Երկուշաբթի, 29 Հունվարի 2024 18:40

Արմինֆո.2023 թվականի հունվարից Հնդկաստանից Հայաստան է ժամանել, ընդհանուր առմամբ, շուրջ 16 հազար աշխատանքային միգրանտ։ Այդ մասին հաղորդել է Հայաստանի Կենտրոնական բանկի նախագահի տեղակալ Արմեն Նուրբեկյանը՝ Amundi-Acba Asset Management ամենամյա տնտեսական համաժողովի ընթացքում ներկայացնելով երկրի մակրոտնտեսական միջավայրի մասին զեկույցը: "Սա էական ցուցանիշ է, որը ցույց է տալիս աճի բարձր տեմպեր", - նշել է նա։

Սակայն այդ գործոնը, ԿԲ փոխնախագահի խոսքով, զսպող ազդեցություն կունենա Հայաստանում աշխատավարձերի աճի համատեքստում։ "Քանի որ մենք ունենք ցածր վարձատրվող աշխատուժի մեծ ներհոսք", - պարզաբանել է նա: Նուրբեկյանն այդ առնչությամբ հիշեցրել է, որ Հայաստանում 2023 թվականի ընթացքում պահպանվել է աշխատավարձերի էական աճ՝ ինչպես եռամսյակային, այնպես էլ տարեկան կտրվածքով ՝ մոտ 10 տոկոսով։

 

Զուգահեռ անցկացնելով Հայաստանում և Հնդկաստանում աշխատավարձերի միջև ՝ նա նշել է, որ մինչև 2021 թվականը իրավիճակը կայուն էր, սակայն այդ ժամանակահատվածից հետո  տարբերությունը կրկնապատկվել է ։ "Մենք արդեն միացել ենք միգրացիոն ցանցերին, քանի որ ուժեղ տնտեսական մոտիվացիա է առաջացել աշխատավարձերի էական տարբերության տեսքով, ինչի հետ կապված միգրացիոն հոսքերը դառնում են բավականին ճկուն, եւ արդյունքում մենք ունենք աշխատուժի մեծ ներհոսք, ինչն էլ տեղի է ունենում", - պարզաբանել է նա:

 

Նշենք, որ Amundi-Acba Asset Management տնտեսական համաժողովը Հայաստանում անցկացվում է երկրորդ անգամ և նպատակ ունի մեկ հարթակում համախմբել կարծիքներիի առաջնորդների, ճյուղային փորձագետների և նորարարների՝ ուսումնասիրելու և քննարկելու ժամանակի հիմնական մարտահրավերները, միտումները և տնտեսական միջավայրը ձևավորող այլ կարևոր թեմաներ: Համաժողովի շրջանակներում ներկայացվել են շնորհանդեսներ հետևյալ թեմաներով.  "Ամունդիի ներդրումային տեսլականը աշխարհի և Հայաստանի համար՝ 2024 թ.", "Հայաստանի մակրոտնտեսական զարգացումը", " Արհեստական բանականություն և ԷՍԳ սկզբունքներ (բնապահպանական, սոցիալական և կառավարչական)"; տեղի է ունեցել նաև պանելային քննարկում՝ նվիրված կայուն ֆինանսների համար արհեստական բանականության խնդիրներին և հնարավորություններին: Համաժողովի ավարտին տեղի է ունեցել հարցազրույց ՀՀ Կենտրոնական բանկի նախագահ Մարտին Գալստյանի հետ՝ "Հարավային Կովկասի աշխարհաքաղաքականությունը և դրա ազդեցությունը Հայաստանի տնտեսության վրա" թեմայով:

 

Նշենք, որ Amundi-Acba Asset Management կառավարող ընկերությունը, որը ՀՀ ԿԲ-ում գրանցվել է 2013թ. նոյեմբերի 19-ին, գործում է Հայաստանում 2014թ. հունվարի 1-ից ներդրված պարտադիր կուտակային կենսաթոշակային համակարգի շրջանակում: 2024թ. ընկերության կառավարման ներքո գտնվող ակտիվները հասել են 417 մլրդ դրամի, ինչը 16%-ով գերազանցում է մեկ տարվա վաղեմության ցուցանիշը: "Ամունդի - Ակբա Ասեթ Մենեջմենթ" ՊՖ - ի բաժնետերերն են ֆրանսիական Amundi Asset Management ընկերությունը ՝ 51% բաժնեմասով, և ԱԿԲԱ Բանկը ՝ 49%: