցելու փոխարեն, տրանսպորտային միջոցները ձևակերպվում և գրանցվում են այդ երկրներում (հիմնականում՝ Վրաստանում), իսկ ներմուծվում և կառավարվում են Հայաստանի Հանրապետությունում ձևական ժամանակավոր ներմուծման ձևակերպման միջոցով:
Ներկայումս Հայաստանի Հանրապետության տարածքում շահագործվում է վերը նշված կարգավիճակով շուրջ 9000 ավտոմեքենա: Արդյունքում՝ պետական բյուջե չեն մուտքագրվում մաքսատուրքերի, ավելացված արժեքի հարկի, բնապահպանական հարկի և գույքահարկի վճարումները: Փոխարենը՝ այլ երկրների պետական բյուջեի եկամուտները համալրվում են Հայաստանի Հանրապետությունում շահագործվող, սակայն չգրանցված տրանսպորտային միջոցների համար վերոնշյալ վճարներով:
Եվրասիական տնտեսական միությունից ֆիզիկական անձինք (Հայաստանի Հանրապետության քաղաքացիներ, այդ թվում ՝ երկքաղաքացիներ) երրորդ երկրում գրանցված տրանսպորտային միջոցը Հայաստանի Հանրապետություն ժամանակավոր ներմուծելու համար պարտավոր են մաքսային մարմիններին տրամադրել տրանսպորտային միջոցն ազատ շրջանառության համար վճարման ենթակա մաքսատուրքերի, հարկերի գումարի տեսքով ապահովում ՝ այդ գումարը մուտքագրելով մաքսային մարմնի տնօրինության տակ գտնվող դեպոզիտ հաշվին, որը նրանց կվերադարձվի տվյալ ավտոմեքենայի վերաարտահանման ժամանակ ։ Այս միջոցը կոչված է անշահավետ դարձնել տրանսպորտային միջոցի «ձեւական» ժամանակավոր ներմուծումը։
Առաջարկվող սահմանափակումը չի տարածվի Եվրասիական տնտեսական միության Մաքսային օրենսգրքի 1-ին մասի 264-րդ հոդվածի 1-ին կետում նշված այն օտարերկրացիների վրա, որոնք, հաշվի առնելով նույն հոդվածի 4-րդ կետի դրույթները, պետք է վճարեն միայն իրենց ներմուծած երկրորդ և յուրաքանչյուր հաջորդ տրանսպորտի համար, եթե դրանց ներմուծման պահին լինի նախկինում ժամանակավորապես ներմուծված և դեռ չվերարտահանված առնվազն մեկ ավտոմեքենա: Այլ կերպ ասած՝ այս սահմանափակումը չի վերաբերի անձնական ավտոմեքենաներով Հայաստանի Հանրապետություն զբոսաշրջային կամ գործնական այցելություններ կատարող օտարերկրացիներին: